Томорқа – даромад манбаи ва фаровонлик кафолати

Баҳор фасли деҳқонлар учун янги ҳаёт, янги имкониятлар мавсуми. Она замин яшил рангга бурканиб, табиат уйғонган сари меҳнатсевар инсонлар ҳам дала ва томорқа ишларига киришади. Мамлакатимизда аҳолининг томорқалардан самарали фойдаланиши, даромад топиш имкониятларини кенгайтириш мақсадида кенг кўламли чора-тадбирлар амалга оширилмоқда. Қишлоқ хўжалигини ривожлантиришга қаратилган давлат дастурлари доирасида ажратилаётган имтиёзли кредитлар ва субсидиялар аҳоли учун ҳақиқий имкониятга айланди.

Амударё туманининг Арнабўйи маҳалласида меҳнаткаш деҳқон ва тадбиркорлар маҳалла раиси Шуҳрат Султанов ва ҳоким ёрдамчиси Сирож Уразматовларнинг саъй-ҳаракатлари билан мавжуд имкониятлардан самарали фойдаланиб, деҳқончилик ва томорқа орқали яхши натижаларга эришмоқда. Етиштирилган маҳсулотлар аҳоли дастурхонлари тўкинлигига ҳам ҳисса қўшмоқда.

Жамолиддин Раимбоев иссиқхонасида баҳор мавсумига мос бодринг уруғлари экилган бўлиб, бугунги кунда униб чиққан. Иссиқхона эгатлари плёнка билан қоплангани туфайли иссиқлик таъсири оширилиб, ҳосилдорлик юқори бўлиши таъминланмоқда.

Жамолиддин Раимбоев болалигидан деҳқончиликка қизиқиб келган. Аввал озиқ-овқат савдоси билан шуғулланган, бугун эса яхши кўрган касби орқали даромад топиш мақсадида иссиқхона ташкил этди. 2024 йил июнь ойида 30 сотих ер майдонида иссиқхона қуришга киришган тадбиркор июль ойи ўрталарида бодринг экиб, бир ой ичида илк ҳосилни олди.

Иссиқхонада маҳаллий ва сараланган навли бодринглар етиштирилмоқда. Томчилатиб суғориш тизимининг жорий этилиши сув тежамкорлигини таъминлаб, ҳосилдорликни оширишга хизмат қилмоқда. Иссиқхона қуриш ишлари андижонлик тажрибали усталар томонидан бажарилган. Раимбоевлар оиласи иссиқхона орқали йил давомида 3 марта ҳосил олишга эришмоқда. Лойиҳани амалга ошириш учун банкдан 5 йил муддатга 280 миллион сўм миқдорида имтиёзли кредит олинган. Ҳар бир экиш мавсумида экин 2 ой давомида ҳосил беради ва маҳаллий бозорларга етказиб берилади.

Маҳалладаги яна бир меҳнаткаш томорқачи Ойбек Халиллаев ҳам оиласи билан 4 сотихлик иссиқхонасида асосан бодринг етиштиради. Бу йил деҳқон синов тариқасида помидор ва қалампир экишга ҳам бел боғлади. Иссиқхонадан ташқари 30 сотихдан иборат томорқасида картошка, карам, шунингдек, бодринг ва помидор етиштириш билан шуғулланади. Бугунги кунда картошка экиш ишлари якунланган бўлиб, иссиқхонага ўз кўчатхонасида етиштирилган бодринг кўчатларини ўтказмоқда.

Ойбек ака меҳнатсевар ва иродали инсон. У ногиронлиги бор бўлишига қарамай, тиришқоқлиги ва меҳнатсеварлиги билан ҳалол ризқ топмоқда. Баъзи одамлар соғлом бўлса-да, ҳаётдан нолиб яшайди. Ойбек ака эса турмуш ўртоғи Гулнора Аметова ва фарзандлари билан фидокорона меҳнати билан оилага даромад келтирмоқда.

Ойбек Халиллаевнинг онаси – 75 ёшли Гулчеҳра она Тураева ҳам ҳалигача фаол меҳнат қилади. У фарзандларига бош бўлиб, томорқада ёшлардек серғайрат ишлайди. Гулчеҳра она неваралари учун сабоқ ва меҳнаткашликнинг ёрқин намунасидир.

Томарқадан олинган даромад орқали Ойбек Холиллаевнинг катта қизи Малоҳат Болтабоева Тошкент ирригация ва қишлоқ хўжалигини механизациялаш муҳандислари институти Миллий тадқиқот университетида таҳсил олмоқда, кичик қизи Маҳлиё Болтабоева эса 10-синф ўқувчиси.

Бу оила нафақат иссиқхоначилик, балки чорвачилик ва асаларичилик билан ҳам шуғулланиб, турли соҳаларда ўзини синаб кўрмоқда.

Бугунги кунда давлат томонидан қишлоқ хўжалигини ривожлантириш, деҳқончилик ва оилавий тадбиркорликни қўллаб-қувватлаш мақсадида имтиёзли кредитлар ажратилаётгани кўпчилик учун янги имкониятлар эшигини очмоқда. Ёш оилалар ва ижтимоий ҳимояга муҳтож қатлам вакиллари учун бундай имкониятлар – мустақил бизнес ташкил этиш ва оилавий даромадни оширишда катта ёрдам бўлмоқда.

Энг муҳими, томорқа – даромад манбаи. Агар инсон ҳаракат қилса, ер унга саховатини аямайди. Ҳар қандай шароитда ҳам меҳнат қилиб, илм ва тажрибасини бойитган киши ўзининг ва оиласининг фаровонлигини таъминлай олади.

Шоҳзод Қурбонбоев.