Қонунчилик палатаси депутати тиббиёт муассасаларига ташриф буюрди

Бугунги кунда депутатларнинг ўз фаолиятига масъулият билан ёндашуви баробарида одамларнинг ҳам халқ вакилига бўлган ишончи ортмоқда. Хусусан, депутатларнинг жойига чиққан ҳолда, ҳудудлардаги мавжуд муаммоларни ўрганиб, ҳал этиши, муаммоларга самарали ечим топиши, халқнинг ичига кириб бориши эса юртдошларимизнинг мамлакатимиз сиёсий ҳаётига ва сиёсий партиялар фаолиятига бўлган ижобий кўз қарашининг шаклланишида муҳим омил бўлмоқда.

Айни кунларда депутатлар томонидан сайловчиларнинг муаммоларини ўрганиш ва ижобий ҳал этиш борасида жойларда амалий тадбирлар ўтказилмоқда.

28 март куни Ўзбекистон Республикаси Олий Мажлис Қонунчилик палатаси депутати, Ўзбекистон Халқ демократик партияси фракцияси аъзоси Сайёра Имамова Амударё туманида бўлди. Ташриф доирасида депутат сайловчилар билан учрашди ва ҳудуддаги мавжуд муаммоларни, жумладан, ҳуқуқбузарликларнинг барвақт олдини олиш ва коррупциянинг олдини олиш борасида амалга оширилаётган ишлар ва туман Кўп тармоқли марказий поликлиникаси фаолиятининг ҳолатини ўрганди.

Дастлаб Олий Мажлис Қонунчилик палатаси депутати Сайёра Имамова Амударё тумани Кўп тармоқли марказий поликлиникасида беморлар ва шифокорлар билан мулоқот қилди.

Мулоқот давомида шифокорларнинг иш фаолиятида учрайдиган хато ва камчиликларга йўл қўймаслик, касалликларга тўғри ташхис қўйиш ва ўз вақтида касалликларнинг олдини олиш, даволаш, беморлар билан тўғри мулоқот қилиш, беморлар томонидан билдирилаётган эътирозларни инобатга олиб, уларга тўғри ечим топиш каби бир қатор масалалар бўйича фикр ва тавсиялар бериб ўтилди.

Шунингдек, депутат ушбу поликлиникада тиббий кўрикдан ўтиш учун аҳолига яратилган шароитлар билан ҳам яқиндан танишди. Ўрганишлар давомида никоҳдан ўтишдан аввал поликлиникага тиббий кўриклардан ўтиш мақсадида келган ёшлар билан ҳам фикр-мулоҳазалар алмашилди. Уларга никоҳдан олдинги тиббий кўрикдан ўтишнинг аҳамияти, қариндошлар ўртасидаги никоҳнинг салбий жиҳатлари, соғлом ва баркамол фарзандни дунёга келтиришда тиббий кўрикларнинг муҳимлиги ҳақида жараёнда иштирок этаётган шифокорлар томонидан батафсил тушунтиришлар берилди. Шу билан бирга, соҳада коррупциянинг олдини олиш борасида амалга оширилаётган ишлар билан ҳам яқиндан танишилди.

Шундан сўнг, депутат Сайёра Имамова Амударё тумани Тиббиёт бирлашмаси Туғруқ бўлимида бўлиб, у ердаги беморлар ва шифокорлар билан мулоқот қилиб, аҳолига кўрсатилаётган тиббий хизмат ҳолатини кўздан кечирди.

Маълумки, мамлакатимизда аҳолининг репродуктив саломатлигини мустаҳкамлаш, оналик ва болаликни муҳофаза қилиш, соғлом бола туғилиши, жисмоний ва маънавий баркамол авлодни вояга етказиш соғлиқни сақлаш соҳасида амалга оширилаётган ислоҳотларнинг бош мезонига айланди. Хусусан, аёллар ва ўсмир қизларни соғломлаштириш ва бўлажак оналарнинг репродуктив саломатлигини яхшилаш, ҳомиладорларга тиббий ёрдам кўрсатиш сифатини ошириш, оналар саломатлигини мустаҳкамлаш мақсадида тиббиёт масканларида “Аёллар маслаҳатхона”лари, қизлар саломатлиги бўлимлари ташкил этилган. Аҳолини профилактик кўрикдан ўтказиш, тизимли патронаж билан қамраб олиш ва репродуктив саломатлигини мустаҳкамлаш юзасидан кўрилган чоралар ўз натижасини бермоқда. Юртимиз шаҳар ва қишлоқларида замонавий шарт-шароитларга эга туғуруқхоналар қад ростламоқда.

Депутат ёш оналар билан дилдан мулоқот қилиб, уларнинг бўлимда яратилган шароитлардан қай даражада розилиги, шифокорларнинг муомала маданияти қандай эканлиги ва дори-дармонлар ўз вақтида етказилиб берилаётгани билан қизиқди. Янги туғилган чақалоқлар ҳам ҳолати кўздан кечирилиб, уларнинг келгусида соғлом ва баркамол, комил инсонлар бўлиб вояга етишига тилакдошлик билдирилди.

Азиза Мадраҳимова