“САЛОМАТЛИК УЧУН БАДАНТАРБИЯ ВА 5000 ҚАДАМ ПИЁДА ЮРИШ” МАРАФОНИ ЎТКАЗИЛДИ

Саломатлик – инсоннинг энг катта бойлиги ҳисобланади. Бугунги замонавий тараққиёт ритмида ва доимий стрессли вазиятларда ана шу бойликни асраб-авайлаш, организмни соғломлаштириш учун вақт ажратиш қийин. Лекин Бутунжаҳон Соғликни сақлаш ташкилотининг тавсияси – соғлом турмуш тарзига мунтазам равишда амал қилиш инсонни ҳам маънан, ҳам ақлан чиниқтиришини ҳисобга олсак, алоҳида вақт ажратмай туриб ҳам инсон мустаҳкам саломатлик соҳиби бўлиши мумкин.

Олимларнинг ҳисоб-китобларига кўра, саломатликни белгиловчи омиллар 10-15 фоиз экологияга, 10-15 фоиз генетикага, 10-12 фоиз тиббиёт тизими даражасига ва 55-60 фоиз соғлом турмуш тарзига боғлиқ экан. Ваҳоланки, соғлом турмуш тарзига амал қилиш ўзига ва атрофидагиларга эътиборли бўлиш, кундалик санитария-гигиена қоидаларига амал қилиш ҳар бир тиббий маданиятли инсоннинг бурчидир. Бутунжаҳон Соғликни сақлаш ташкилоти байрами – 7 апрель санаси билан боғлиқ тадбирлар бутун дунё халқларини ана шу бурч масъулиятини ҳис этиб яшашга даъват этиб келади. Чунки Жаҳон Соғликни сақлаш ташкилоти маълумотларига кўра, биргина экологик муаммолар туфайли ҳар йили ер юзида 13 млн. киши вафот этади.

Ер куррасининг 90 фоиздан зиёд аҳолиси носоғлом ҳаводан нафас олади. Қолаверса, глобал исиш, турли табиат ҳодисалари ва сув танқислиги инсонлар соғлигига салбий таъсир қилмоқда. Бундан ташқари, нотўғри овқатланиш, ҳаддан ташқари ширинликка ружу қўйиш, камҳаракатлилик ва семириш юрак қон-томир, саратон касалликларининг келиб чиқишига сабаб бўлмоқда.

Амударё туман тиббиёт бирлашмасининг спорт-соғломлаштириш майдончасида 7 апрель – Бутунжаҳон саломатлик куни байрамига бағишлаб ўтказилган “Саломатлик учун бадантарбия ва 5000 қадам пиёда юриш” тадбирида Тиббиёт бирлашмасининг тажрибали шифокорлари томонидан бу ҳақда батафсил сўз юритилди.

Ўзбекистон Республикаси Президентининг тегишли Фармонлари ҳамда Қорақалпоғистон Республикаси Соғликни сақлаш вазирлигининг кўрсатма хатида белгиланган вазифалар ижросини таъминлаш мақсадида Амударё туман Тиббиёт бирлашмаси Саломатлик ва стратегик ривожланиш бўлими спорт тарғиботчиси Ибодулла Нуримбетов раҳбарлигида ўтказилган тадбир аввалида иштирокчилар баданни чиниқтирувчи машқларни бажардилар.

Шундан сўнг, тиббиёт ходимлари Шифокорлар кўчаси бўйлаб 5000 қадам пиёда юриш марафонида қатнашдилар. Она табиат бағрида, эрталабки мусаффо ҳаводан баҳраманд бўлиб, пиёда юриш марафонида иштирок этган 150 нафардан зиёд тиббиёт ходимлари шу кунги иш фаолиятларини кўтаринки кайфиятда, тетиклик билан бошладилар. Зеро, эрталабки бадантарбия машқлари нафақат соғлом турмуш тарзи, балки ижтимоий ва жисмоний фаолликнинг бирдан-бир асосидир.

РОБИЯ ЙЎЛДОШЕВА.