Амударё туманида ҳайвонларни идентификация қилиш ва рўйхатга олиш ишлари сифатли амалга оширилмоқда

Ўзбекистон Республикасида чорвачилик соҳасини замонавий стандартларга мослаштириш ва халқаро талабларга жавоб берадиган тизимни жорий этиш мақсадида 2025 йил 6 августда “Ҳайвонларни идентификация қилиш, рўйхатга олиш ва кузатиш тўғрисида”ги Қонун қабул қилинди. Ушбу қонун мамлакатимиз чорвачилик соҳасида тарихий аҳамиятга эга бўлган ҳужжат ҳисобланади ва иқтисодиётнинг муҳим тармоғини янги ривожланиш босқичига олиб чиқишга қаратилгани билан аҳамиятлидир.

Қонунинг асосий мақсади Ўзбекистон ҳудудида жисмоний ва юридик шахслар томонидан сақланадиган ҳамда кўпайтирилаётган барча ҳайвонларни белгиланган тартибда идентификация қилиш ва рўйхатга олишдан иборат. Бу тизим орқали ҳар бир ҳайвоннинг келиб чиқиши, соғлиғи, махсулдорлиги ва ҳаракати ҳақида тўлиқ маълумот олиш мумкин бўлади.

Ҳайвонларни идентификация қилиш чорвачилик маҳсулотларининг сифатини назорат қилиш, касалликларнинг тарқалишини олдини олиш ва экспорт салоҳиятини ошириш учун ҳам муҳим аҳамият касб этади. Шунингдек, бу тизим фермерларга ўз қарамоғидаги ҳайвонларни самарали бошқариш ва уларнинг иқтисодий самарадорлигини ошириш имконини беради.

Қонун асосида Амударё туманида ҳам қатор амалий ишлар қилинмоқда. Ҳозирги кунга қадар туманда 10 минг 167 бош қорамол муваффақиятли идентификация қилинди. Бу рақам маҳаллий чорвачилик соҳасида қонуннинг қанчалик тез ва самарали амалга оширилаётганини кўрсатади.

Туманнинг Тўлқин овулида фаолият юритаётган “Илҳом Шоҳруҳ” фермер хўжалигида ҳам қорамолларни идентификация қилиш ва рўйхатга олиш ишлари сифатли тарзда бажарилди. Ушбу хўжалик Белорусь Республикасидан 98 бош “Лимузин” ва “Ангус” зотли сигирларни импорт қилган бўлиб, уларни амалдаги ветеринария-санитария талабларига риоя қилган ҳолда сифатли парвариш қилмоқда. Қорамоллар мунтазам равишда ветеринария кўригидан ўтказилаётгани ва эмлаш ишлари ўз вақтида амалга оширилаётгани уларнинг соғлом ривожланишида муҳим омил бўлмоқда. Бу тажриба бошқа фермер хўжаликлари учун намуна бўлиб хизмат қилиши шубҳасиз.

Айтиш жоизки, қонунга мувофиқ Қорамол, қўйлар, эчкилар ва туялар туғилганидан ўн тўрт кундан кейин, отлар туғилганидан тўрт ойдан кейин, итлар ва мушуклар эса туғилганидан уч ойдан кейин идентификация қилиниши ҳамда рўйхатга олиниши лозим.

Сақлаш ёки кўпайтириш мақсадида Ўзбекистон Республикаси ҳудудига олиб кириладиган ҳайвонлар эса олиб кирилган санадан эътиборан йигирма бир кундан кечиктирмай идентификация қилиниши керак. Ўзбекистон Республикасида сақланадиган ва кўпайтириладиган ҳайвонлар сўйилган, нобуд бўлган ёки Республика ҳудудидан ташқарига олиб чиқилган тақдирда етти кунлик муддатда ҳисобдан чиқарилади.

Янги қонуннинг қабул қилиниши мамлакатимизда чорвачилик соҳасининг ривожланишида муҳим қадам ҳисобланади. Бу тизим орқали маҳсулот сифатини ошириш, халқаро бозорларга чиқиш имкониятларини кенгайтириш ва фермерларнинг иқтисодий фаолиятини янада яхшилаш мумкин бўлади. Келажакда бу қонун асосида чорвачилик соҳасида рақамли технологияларнинг кенг жорий этилиши ва замонавий бошқарув тизимларининг яратилиши кўзда тутилган.