АМУДАРЁЛИК БИТИРУВЧИ ЁШЛАР ЎРТАСИДА “БЎЛАЖАК ЁШ МУҲАНДИСЛАР” ФАН ОЛИМПИАДАСИ ЎТКАЗИЛДИ

Мамлакатимизда умумтаълим мактаблари битирувчиларини ўзлари қизиққан соҳалар бўйича йўналтириш, уларнинг қизиқиш ва интилишларини қўллаб-қувватлаш ҳамда рағбатлантириш мақсадида амалга оширилаётган чора-тадбирлар туфайли билимдон, иқтидорли, ўзига ишончи баланд, интилувчан ёшлар сафи тобора ошиб бормоқда. Жорий 2024-2025 ўқув йилида умумий ўрта таълим мактабларининг 11-синф ўқувчилари ўртасида математика, физика ва кимё фанларига қизиқувчи ёшларнинг истеъдодларини ривожлантириш мақсадида ташкил этилган “Бўлажак ёш муҳандислар” фан олимпиадаси ҳам ана шундай қобилиятли ўқувчиларни ҳар томонлама қўллаб-қувватлашга қаратилгани билан муҳим аҳамият касб этмоқда.

Маълумки, Ўзбекистон Республикаси Президенти Ш.Мирзиёев раҳбарлигида 2024 йил 20 июнь куни кенгайтирилган тарзда ўтказилган “Муҳандислик соҳасида кадрлар тайёрлаш ва олий таълим муассасалари фаолиятини янада такомиллаштириш чора-тадбирлари тўғрисида”ги видеоселектор йиғилишининг 32-сонли баёнида олий таълим муассасаларнинг муҳандислик йўналишига қизиқиши юқори бўлган иқтидорли ёшларни танлаб олиш тизимини яратиш вазифаси белгилаб берилган эди. Унга кўра, ушбу вазифани бажариш бўйича Тошкент тўқимачилик ва енгил саноат институти ректори, Ўзбекистон Республикаси Савдо-саноат палатаси раиси Ваҳобов Даврон Абдужалолович раҳбарлигида Ўзбекистон Республикаси Мактабгача ва мактаб таълими вазирлиги билан ҳамкорликда Республика бўйлаб математика, физика ва кимё фанларидан “Бўлажак ёш муҳандислар” номли фан олимпиадаси туман, вилоят, Республика босқичларини ўтказиш ва шу орқали муҳандислик йўналишига қизиқиши юқори бўлган иқтидорли ёшларни жалб қилган ҳолда институтда олиб бориладиган таълим-тарбия жараёни ва таълим йўналишлари юзасидан тарғибот тишларини олиб бориш топширилган эди.

Президентимиз Фармонида белгиланган ушбу вазифалар ижросини таъминлаш мақсадида жорий йилнинг 8 апрель санасида Амударё туман Мактабгача ва мактаб таълими бўлими тасарруфидаги 1-сонли умумтаълим мактаби биносида 11-синф битирувчилари ўртасида “Бўлажак ёш муҳандислар” фан олимпиадасининг туман босқичи бўлиб ўтди.

Олимпиадага тумандаги 86 та умумий ўрта таълим мактабларидан ва ихтисослаштирилган мактабдан математика, физика ва кимё фанларига қизиқувчи 170 нафарга яқин иқтидорли ўқувчилар қатнашдилар.

“Бўлажак ёш муҳандислар” фан олимпиадасининг туман босқичи очилиш маросимида Қорақалпоғистон Республикаси Мактабгача ва мактаб таълими вазирлигининг Фан олимпиадаси бўйича Иқтидорли болалар билан ишлаш сектори методисти Захида Усенова, Тошкент тўқимачилик ва енгил саноат институти Олий математика ва компьютер графикаси кафедраси доценти Жасур Каримбоев, Амударё туман Мактабгача ва мактаб таълими бўлими бошлиғи Ялғашбой Шамуратов, Мактаблар фаолиятини мувофиқлаштириш шуъбаси методистлари Ҳабибулла Давлетяров ва Райҳон Якубова, олимпиада аудитория раҳбарлари, ҳакамлар, кузатувчилар иштирок этдилар.

Маросимида сўзга чиққан Амударё туман Мактабгача ва мактаб таълими бўлими бошлиғи Ялғашбой Шомуратов “Бўлажак ёш муҳандислар” фан олимпиадасини ўтказишдан кўзланган мақсад ва вазифалар ҳақида батафсил маълумот ва тушунчалар берди. Шундан сўнг Тошкент тўқимачилик ва енгил саноат институти Олий математика ва компьютер графикаси кафедраси доценти Жасур Каримбаев институт ҳақида тақдимот ўтказди.

Бугунги кунда талаб юқори бўлган замонавий мутахассисликларни тайёрловчи мазкур етакчи олий таълим муассасасида мавжуд факультетлар ва йўналишлар ҳақида атрофлича сўз юритилиб, институтда дуал таълим йўлга қўйилганлиги, талабалар ўқиш даврида ҳафта давомида 3 кун таҳсил олса, қолган 3 кунида ишлаб чиқариш корхоналарида 2 миллион сўмдан бошлаб ойлик маош олиб, ишлашлари, олган назарий билимларини амалиётда мустаҳкамлаш имконияти мавжудлиги алоҳида таъкидланди.

Бундан ташқари, институтда қўшма таълим ҳам мавжуд бўлиб, талабалар 2+2, 3+1, 2+2+1 дастури бўйича, яъни 2 ёки 3 йил мазкур институтда, 2 ёки 1 йил хорижда ўқиб, 2 та давлатнинг дипломига эга бўлишлари, қўшма таълим битирувчилари хорижда қулай шароитлардаги юқори маошли корхона ва ташкилотларга ишга жойлашиш имкониятига эга бўлишлари ҳақида батафсил маълумотларни тақдим этди.

Шундан сўнг “Бўлажак ёш муҳандислар” олимпиадасининг туман босқичи бошланди ва унда муҳандислик йўналишига қизиқувчи амударёлик ёшлар унда фаол иштирок этдилар.

Шаффофлик асосида ўтган олимпиада якунларига кўра, 40-, 25-сонли ва ихтисослашган мактаблар ўқувчилари совринли 1-, 2-, 3- ўринни эгалладилар ва олимпиаданинг Қорақалпоғистон Республикаси босқичига йўлланма олдилар. Ғолиб ўқувчиларга институт томонидан тегишли тартибда 700 000, 500 000, 300 000 сўмлик пулли ваучерлар тантанали равишда топширилди.

Маълумот учун: олимпиаданинг Республика босқичи ғолиблари учун қуйидаги совға ва ваучерлар бериш назарда тутилган:

1-ўрин учун ДАМАС автомобили;

2-ўрин учун 20 млн. сўм;

3-ўрин учун 10 млн. сўм.

Бу каби олимпиадалар ўтказилиши таълим муассасалари ўқувчилари орасидан математика, физика, кимё фанлари бўйича билимли, ушбу фанга қизиқувчи, интилувчан ва ижодкор ёшларни аниқлаш ҳамда уларнинг ижодий қобилиятларини рўёбга чиқаришга кўмаклашиш, қўллаб-қувватлаш, рағбатлантириш билан бирга Ўзбекистон Республикаси равнақи, келажаги учун ўз ҳиссасини қўшадиган ёшлар сафини янада ошириш имконини беради.

Робия Йўлдошева.