Янги ҳаёт бағишлаб: Нукусда туғма юрак нуқсони бўлган болалар учун бепул тиббий кўрик ва жарроҳлик амалиёти ўтказилмоқда

Сўнгги йилларда мамлакатимизда тиббиёт соҳасини ислоҳ қилиш ва аҳолига кўрсатилаётган тиббий хизмат сифатини ошириш борасида кенг кўламли ишлар амалга оширилмоқда. Янги тиббиёт марказларининг очилиши, мавжудларининг энг замонавий ускуналар билан жиҳозланиши, шифокорлар малакасининг мунтазам ошириб борилиши – буларнинг барчаси инсон саломатлигини асрашдек эзгу мақсадга қаратилган.

Айниқса, оналар ва болалар саломатлигини муҳофаза қилиш, келажак авлоднинг соғлом ва баркамол улғайишини таъминлаш давлатимиз сиёсатининг энг устувор йўналишларидан бирига айланди. Ана шундай эътибор ва ғамхўрликнинг амалдаги ёрқин ифодасини Қорақалпоғистон Республикасида ўтказилган хайрия акцияси мисолида ҳам яққол кўриш мумкин.

Туғма юрак нуқсони – бу минглаб оилаларнинг тинчини бузадиган, ота-оналар қалбига доимий хавотир соладиган жиддий ташхис. Бироқ, замонавий тиббиёт бу касалликни ҳукм деб ҳисобламайди. Вақтида қўйилган ташхис ва тўғри ташкил этилган даволаш чоралари боланинг соғлом ҳаётга қайтиши учун улкан имконият яратади. Шу ўринда мунтазам тиббий кўрикнинг аҳамияти беқиёсдир. Айнан профилактик кўриклар туғма юрак нуқсонини эрта аниқлаш ва унинг ривожланиб кетишининг олдини олиш имконини беради. Касаллик қанча эрта аниқланса, уни даволаш шунча осон ва самарали кечади. Бу ўз навбатида боланинг жисмоний ва ақлий ривожланишида нуқсонлар пайдо бўлишига йўл қўймайди, уни тенгдошлари қаторида соғлом ўсишини таъминлайди.

Яқинда академик Воҳидов номидаги Республика ихтисослаштирилган жарроҳлик марказининг етакчи кардиохирург-шифокорлари томонидан Қорақалпоғистон тиббиёт институти клиникасида ўтказилган “Болаларга янги ҳаёт бағишлаймиз” номли акция фикримизнинг яққол далилидир.

18-23 август кунлари бўлиб ўтадиган ушбу тадбир доирасида туғма юрак нуқсони бор болалар бепул тиббий кўрикдан ўтказилиши кўзда тутилган. Энг муҳими, жарроҳлик амалиётига муҳтож деб топилган ўнлаб болаларнинг операцияси ҳам шу ернинг ўзида, ҳеч қандай тўловларсиз амалга оширилди. Бундай юқори технологик операцияларнинг Тошкентда эмас, айнан Нукус шаҳрида ўтказилиши олис йўл босиб пойтахтга боришга қийналган оилалар учун катта енгиллик бўлди.

Нукуслик она Алима Ўтемуратованинг қувонч ёшлари билан айтган миннатдорчилик сўзлари бутун тадбирнинг моҳиятини очиб беради. Узоқ йиллар фарзандининг дарди билан яшаган оила учун бу кун янги ҳаёт ва умид эшикларини очди. Бу каби эзгу ташаббуслар нафақат болажонларнинг ҳаётини асраб қолмоқда, балки минглаб ота-оналарга куч ва ишонч бағишламоқда.

Айтиш жоизки, туғма юрак нуқсони – бу боланинг она қорнида ривожланиш даврида юрак тузилишида пайдо бўладиган нуқсондир. Бу касаллик дунёда энг кўп учрайдиган туғма нуқсонлардан бири ҳисобланади ва ҳар 100 та янги туғилган чақалоқдан биттасида учрайди.

Туғма юрак нуқсонлари турли хил бўлиши мумкин: юрак тўсиқларида тешик, юрак қопқоқларининг нотўғри ишлаши, юрак томирларининг нотўғри жойлашуви ёки ривожланмаслиги шулар жумласидандир. Баъзи нуқсонлар енгил бўлиб, болани безовта қилмайди ва ўз-ўзидан тузалиши мумкин. Бироқ, оғир шаклларида бола нафас олишда қийналади, тез чарчайди, кўкариб қолади ва нормал ривожлана олмайди.

Касалликнинг сабаблари ҳам турлича: ирсий омиллар, ҳомиладорлик давридаги инфекциялар, дори-дармонларнинг нотўғри қўлланилиши, экологик омиллар касаллик пайдо бўлишига таъсир кўрсатиши мумкин. Энг муҳими – вақтида ташхис қўйиш ва даволашдир. Замонавий кардиохирургия кўпгина туғма юрак нуқсонларини муваффақиятли даволаш имконини беради. Эрта аниқланган ва тўғри даволанган болалар тўлақонли соғлом ҳаёт кечира олади.

Қорақалпоғистон тиббиёт институти клиникасида пойтахтлик ва маҳаллий шифокорларнинг ҳамкорликда амалга ошираётган тиббий кўрик ва жарроҳлик амалиётлари келгусида Оролбўйида ҳам тиббий хизмат сифатини янада юксалтиришга хизмат қилади. Зеро, ҳар бир бола соғлом яшашга ҳақли ва бу йўлдаги саъй-ҳаракатлар асло тўхтамайди.