Кутубхона — сокинлик макони

Ҳар бир инсоннинг қалбига яқин, ўзгача хотиржамлик бағишлайдиган, илҳом оладиган жойи бўлади. Кимдир табиат қўйнидаги дам олиш масканини ёқтирса, яна кимдир ёлғиз қолиб вақт ўтказишни афзал билади. Менинг эса энг севимли жойим – бу кутубхона. У ерга кирганимда, қалбимда таскин, маънавий юксалиш ва билимга чанқоқлик туйғулари уйғонади.

Маҳалламиздаги кутубхона катта эмас, аммо у ўзининг мазмунан бой китоб фонди, шинам ва мафтункор муҳити билан қалбимдан алоҳида ўрин олган. Бу ерда адабиёт, тарих, фалсафа, табиий фанлар, психология ва болалар учун мўлжалланган асарлардан тортиб, замонавий муаллифлар қаламига мансуб романлар, эсселаргача мавжуд. Жавонлар орасида юрар эканман, гўё бутун бир маънавий оламни айланиб чиққандек бўламан. Китобларнинг сирли дунёсида сайр қилиш инсонни нафақат билим билан бойитади, балки ҳаёти, ҳис-туйғулари, мақсадлари ҳақида ўйлашга, ўзини англашга чорлайди.

Кутубхонадаги осойишталик — унинг энг гўзал жиҳатларидан бири. Ҳар бир саҳифанинг “шивирлаши”, пичир-пичир товушлар, юмшоқ қадамлар, эҳтиёткор ҳаракатлар – буларнинг барчаси бу жойга хос тинч муҳитни яратади. Ўқиш учун ажратилган столлар ёнида ўтириб, секинлик билан китоб варақлаш, унинг ҳар бир сатридан илҳом олиш мен учун чинакам руҳий озуқа ҳисобланади. Айниқса, қиш фаслида, ташқарида ёмғир ёғиб турган бир пайтда иссиқ ва ёруғ хоналарда, китоблар бағрида ўтириш — беқиёс бахт!

Кутубхона мен учун фақат ўқиш жойи эмас, балки у руҳий тарбия мактаби, фикрлашни ўргатувчи, тасаввурни кенгайтирувчи, келажак ҳақидаги орзуларим қанот боғлайдиган маскандир. У ҳар гал менга янги саҳифаларни очади — янги ғоялар, янги қаҳрамонлар, ҳаёт ҳақиқатлари билан таништиради. Кутубхонада ўқилган ҳар бир китоб менга ҳаёт ҳақидаги тушунчамни кенгайтирди, дунёқарашимни бойитди.

Мен учун кутубхона — бу шунчаки бино ёки китоблар тўплами эмас. У — қалбимнинг сокинлиги, руҳимнинг озуқа манбаи, билим йўлидаги содиқ йўлдошимдир. У ерда мен жимлик бағрида ўзимни топаман, хаёл қиламан, катта орзулар сари учаман. Шу боис, мен кутубхонани севиб қадрлайман.

Дилдора Уринова, ЎзДЖТУ Халқаро журналистика факультети талабаси.