“Ташаббусли бюджет” маблағлари ҳисобидан 40-сонли мактаб ҳудудида замонавий спорт майдончаси қурилиб, фойдаланишга топширилди

Юртимизда сўнгги йилларда фуқароларнинг ижтимоий ҳаётдаги иштироки ва ташаббусларини рағбатлантириш, маҳаллий муаммоларни ҳал этишга кенг жамоатчиликни жалб этиш мақсадида “Ташаббусли бюджет” механизми жорий этилди. Мазкур тизим орқали аҳоли томонидан билдирилган таклифлар овоз бериш орқали сараланиб, энг муносиблари давлат бюджети ҳисобидан молиялаштириб келинмоқда. Бу жараён аҳоли талаб ва эҳтиёжларини ҳисобга олган ҳолда ҳудудлардаги инфратузилмани яхшилашга хизмат қилмоқда.

“Ташаббусли бюджет”нинг 2024 йилги мавсуми доирасида Амударё туманидаги 40-сонли умумтаълим мактаби жамоаси томонидан тақдим этилган мактаб ҳудудида мини футбол майдони барпо этишга доир лойиҳа ғолиб деб топилган эди. Натижада мазкур ижтимоий аҳамиятга молик лойиҳага давлат бюджети ҳисобидан 1 миллиард 282 миллион сўм маблағ йўналтирилди.

Лойиҳа асосида замонавий мини футбол ҳамда волейбол ва баскетбол ўйинлари учун майдон қурилди. Қурилиш ишлари “Mang‘it Invest Maksimum” масъулияти чекланган жамияти томонидан юқори сифатда ва қисқа муддатда бажарилди. Спорт иншоотининг ён ва устки қисми махсус қопламалар билан таъминлангани майдондан турли мавсумларда ҳам самарали фойдаланиш имконини яратади.

Жорий йилнинг 7 март куни мазкур майдоннинг очилиш маросими тантанали руҳда ўтказилди. Тадбирда туман таълим бўлими масъуллари, мактаб педагогика жамоаси, Янгиобод маҳалласи “еттилик” аъзолари, маҳаллий фаоллар, ёшлар ҳамда жамоатчилик вакиллари иштирок этди.

Тадбирда сўзга чиққанлар томонидан “Ташаббусли бюджет” лойиҳаси аҳолининг жамият ҳаётидаги иштирокини таъминлаш, бюджет маблағларидан самарали фойдаланиш ва фуқаролар фикрини инобатга олиш борасида муҳим платформага айланаётгани таъкидланди. Шунингдек, бундай лойиҳалар жойлардаги ижтимоий-иқтисодий шароитларни яхшилашга, ёш авлодни спортга жалб этишга хизмат қилаётгани қайд этилди.

Байрамона тадбир давомида мактаб ўқувчилари томонидан концерт дастурлари, ўртоқлик учрашувлари ташкил этилди. Хусусан, юқори синф ўқувчилари ўртасида футбол ва баскетбол бўйича ўйинлар ўтказилди.

Айтиш лозимки, ушбу спорт майдонининг фойдаланишга топширилиши мактаб ўқувчилари ҳамда маҳаллий ёшлар учун замонавий спорт билан шуғулланиш имкониятини яратиб, уларнинг соғлом турмуш тарзига риоя этишлари, жисмоний фаоллиги ва мусобақалардаги иштирокини кучайтиришга туртки бўлади.

Мазкур лойиҳа самарасида, илгарилари мавжуд бўлмаган инфратузилма яратилиб, ёшлар учун янги имконият эшиклари очилди. Эндиликда мактаб жамоаси ва фаол ўқувчилар ушбу майдондан унумли фойдаланган ҳолда спорт йўналишидаги салоҳиятларини намоён этишлари мумкин.

Шоҳзод Қурбонбоев.