ОЙБЕК НОМЛИ МАҲАЛЛАДА “XUSNIYA KIDS” НОДАВЛАТ МАКТАБГАЧА ТАЪЛИМ ТАШКИЛОТИ ЎЗ ФАОЛИЯТИНИ БОШЛАДИ
Мамлакатимизда таълим-тарбия ишларини замон талаблари даражасида ташкил этиш, соҳага инновацион ғояларни кенг жорий қилиш ҳамда нодавлат таълим ташкилотлари фаолиятига кенг йўл очишга қаратилган саъй-ҳаракатлар туфайли бугунги кунда, айниқса, мактабгача таълим тизими жадал ривожланмоқда. Нодавлат мактабгача ташкилотларининг ҳам йил сайин нуфузи ва таълим-тарбия сифати тобора яхшиланиб, натижада мактабгача таълим ёшидаги болаларни қамраб олиш кўрсаткичи ошиб бормоқда. Соҳага тадбиркорларнинг жалб қилиниши аҳолининг мактабгача таълим ташкилотларига бўлган талаб ва эҳтиёжларини қондириш имконини бериш билан бирга янги иш ўринларининг ҳам пайдо бўлишига замин яратмоқда.
Амударё туманида ҳам Ўзбекистон Республикаси Президентининг 2018 йил 5 апрелдаги “Мактабгача таълим тизимини янада рағбатлантириш ва ривожлантириш чора-тадбирлари тўғрисида”ги Қарорига кўра, мактабгача таълим тизимида нодавлат сектор иштирокини янада ривожлантириш, мактабгача таълим тармоғини кенгайтириш, хусусий МТТларни ташкил этиш истагида бўлган тадбиркорларга зарур шарт-шароитлар яратиб бериш, қурилиш-таъмирлаш ишларида яқиндан кўмаклашиш ва тадбиркорларни қўллаб-қувватлашга қаратилган эътибор ва рағбат туфайли кўплаб хусусий муассасалар фаолияти йўлга қўйилмоқда.
Ана шундай нодавлат мактабгача таълим ташкилотларидан бири янги 2025 йилнинг илк ҳафтасида Манғит шаҳрининг Ойбек номли маҳалласида ҳам ташкил этилиб, ўз фаолиятини бошлади.
Бугунги кунда мазкур маҳалла ҳудудида 1та давлат, 2та оилавий нодавлат мактабгача таълим ташкилотлари мавжуд бўлиб, уларда 373 нафар кичкитойлар тарбияланаётган эди. Янгидан ташкил этилган “XUSNIYA KIDS” нодавлат мактабгача таълим ташкилоти эса 120 ўринга мўлжалланган бўлиб, 4та гуруҳнинг ҳар бирига 30 нафардан болажонлар қамраб олиниши режалаштирилган.
Муассасанинг очилиш маросимида Амударё тумани ҳокимининг молия, иқтисодиёт ва камбағалликни қисқартириш масалалари бўйича биринчи ўринбосари Фахриддин Юсупов, туман Мактабгача ва мактаб таълими бўлими бошлиғи Ялғаш Шомуродов, маҳалла фуқаролар йиғини масъуллари ва кенг жамоатчилик вакиллари иштирок этдилар.
“XUSNIYA KIDS” нодавлат мактабгача таълим ташкилотини ташкил этиш, муассаса биносини қуриш ва жиҳозлаш учун тадбиркорнинг салкам 3 млрд сўм ўз маблағи йўналтирилиб, шунинг 2,4 млрд сўми қурилиш ва реконструкция ишлари учун, 500 миллион сўмдан ортиқ қисми эса бинони тўлиқ жиҳозлаш учун сарфланди.
Гулхумор Қозоқбоева раҳбарлигида ўз фаолиятини бошлаган мазкур мактабгача таълим ташкилотида болажонларнинг яйраб улғайишлари учун барча шароитлар яратилган. Хусусан, юмшоқ ўриндиқлар, болаларнинг тўйиб ухлашлари учун қулай ва замонавий диван-каравотлар билан жиҳозланган дам олиш хонаси, турли эртак қаҳрамонлари, она табиат манзаралари билан безатилган, бири-биридан ёқимтой ўйинчоқлар туркумларини ўзида мужассам этган ўйинхона, ювиниш ва кийимларни алмаштириш хоналари, тантаналар зали, ошхона ва овқатланиш хоналари кўрган кўзни қувонтиради.
Тадбиркор Феруза Мадраҳимова томонидан ташкил этилган “XUSNIYA KIDS” нодавлат мактабгача таълим ташкилоти иш бошлаши билан 15 нафар аёл-қизлар доимий иш билан таъминланди. Муассаса тўлиқ қувват билан фаолият юритишни бошлагач, яъни 4 та гуруҳнинг ҳар бирига 30 нафардан бола қамраб олингандан кейин иш ўринларини янада кенгайтириш режалаштирилган.
– Мақсадимиз – халқимизга муносиб хизмат қилиш, – дейди тадбиркор Феруза Мадраҳимова. – Давлатимиз тадбиркорлар учун кенг имкониятлар яратиб бермоқда. Фидойи меҳнат қилган тадбиркорга эса эътибор ва ғамхўрлик кўрсатилаётир. Бунга жавобан биз тадбиркорлар ҳам янада яхшироқ, янада фаолроқ ишлашимиз керак.
Биз эса эл-юрт манфаати йўлида хизмат қилишга бел боғлаган Феруза Мадраҳимовага:
– Эзгу ишларингизда омад ва муваффақиятлар ёр бўлсин, – дея тилак билдирдик.
Ирода ЭРДОШEВА, Қорақалпоқ давлат университети Журналистика факультети 2-босқич талабаси
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
