Амударё туманида боғдорчилик ривожланмоқда

Мамлакатимизда қишлоқ хўжалиги соҳасига берилаётган эътибор туфайли бугунги кунда аграр тармоқ жадал ривожланмоқда. Давлатимиз раҳбари томонидан соҳани ислоҳ қилиш, модернизациялаш ва унинг самарадорлигини оширишга қаратилган қатор фармон ва қарорлар қабул қилинди. Бунинг натижасида, қишлоқ хўжалигига замонавий технологиялар, инновацион ечимлар ва хорижий инвестициялар кенг жалб этилмоқда. Мақсад – нафақат ички бозорни сифатли ва арзон маҳсулотлар билан таъминлаш, балки экспорт салоҳиятини ҳам оширишдир.

Сабаби, қишлоқ хўжалиги – мамлакат иқтисодиётининг таянчи, озиқ-овқат хавфсизлигининг асоси, қишлоқ аҳолисининг бандлигини таъминлашда асосий тармоқ ҳисобланади. Ушбу соҳанинг барқарор ривожланиши, аҳоли турмуш даражасининг юксалишига, мамлакатнинг иқтисодий қудратининг ошишига хизмат қилади.

Айниқса, боғдорчилик соҳаси қишлоқ хўжалигининг энг сердаромад ва истиқболли йўналишларидан саналади. Мева-сабзавот маҳсулотларига бўлган талаб нафақат ички, балки ташқи бозорда ҳам юқори. Шу сабабли, интенсив боғларни ташкил этиш, серҳосил ва экспортбоп навларни экиш, уларни етиштиришда илғор агротехнологияларни қўллаш муҳим аҳамият касб этади.

Амударё туманининг Холимбег овули ҳудудида жойлашган “Холимбег меваси” МЧЖ тасарруфидаги 15 гектар ер майдонига 2023 йилда Туркиядан келтирилган 8 минг 200 туп турк нок ниҳоллари экилган бўлиб, мазкур боғ жорий йилда мева бера бошлади.

Туркиядан келтирилган ушбу нок нави ўзининг тез ҳосилга кириши, юқори ҳосилдорлиги ва мевасининг тотлилиги билан ажралиб туради. Ушбу навнинг мевалари йирик, серсув ва хушбўй бўлиб, инсон саломатлиги учун зарур бўлган кўплаб витамин ва минералларга бой.

МЧЖ раҳбари Қуролбай Жапақов давлатимиз томонидан деҳқон ва фермерларга, ер эгаларига, томорқачиларга берилаётган кенг имтиёзлар ва амалий қўллаб-қувватлашлар соҳа вакилларининг иш унумдорилигини янада оширишга, даромадларини кўпайтиришга катта туртки бераётганини алоҳида миннатдорчилик билан таъкидлайди.

У ўз тасарруфидаги ерга эрта баҳорда картошка ва пиёз экиб, картошкадан гектаридан 400 центнер, пиёздан эса 250 центнер ҳосил олди. Шунингдек, бўшаган майдонларга карам, корейс карами, булғор қалампири ҳамда сабзи экиб, улардан ҳам мўл ҳосил олишни мақсад қилган.

Боғ қатор ораларига такрорий экинлар экишнинг аҳамияти жуда катта. Бу биринчидан, икки-уч марта ҳосил олиш имконини беради, яъни ердан фойдаланиш самарадорлигини кескин оширади. Иккинчидан, бу қўшимча даромад манбаи бўлиб, фермер хўжалигининг иқтисодий барқарорлигини мустаҳкамлайди. Қолаверса, турли экинларни алмашлаб экиш тупроқ унумдорлигини сақлашга беради.

Дарҳақиқат, сўнгги йилларда Қорақалпоғистон Республикасини ижтимоий-иқтисодий ривожлантириш, тадбиркорликни қўллаб-қувватлаш борасида кенг кўламли ишлар амалга оширилмоқда. Қишлоқ хўжалиги соҳасида фаолият юритаётган тадбиркорлар учун солиқ имтиёзлари, субсидиялар ва имтиёзли кредитлар ажратилмоқда. Бу эса, ўз навбатида, минтақада янги лойиҳаларнинг кўпайишига, ишлаб чиқариш ҳажмининг ошишига ва аҳоли фаровонлигининг юксалишига хизмат қилмоқда.

Бундай имтиёз ва имкониятлардан самарали фойдаланиб, оиласига ва халқига фойдаси тегаётган, мамлакат иқтисоди ривожига ҳисса қўшаётган Қуролбай Жапақов каби маҳоратли деҳқонлар замонавий агротехнологияларни жорий этиш орқали қишлоқ хўжалигида юқори натижаларга эришмоқдалар. Уларнинг фидойи меҳнатлари самараси бозорларимиздаги арзончилик, дастурхонларимиз тўкинлигида ўз аксини топмоқда.