Амударёда V Республика китобхонлик ҳафталиги юқори савияда ўтди

Мамлакатимизда маънавият, маърифат ва мутолаа маданиятини юксалтириш, жамиятда китобга бўлган қизиқишни оширишга қаратилган ташаббуслар тобора кенг кўлам касб этмоқда. Ана шундай маънавий тарғиботнинг ёрқин ифодаси бўлган “Китобхонлик ҳафталиги” жорий йилнинг 21–27 апрель кунлари мамлакатимиз бўйлаб “Ўзбекистон – китобхонлар юрти” шиори остида юқори руҳда ўтказилди.

Китобхонликни тарғиб қилиш, китобга меҳр уйғотиш, аҳоли, айниқса, ёшларни мутолаага кенг жалб этиш мақсадида ташкил этилган мазкур ҳафталик давомида мамлакат бўйлаб кенг қамровли маданий-маърифий тадбирлар ташкил этилди. Улар орасида янги китоблар тақдимоти, китоб ярмаркалари, акция ва викториналар, маҳорат дарслари, ижодкорлар билан учрашувлар, “Ноширдан китобхонга” тамойили асосидаги савдо-ярмаркалар каби тадбирлар алоҳида ўрин тутди. Бундай тадбирлар орқали китобхонлар замонавий адабиёт, нашриёт фаолияти ҳамда ижодкорлар ҳаёти билан яқиндан танишиш имкониятига эга бўлишди.

Ҳафталик доирасида кейинги йилларда нашр этилган китоблар тақдимоти, таниқли ва ёш адиблар билан мулоқот, нашриёт ва матбаачилик соҳаси вакиллари иштирокида давра суҳбатлари ўтказилиб, умумий дастурнинг мазмундор ва манфаатли бўлишига хизмат қилди.

Айни шу кунларда Амударё тумани Ахборот-кутубхона марказида туманимизнинг ижодкорларидан бири, шоира Зулфия Оллаёрова билан учрашув ташкил этилди. Тадбирда зиёлилар, Амударё муҳандислик техникуми талабалари ҳамда умумтаълим мактабларидан ташриф буюрган китобхон ўқувчи-ёшлар фаол иштирок этди. Учрашувда китобнинг инсон маънавиятини юксалтиришдаги ўрни, ҳаётда мустаҳкам таянч сифатидаги аҳамияти хусусида фикрлар билдирилди.

Шу куни, шунингдек, Ўзбекистон халқ шоири Муҳаммад Юсуф таваллуд куни муносабати билан “Шеърларида Ватан тасвири” номли китоб кўргазмаси ҳам ташкил этилди. Шоир ижоди кенг тарғиб қилинган мазкур кўргазма китобхонларда миллий ғурур, ватанпарварлик туйғуларини уйғотди.

Китобхонлик ҳафталиги доирасида “Яхши китобларни бугун ўқинг” шиори остида “Манзилимиз – маънавият бекати” деб номланган интеллектуал ўйин ўтказилди. Туман ИИБнинг “Юристлар”, Амударё муҳандислик техникуми талабаларидан тузилган “Зукколар” ҳамда ёш китобхонлардан ташкил топган “Китобхонлар” жамоалари ўртасида бўлиб ўтган мазкур беллашувда иштирокчилар китобга оид билим ва фикрлаш қобилиятида ўзаро куч синашишди. Ғолиблар ахборот-кутубхона маркази томонидан эсдалик совғалар билан тақдирланди.

Бундан ташқари, “Маҳалла – оила – кутубхона”, “Маърифатпарвар аёллар”, “Бугунги ёшлар ва ижод: адабиётга қанчалар яқинмиз?” каби давра суҳбатлари, “Адабий устахона” маҳорат дарслари, “Табиат қўйнида мутолаа – китобтерапия” сингари тренинглар ҳамда “Яшил макон” лойиҳаси доирасида китоб ва атроф-муҳит муносабатига бағишланган маърифий чиқишлар ҳам ташкил этилди.

Китобхонлик ҳафталиги доирасида фаол иштирок этган китобхонлар, ёш мутахассислар, талабалар ҳамда тадбир ташкилотчилари ахборот-кутубхона маркази маъмурияти томонидан эсдалик совғалар ва ташаккурномалар билан тақдирланди.

Мазкур ҳафталик болалар ва ёшларда китобга қизиқиш уйғотиш, уларнинг бўш вақтини мазмунли ўтказиш, ижодий ва танқидий фикрлаш қобилиятини шакллантиришда муҳим аҳамият касб этди. Энг муҳими, китобни ҳаёт тарзига айлантириш, китобхонлар сафини кенгайтиришда бундай тадбирлар катта аҳамиятга эга. Зеро, китоб бор жойда маърифат бор, маърифат бор жойда эса тараққиёт ва инсон камолоти сари йўл очиқдир.

Ш. Оллаберганова, туман ахборот-кутубхона маркази мутахассиси.