Yangi hayot bagʻishlab: Nukusda tugʻma yurak nuqsoni boʻlgan bolalar uchun bepul tibbiy koʻrik va jarrohlik amaliyoti oʻtkazilmoqda

Soʻnggi yillarda mamlakatimizda tibbiyot sohasini isloh qilish va aholiga koʻrsatilayotgan tibbiy xizmat sifatini oshirish borasida keng koʻlamli ishlar amalga oshirilmoqda. Yangi tibbiyot markazlarining ochilishi, mavjudlarining eng zamonaviy uskunalar bilan jihozlanishi, shifokorlar malakasining muntazam oshirib borilishi – bularning barchasi inson salomatligini asrashdek ezgu maqsadga qaratilgan.

Ayniqsa, onalar va bolalar salomatligini muhofaza qilish, kelajak avlodning sogʻlom va barkamol ulgʻayishini taʼminlash davlatimiz siyosatining eng ustuvor yoʻnalishlaridan biriga aylandi. Ana shunday eʼtibor va gʻamxoʻrlikning amaldagi yorqin ifodasini Qoraqalpogʻiston Respublikasida oʻtkazilgan xayriya aktsiyasi misolida ham yaqqol koʻrish mumkin.

Tugʻma yurak nuqsoni – bu minglab oilalarning tinchini buzadigan, ota-onalar qalbiga doimiy xavotir soladigan jiddiy tashxis. Biroq, zamonaviy tibbiyot bu kasallikni hukm deb hisoblamaydi. Vaqtida qoʻyilgan tashxis va toʻgʻri tashkil etilgan davolash choralari bolaning sogʻlom hayotga qaytishi uchun ulkan imkoniyat yaratadi. Shu oʻrinda muntazam tibbiy koʻrikning ahamiyati beqiyosdir. Aynan profilaktik koʻriklar tugʻma yurak nuqsonini erta aniqlash va uning rivojlanib ketishining oldini olish imkonini beradi. Kasallik qancha erta aniqlansa, uni davolash shuncha oson va samarali kechadi. Bu oʻz navbatida bolaning jismoniy va aqliy rivojlanishida nuqsonlar paydo boʻlishiga yoʻl qoʻymaydi, uni tengdoshlari qatorida sogʻlom oʻsishini taʼminlaydi.

Yaqinda akademik Vohidov nomidagi Respublika ixtisoslashtirilgan jarrohlik markazining yetakchi kardioxirurg-shifokorlari tomonidan Qoraqalpogʻiston tibbiyot instituti klinikasida oʻtkazilgan “Bolalarga yangi hayot bagʻishlaymiz” nomli aktsiya fikrimizning yaqqol dalilidir.

18-23-avgust kunlari boʻlib oʻtadigan ushbu tadbir doirasida tugʻma yurak nuqsoni bor bolalar bepul tibbiy koʻrikdan oʻtkazilishi koʻzda tutilgan. Eng muhimi, jarrohlik amaliyotiga muhtoj deb topilgan oʻnlab bolalarning operatsiyasi ham shu yerning oʻzida, hech qanday toʻlovlarsiz amalga oshirildi. Bunday yuqori texnologik operatsiyalarning Toshkentda emas, aynan Nukus shahrida oʻtkazilishi olis yoʻl bosib poytaxtga borishga qiynalgan oilalar uchun katta yengillik boʻldi.

Nukuslik ona Alima Oʻtemuratovaning quvonch yoshlari bilan aytgan minnatdorchilik soʻzlari butun tadbirning mohiyatini ochib beradi. Uzoq yillar farzandining dardi bilan yashagan oila uchun bu kun yangi hayot va umid eshiklarini ochdi. Bu kabi ezgu tashabbuslar nafaqat bolajonlarning hayotini asrab qolmoqda, balki minglab ota-onalarga kuch va ishonch bagʻishlamoqda.

Aytish joizki, tugʻma yurak nuqsoni – bu bolaning ona qornida rivojlanish davrida yurak tuzilishida paydo boʻladigan nuqsondir. Bu kasallik dunyoda eng koʻp uchraydigan tugʻma nuqsonlardan biri hisoblanadi va har 100 ta yangi tugʻilgan chaqaloqdan bittasida uchraydi.

Tugʻma yurak nuqsonlari turli xil boʻlishi mumkin: yurak toʻsiqlarida teshik, yurak qopqoqlarining notoʻgʻri ishlashi, yurak tomirlarining notoʻgʻri joylashuvi yoki rivojlanmasligi shular jumlasidandir. Baʼzi nuqsonlar yengil boʻlib, bolani bezovta qilmaydi va oʻz-oʻzidan tuzalishi mumkin. Biroq, ogʻir shakllarida bola nafas olishda qiynaladi, tez charchaydi, koʻkarib qoladi va normal rivojlana olmaydi.

Kasallikning sabablari ham turlicha: irsiy omillar, homiladorlik davridagi infektsiyalar, dori-darmonlarning notoʻgʻri qoʻllanilishi, ekologik omillar kasallik paydo boʻlishiga taʼsir koʻrsatishi mumkin. Eng muhimi – vaqtida tashxis qoʻyish va davolashdir. Zamonaviy kardioxirurgiya koʻpgina tugʻma yurak nuqsonlarini muvaffaqiyatli davolash imkonini beradi. Erta aniqlangan va toʻgʻri davolangan bolalar toʻlaqonli sogʻlom hayot kechira oladi.

Qoraqalpogʻiston tibbiyot instituti klinikasida poytaxtlik va mahalliy shifokorlarning hamkorlikda amalga oshirayotgan tibbiy koʻrik va jarrohlik amaliyotlari kelgusida Orolboʻyida ham tibbiy xizmat sifatini yanada yuksaltirishga xizmat qiladi. Zero, har bir bola sogʻlom yashashga haqli va bu yoʻldagi saʼy-harakatlar aslo toʻxtamaydi.