Бўш иш ўринлари ярмаркасида 30 нафар фуқаро доимий ишга жойлаштирилди

Аҳоли бандлигини таъминлаш жамиятнинг осойишталиги ва барқарорлигида муҳим ўрин тутади. Шу боис, ишсизликни камайтириш, фуқароларни муносиб иш ўринлари билан таъминлаш ва уларнинг меҳнат бозорида фаол иштирокини қўллаб-қувватлаш мақсадида мамлакатимизда тизимли ишлар амалга оширилмоқда.

Аҳоли бандлигини ошириш ва ишсизликни камайтиришга қаратилган кенг кўламли чора-тадбирлар доирасида яқинда Ўзбекистон Маҳаллалар уюшмаси туман бўлими биносида ташкил этилган меҳнат ярмаркаси аҳоли учун янги иш имкониятларини яратишда муҳим ўрин тутади. Амударё тумани ҳокимлиги, туман Камбағалликни қисқартириш ва бандликка кўмаклашиш бўлими ҳамда Амударё муҳандислик технологиялари техникуми ҳамкорлигида ўтказилган тадбирда тумандаги 33 та корхона ва ташкилот 175 та бўш иш ўрни билан қатнашди.

Тадбирда туман прокурори ёрдамчиси Санжар Абдуллаев, Амударё муҳандислик технологиялари техникуми директори Шуҳрат Матирзаев, туман ИИБ ҳузуридаги Пробация бўлими бошлиғи Руслан Искандаров, шунингдек, қатор ҳамкор ташкилотлар ва тижорат банклари вакиллари қатнашди.

Шу билан бирга, меҳнат бозорида ўз ўрнини топиш истагида бўлган 62 нафар ишсиз фуқаро, пробация ҳисобидаги шахслар, алимент тўловчилар, ногиронлиги бўлган шахслар ҳамда таълим муассасаларининг битирувчи ёшлари ҳам меҳнат ярмаркасида фаол иштирок этди.

Тадбирни туман Камбағалликни қисқартириш ва бандликка кўмаклашиш бўлими бошлиғи ўринбосари Баҳодир Балтабаев кириш сўзи билан очиб, бу каби тадбирларнинг аҳоли бандлигини таъминлашда тутган ўрни, янги иш ўринлари яратиш ва фуқароларни фаол меҳнат бозорига жалб қилишдаги аҳамияти ҳақида тўхталиб ўтди. Шундан сўнг, Амударё муҳандислик технологиялари техникуми директори Шуҳрат Матирзаев сўзга чиқиб, техникумдаги мавжуд таълим йўналишлари ва касб-ҳунар ўқув курслари ҳақида батафсил ахборот берди. Касбий малака ошириш орқали ишга жойлашиш имкониятлари алоҳида таъкидланди.

Ярмаркада Амир Темур овул фуқаролар йиғини ҳоким ёрдамчиси Темур Оллоберганов сўзга чиқиб, давлат томонидан аҳоли бандлигини таъминлаш борасида яратилаётган шарт-шароитлар, субсидиялар, имтиёзли кредитлар ва ссудалар ҳақида маълумот берди.

Меҳнат ярмаркасида туман Камбағалликни қисқартириш ва бандликка кўмаклашиш бўлими ходимлари томонидан иштирокчиларга қатор амалий ёрдамлар кўрсатилди. Жумладан, бўш иш ўринлари ҳақида маълумотлар, ишга жойлашиш, касб-ҳунарга ўқиш, хорижда ишлаш имкониятлари ва меҳнат ҳуқуқлари бўйича ҳуқуқий маслаҳатлар берилди.

Ярмарка давомида 30 нафар фуқаро, жумладан, 1 нафар ногиронлиги бўлган шахс, 2 нафар меҳнат муҳожири, 3 нафар таълим муассасалари битирувчиси ҳамда 24 нафар ишсиз фуқаро доимий ишга жойлаштирилди. Шунингдек, 2 нафар ишсиз фуқаро касб-ҳунарга ўқишга йўналтирилди. Бундан ташқари, бўлим ходимлари томонидан тадбир иштирокчиларига ишга жойлашиш, касб-ҳунар ва тадбиркорликка ўқитиш, хорижда ишга жойлашиш ҳамда меҳнат ҳуқуқлари бўйича ҳуқуқий маслаҳатлар берилди.

Бўш иш ўринлари ярмаркаси аҳоли бандлигини таъминлаш ва янги иш ўринларини яратиш борасида амалга оширилаётган тизимли ишлар самарадорлигини намоён этгани билан аҳамиятли бўлди.

Шоҳзод Қурбонбоев.