9-сонли Болалар мусиқа ва санъат мактабида ўқув йили якунига бағишланган тадбир бўлиб ўтди

Амударё туманидаги 9-сонли Болалар мусиқа ва санъат мактабида 2024–2025 ўқув йили якунига бағишланган ҳисобот концерти ҳамда тасвирий ва амалий санъат йўналишида ўқувчилар ижодидан ташкил этилган кўргазма бўлиб ўтди. Тадбир йил давомида эришилган ютуқларни кенг жамоатчилик эътиборига ҳавола этиш, шунингдек, ёш ижодкорлар иқтидорини ота-оналар ва устозлар олдида намоён этиш имконини берди.

Мазкур мусиқа ва санъат мактаби тумандаги ёш авлодга мусиқа ва санъат соҳалари бўйича билим бериш, уларни ижодий муҳитга жалб этиш борасида самарали фаолият олиб бормоқда. Жорий ўқув йилида мактабда жами 200 нафар ўқувчи 11 та йўналиш бўйича таълим олди. Уларнинг 150 нафари мусиқа, 50 нафари эса тасвирий санъат йўналишларида билимларни ўзлаштирди.

Мактабда дарслар тажрибали устозлар томонидан олиб борилади. Таълим жараёнларига замонавий методлар, интерактив машғулотлар ва индивидуал ёндашувлар жорий қилинган. Бундан ташқари, ўқувчиларнинг ижодий салоҳиятини намоён этиш мақсадида ҳар хил концертлар, кўргазмалар ва танловларда иштирок этишлари таъминлаб келинмоқда.

Йил давомида болалар чолғу асбобларини чалиш, куйлаш, рақс, рассомлик, ҳайкалтарошлик ва саҳна санъати сирларини ўрганиб, ҳисобот концерт ва кўргазмада ўз билимларини намоён этдилар. Тадбир мактабда олиб борилаётган таълим-тарбия жараёнининг амалий натижаси сифатида иштирокчилар ва меҳмонларда катта таассурот қолдирди.

Айниқса, тадбирга келишган ота-оналар фарзандларининг ижодий юксалишига гувоҳ бўлиб, уларнинг қобилияти ва ижодий билимларидан фахрланишди. Бундай тадбирлар орқали оила ва мактаб ўртасидаги ҳамкорлик мустаҳкамланмоқда. Бу эса болаларнинг янада масъулиятли ва шижоатли бўлишига ижобий таъсир кўрсатади.

Мусиқа ва санъат таълими болаларнинг эстетик диди, ҳис-туйғуси ва фикрлаш қобилиятини ривожлантириб, уларнинг ички дунёсини бойитади, маънавий камолотига хизмат қилади, зеҳн ва қалб уйғунлигини таъминлайди. Мактабда фортепиано, скрипка, виолончель, дутор, рубоб, ғижжак, доира каби чолғу асбоблари, шунингдек, вокал ва хор каби мусиқа йўналишлари бўйича дарслар ташкил этилган.

Тасвирий санъат йўналишида эса ўқувчилар қалам, бўёқ ва график чизмачилик, ҳайкалтарошлик ҳамда амалий ва график дизайн асосларини ўзлаштирдилар. Саҳна санъати бўйича ҳам актёрлик маҳорати, драма, миллий ва замонавий рақс турлари, балет, саҳнавий нутқ каби дарслар ўқитилди. Бу каби имкониятлар болаларнинг ижодий имкониятларини шакллантиришда муҳим аҳамият касб этади.

Ҳисобот концерт дастурида хореография, баян-аккордеон, торли-камонли ва нафасли чолғу асбоблари, анъанавий ижро ва эстрада йўналишларида таълим олган ўқувчилар куй-қўшиқ ва рақслар орқали томошабинларга хуш кайфият улашдилар.

Концерт дастурида ўзбек ва қорақалпоқ халқ бастакорлари асарлари билан бир қаторда жаҳон мусиқа асарлари ҳам устоз-шогирд ҳамкорлигида ансамбль тарзида ижро этилди.

Концерт якунида мактаб директори Тўлибой Хайтбоев сўзга чиқиб, фарзандларини қўллаб-қувватлаётган ота-оналарга миннатдорлик билдирди. Шу билан бирга, йил давомида самарали меҳнат қилган ва ҳар бир ўқувчининг ижодий ўсишига ҳисса қўшган устозларга чуқур ташаккур изҳор этди.

Мактаб директори томонидан ўқувчиларнинг концерт дастуридаги чиқишлари юксак баҳоланди ва бу ютуқлар уларнинг санъатга бўлган иштиёқи ҳамда устозларнинг меҳнати самараси экани таъкидланди.

Тадбир давомида “Мумтоз наволар”, “Устоз изидан”, “Миллий рақс жилоси” номли синф концертларида ҳамда мактаб миқёсида ўтказилган бошқа ижодий лойиҳаларда фаол иштирок этган ўқувчилар мактаб маъмурияти томонидан фахрий ёрлиқ ва эсдалик совғалари билан тақдирландилар.

Шунингдек, республика миқёсида ташкил этилган “Халқ чолғулари ва анъанавий чолғу” ҳамда “Эстрада чолғу ижрочилиги” танловларида ғолиб бўлган ўқувчилар ва уларнинг мутахассис ўқитувчилари “Ташаккурнома” ва эсдалик совғалари билан тақдирланди.

9-сонли Болалар мусиқа ва санъат мактабида ўтказилган ҳисобот концерти ва кўргазма — ёш авлоднинг маънавий, эстетик ва ижодий ривожланишида муҳим аҳамиятга эга бўлган тадбир бўлди. Тадбир нафақат жамоанинг ўқув йили якунидаги ҳисоботи бўлди, балки болаларнинг истеъдоди, меҳнати ва муваффақиятини кенг жамоатчиликка намоён этди.

Шоҳзод Қурбонбоев