Амударё туманида аҳолини кўмир билан таъминлашда муҳим қадам – Жумуртов темирйўл станцияси ишга туширилди

Аҳоли учун куз-қиш мавсумларида барқарор ва сифатли иссиқлик манбаига эга бўлиш муҳим масала саналади. Айниқса, қишлоқ жойларида яшовчи истеъмолчиларни кўмир билан ўз вақтида ва узлуксиз таъминлаш димий долзарб масала. Бу борада эса инфратузилманинг ўрни алоҳида.

Амударё туманига кўмир дарёнинг ўнг қирғоғида жойлашган махсус базадан келтирилар эди. Бу эса айни қиш мавсумида дарёдан ўтишда маълум қийинчиликларни, ортиқча оворагарчиликларни келтириб чиқарар эди. Эндиликда бу муаммога барҳам берилиб, туманнинг Жумуртов шаҳарчасида янги темирйўл станцияси ва кўмир етказиб бериш маркази ишга туширилди.

Мазкур станциянинг ишга туширилиши туманнинг ёқилғи таъминоти занжирида узлуксизликни таъминлаш, вақт ва масофани тежашда муҳим роль ўйнайди. Эндиликда кўмир темирйўл орқали тўғридан-тўғри Жумуртовга етказиб берилади, бу эса автомобиль транспортига бўлган юкламани, йўллардаги тирбандлик ва харажатларни камайтиришга хизмат қилади.

Янги станция очилиши билан аҳолига кўмирни узоқ масофалардан ташиб келиш зарурати йўқолди. Энди фуқаролар ўз ҳудудларига яқин манзилдан, транспорт учун камроқ пул сарфлаб сифатли кўмир харид қилиш имкониятига эга.

Маълумот ўрнида айтиш жоизки, амударёлик истеъмолчиларга кўмир маҳсулоти “Кўмир таъминоти” МЧЖнинг Қорақалпоғистон Республикаси филиалига қарашли омбордан етказиб берилади. 2025-2026 йиллар куз-қиш мавсумида бюджет ташкилотлари учун 6 минг 153 тонна кўмир маҳсулотлари етказиб бериш режалаштирилган. Шундан ҳозирги кунда 279 тонна кўмир қабул қилиб олинган ва тарқатиш ишлари бошланмоқда. Шунингдек, аҳоли учун 2025-2026 йиллар куз-қиш мавсумида 27 минг 706 тонна кўмир олиб келиш режалаштирилган.

Янги станциянинг иш бошлаши маҳаллий иш ўринларини яратишга ҳам хизмат қилмоқда. Юк тушириш, сақлаш ва тарқатиш жараёнларида ўнлаб маҳаллий аҳоли иш билан таъминланмоқда. Бу эса иқтисодий фаолликни ошириб, ижтимоий барқарорликка ҳисса қўшмоқда.

Янги тизим орқали етказиб бериладиган кўмир маҳсулоти сифат жиҳатидан назорат қилинади. Тақсимот жараёнларида шаффофлик, адолат ва самарадорлик тамойиллари асосида иш олиб борилади.

Жумуртов шаҳарчасида кўмир етказиб берувчи темирйўл станциясининг ишга туширилиши – бу аҳолини барқарор иссиқлик билан таъминлаш ва ҳудудий инфратузилмани ривожлантириш йўлидаги муҳим қадамлардан биридир. Аҳолининг кўплаб оворагарчилик ва сарсон-саргардонликларига барҳам берилиб, муаммолари бартараф қилинмоқда. Кўмирни узоқ масофалардан олиб келиш, нархнинг сунъий ошиши, етказиб беришда юзага келадиган кечикишлар каби муаммолар аҳолининг кундалик ҳаётига сезиларли таъсир кўрсатиб келаётган эди. Эндиликда бу муаммолар ортда қолмоқда.

Бугун Жумуртов шаҳарчасида ва бутун туманимизда яшовчи аҳоли йиллар давомида йиғилиб қолган муаммонинг ҳал бўлганидан мамнун. Эндиликда ҳар бир хонадон, ҳар бир ижтимоий муассаса куз-қиш мавсумига тайёргарлик кўришда ишончли таъминот тизимига эга.

Чарос Арслонова, туман ҳокимлигининг Ахборот хизмати раҳбари.