Qonunchilik palatasi deputati tibbiyot muassasalariga tashrif buyurdi

Bugungi kunda deputatlarning oʻz faoliyatiga masʼuliyat bilan yondashuvi barobarida odamlarning ham xalq vakiliga boʻlgan ishonchi ortmoqda. Xususan, deputatlarning joyiga chiqqan holda, hududlardagi mavjud muammolarni oʻrganib, hal etishi, muammolarga samarali yechim topishi, xalqning ichiga kirib borishi esa yurtdoshlarimizning mamlakatimiz siyosiy hayotiga va siyosiy partiyalar faoliyatiga boʻlgan ijobiy koʻz qarashining shakllanishida muhim omil boʻlmoqda.

Ayni kunlarda deputatlar tomonidan saylovchilarning muammolarini oʻrganish va ijobiy hal etish borasida joylarda amaliy tadbirlar oʻtkazilmoqda.

28-mart kuni Oʻzbekiston Respublikasi Oliy Majlis Qonunchilik palatasi deputati, Oʻzbekiston Xalq demokratik partiyasi fraktsiyasi aʼzosi Sayyora Imamova Amudaryo tumanida boʻldi. Tashrif doirasida deputat saylovchilar bilan uchrashdi va hududdagi mavjud muammolarni, jumladan, huquqbuzarliklarning barvaqt oldini olish va korruptsiyaning oldini olish borasida amalga oshirilayotgan ishlar va tuman Koʻp tarmoqli markaziy poliklinikasi faoliyatining holatini oʻrgandi.

Dastlab Oliy Majlis Qonunchilik palatasi deputati Sayyora Imamova Amudaryo tumani Koʻp tarmoqli markaziy poliklinikasida bemorlar va shifokorlar bilan muloqot qildi.

Muloqot davomida shifokorlarning ish faoliyatida uchraydigan xato va kamchiliklarga yoʻl qoʻymaslik, kasalliklarga toʻgʻri tashxis qoʻyish va oʻz vaqtida kasalliklarning oldini olish, davolash, bemorlar bilan toʻgʻri muloqot qilish, bemorlar tomonidan bildirilayotgan eʼtirozlarni inobatga olib, ularga toʻgʻri yechim topish kabi bir qator masalalar boʻyicha fikr va tavsiyalar berib oʻtildi.

Shuningdek, deputat ushbu poliklinikada tibbiy koʻrikdan oʻtish uchun aholiga yaratilgan sharoitlar bilan ham yaqindan tanishdi. Oʻrganishlar davomida nikohdan oʻtishdan avval poliklinikaga tibbiy koʻriklardan oʻtish maqsadida kelgan yoshlar bilan ham fikr-mulohazalar almashildi. Ularga nikohdan oldingi tibbiy koʻrikdan oʻtishning ahamiyati, qarindoshlar oʻrtasidagi nikohning salbiy jihatlari, sogʻlom va barkamol farzandni dunyoga keltirishda tibbiy koʻriklarning muhimligi haqida jarayonda ishtirok etayotgan shifokorlar tomonidan batafsil tushuntirishlar berildi. Shu bilan birga, sohada korruptsiyaning oldini olish borasida amalga oshirilayotgan ishlar bilan ham yaqindan tanishildi.

Shundan soʻng, deputat Sayyora Imamova Amudaryo tumani Tibbiyot birlashmasi Tugʻruq boʻlimida boʻlib, u yerdagi bemorlar va shifokorlar bilan muloqot qilib, aholiga koʻrsatilayotgan tibbiy xizmat holatini koʻzdan kechirdi.

Maʼlumki, mamlakatimizda aholining reproduktiv salomatligini mustahkamlash, onalik va bolalikni muhofaza qilish, sogʻlom bola tugʻilishi, jismoniy va maʼnaviy barkamol avlodni voyaga yetkazish sogʻliqni saqlash sohasida amalga oshirilayotgan islohotlarning bosh mezoniga aylandi. Xususan, ayollar va oʻsmir qizlarni sogʻlomlashtirish va boʻlajak onalarning reproduktiv salomatligini yaxshilash, homiladorlarga tibbiy yordam koʻrsatish sifatini oshirish, onalar salomatligini mustahkamlash maqsadida tibbiyot maskanlarida “Ayollar maslahatxona”lari, qizlar salomatligi boʻlimlari tashkil etilgan. Aholini profilaktik koʻrikdan oʻtkazish, tizimli patronaj bilan qamrab olish va reproduktiv salomatligini mustahkamlash yuzasidan koʻrilgan choralar oʻz natijasini bermoqda. Yurtimiz shahar va qishloqlarida zamonaviy shart-sharoitlarga ega tugʻuruqxonalar qad rostlamoqda.

Deputat yosh onalar bilan dildan muloqot qilib, ularning boʻlimda yaratilgan sharoitlardan qay darajada roziligi, shifokorlarning muomala madaniyati qanday ekanligi va dori-darmonlar oʻz vaqtida yetkazilib berilayotgani bilan qiziqdi. Yangi tugʻilgan chaqaloqlar ham holati koʻzdan kechirilib, ularning kelgusida sogʻlom va barkamol, komil insonlar boʻlib voyaga yetishiga tilakdoshlik bildirildi.

Aziza Madrahimova