“БАРКАМОЛ АВЛОД” БОЛАЛАР МАКТАБИ ЎҚУВЧИЛАРИ ТАНИҚЛИ ШОИР ВА ЁЗУВЧИЛАР БИЛАН УЧРАШДИЛАР

Бир шеърият даврасида Аллоҳ раҳмат қилсин, ҳурматли устозим, таниқли адабиётшунос олим, Ўзбекистон Қаҳрамони Озод Шарофиддинов: “... Шеър – ижтимоий ҳодиса, унинг ҳар бир сатри юракда туғилиб, юракда улғаяди ва шеъриятга ошно миллионлаб қалбларни тарбиялайди, инсонлар ҳаётига жўшқинлик олиб киради”, – деган эдилар. Ҳақиқатдан ҳам, шеър ўқилган давраларда руҳий кўтаринкилик, тингловчилар қалбларида жўшқинлик, кўзларида меҳр, ҳаётга ташналик ҳисси устувор бўлади.

Шунданми, таниқли ижодкор, Ўзбекистон Ёзувчилар уюшмаси аъзоси, Амударё туман Мактабгача ва мактаб таълими бўлими тасарруфидаги “Баркамол авлод” болалар мактаби директори Хонимжон опа Ражабова ҳам ижодкор-шоира, ҳам муассаса раҳбари сифатида мактабнинг барча йўналишлардаги тўгаракларида шуғулланаётган ўқувчи-ёшларнинг мамлакатимиздаги таниқли ижод аҳли билан учрашувлари, давра суҳбатлари, бири-биридан жўшқин шеърият кечаларини ташкиллаштиришни хуш кўради.

Ўзбекистон ёзувчилар уюшмаси раиси, Ўзбекистон халқ шоири Сирожиддин Саййид, “Олтин қалам” миллий мукофоти соҳибаси, Ўзбекистонда хизмат кўрсатган маданият ходими, таниқли шоира Зулфия Мўминов, Ўзбекистонда хизмат кўрсатган маданият ходими, жўшқин публицист ва шоира Муҳтарама Улуғовалар мактаб ўқувчилари билан чинакам самимий ва фахрий дўстлар каби қадрдонлашиб кетишганидан аёнки, ижодкорлар билан учрашувлар нафақат ўқувчи-ёшлар, балки педагогика жамоаси учун ҳам ҳақиқий маънавият ва маърифат мактабидир.

Ёз фаслининг илк кунлариданоқ муҳтарам Президентимиз ташаббуси билан мамлакатимиз бўйлаб кенг қулоч ёйган “Долзарб 90 кун” лойиҳаси доирасида бошланиб кетган маънавий-маърифий ва кўнгилочар тадбирлар “Баркамол авлод” болалар мактаби ўқувчилари учун бири-биридан қизиқарли, ёрқин таассуротларга бой тарзда, жўшқинлик билан давом этмоқда.

Мактаб ўқувчиларининг қўл меҳнатлари маҳсули бўлган ранг-баранг гуллар, робототехника тўгараги аъзоларининг қизиқишлари ва иқтидорларини ўзида мужассам этган ихтирочилик намуналари, бири-биридан ёқимтой юмшоқ ўйинчоқлар тўплами, ҳайкалтарошлик ва дизайнерлик намуналари билан безатилган мактаб фойесиданоқ муассаса таҳсилини олаётган болалар орасида ҳақиқий ижодга мойил баркамол авлод вояга етаётганини англаш қийин эмас.

Ижодий гуруҳимиз билан 12 июнь куни мактабда ташкил этилган “Биз шеъриятга ошномиз” мавзусидаги учрашув жараёнида Амударё туман Мактабгача ва мактаб таълими бўлими тасарруфидаги умумтаълим мактаблари ўқувчиларининг ёзги таътил кунлари “Баркамол авлод” болалар мактаби тўгаракларида янада мароқли ўтаётганининг гувоҳи бўлдик.

Шу куни мактаб ўқувчилари билан Ўзбекистон Ёзувчилар уюшмаси аъзоси, таниқли шоир ва ёзувчи Турсунбой ота Абдуллаев ҳамда Ўзбекистон Ёзувчилар уюшмаси аъзоси, Қорақалпоғистон Республикасида хизмат кўрсатган журналист, шоира Робия Йўлдошевалар дилдан, самимий мулоқотда бўлдилар.

Учрашувни муассаса раҳбари Хонимжон Ражабова ҳам шеърий, ҳам насрий нутқи билан жуда гўзал ва ёқимли тарзда олиб борди. У ўқувчи ёшларга илмнинг хосияти, касбга меҳр туфайли инсон ўз умри давомида эришадиган ютуқлари ҳақида ўз ҳаёт йўлидан мисоллар келтириш орқали илм ва ҳунар инсонни ҳар томонлама юксалтирувчи омил эканлигини алоҳида таъкидлади.

Шундан сўнг Турсунбой Абдуллаев ва Робия Йўлдошевалар ўқувчи-ёшларга ўзларининг она Ватанни мадҳ этувчи янги шеърларидан ўқиб бердилар. Устоз-шогирд анъанаси, ўзаро меҳр-оқибат, инсонпарварлик, китобхонлик одамнинг энг гўзал фазилати эканлиги хусусида сўз юритишиб, болаларни ана шундай эзгу фазилатлар соҳиби бўлишга даъват этдилар.

“Биз шеъриятга ошномиз” учрашув тадбири давомида муассасанинг “Ёш журналист ва нотиқ” тўгараги аъзолари ўзлари ёзган шеърларидан намуналар ўқиб беришди. “Шўх болалар” бадиий ҳаваскорлик жамоаси аъзоларининг чиқишлари эса ҳар бир иштирокчи учун қувноқ ва жўшқин кайфият бағишлади. Самимий ва дилдан суҳбат, шеър-у шуур, ватанпарварликни мадҳ этувчи куй-қўшиқлар тадбирга ажиб жўшқинлик, қалбларга қувонч бағишлади.

Ёзги таътил даврининг ҳар бир кунини бири биридан қизиқарли тўгараклар машғулотларида иштирок этиш орқали ажиб ижодкорлик муҳитида иқтидор ва қобилиятларини амалда намоён этиб, ўз ҳаётларига маъно-мазмун бағишлаб, шеъриятга, маънавиятга ошно ҳолда ўтказаётган болаларга, тўғриси, чин дилдан ҳавас қилдик.

Робия Йўлдошева.