Халқ депутатлари Амударё туман кенгашининг 13-сессияси тўғрисида ахборот

16 сентябрь куни Амударё тумани ҳокимлигининг мажлислар залида Халқ депутатлари туман кенгашининг навбатдаги 13-сессияси бўлиб ўтди. Сессияда депутатлар, туман ҳоким ўринбосарлари, ҳокимлик масъул ходимлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессияни Халқ депутатлари туман Кенгаши раисининг ўринбосари – 3-“Дўстлик” сайлов округидан депутат Мадамин Казаков олиб борди. Сессия котиблигига “14-Бўз ёп” сайлов округидан депутат Музаффар Ешчанов сайланди.

Сессия кун тартибидаги дастлабки – туман маҳаллий бюджетининг қўшимча манбалари ҳисобидан маблағ ажратиш, 2-босқич драйвер лойиҳаларнинг манзилли рўйхатини тасдиқлаш, “Ташаббусли бюджет” нинг ғолиб бўлган лойиҳаларининг рўйхатини тасдиқлаш тўғрисидаги масалалар юзасидан туман ҳокимлигининг Молия, иқтисодиёт ва камбағалликни қисқартириш масалалари бўйича бош мутахассиси Отабек Оллоёров ҳисобот берди.

Ҳисоботларда келтирилишича, Ўзбекистон Республикаси Иқтисодиёт ва Молия вазирлиги томонидан очилган Очиқ бюджет порталида 2025 йил 15 июлидан 3 августга қадар бўлган даврда туман фуқаролари томонидан жами 72 та ташаббуслар киритилган. Ишчи комиссиянинг 2025 йил 21 августдаги йиғилишида ушбу ташаббуслар комиссия аъзолари томонидан қайта кўриб чиқилиб, 2 та ташаббус белгиланган тартибга зид эканлиги сабабли рад этилган. Танлаб олинган 70 та ташаббуслар, масъуллар томонидан қайта ҳисоб-китоблар қилиниб, овоз бериш жараёнига рухсат берилган. Овоз бериш якунларига кўра 12 та ташаббус ғолиб деб топилган. Ушбу ташаббусларнинг умумий қиймати 18 млрд сўмни ташкил этади.

Сессия кун тартибидаги навбатдаги масала – туман Тиббиёт бирлашмасида 2025 йил 7 ойи давомида аҳолига малакали тиббий хизмат кўрсатиш бўйича амалга оширилаётган ишлар юзасидан Тиббиёт бирлашмаси бош шифокори ўринбосари Гулшод Юсупованинг ҳисоботи тингланди.

Ҳисоботда қайд қилинганидек, жорий йилнинг 7 ой давомида туманда 2193 нафар чақалоқ туғилган, 540 киши вафот этган, 17 ёшгача бўлган болалар ўлими 49 нафарни, 1 ёшгача бўлган болалар ўлими 39 нафарини ташкил қилган.

Ҳисобот даврида жами 20 минг 793 нафар болалар турли касалликларга қарши эмланган. Шундан эпидемиологик кўрсатма асосида 1678 нафар болалар қизилча касаллигига, 6 ёшли 3760 нафар болалар ва кам таъминланган оилаларнинг 500 нафар фарзандлари эса гепатит “А” касаллигига қарши эмланган. Ушбу давр мобайнида оналар ўлими кузатилмаган.

Сессия кун тартибидаги сўнгги масала – Мактабгача таълим ташкилотларида болаларнинг овқатланиш жараёнида санитария талабларига риоя қилниши юзасидан Амударё тумани Санитария эпидемиологик осойишталик ва жамоат саломатлиги бўлими бошлиғи Гулмурод Бекиев ҳисобот берди.

Ҳисоботда 2025 йилдан бошлаб мактабгача таълим ташкилотларида болаларни овқатлантиришнинг аутсорсинг тизими жорий қилингани, бу тизим орқали хусусий ташкилотлар томонидан овқат тайёрланиши ва етказиб берилиши йўлга қўйилгани хусусида сўз юритилди ва бу жараёнларда санитария талаблари ва нормаларига амал қилиш ҳолати ҳақида маълумотлар берилди.

Сессия кун тартибига киритилган барча масалалар атрофлича муҳокама қилиниб, фикр-мулоҳазалар тингланган ҳолда тегишли қарорлар қабул қилинди. Шунинг билан Халқ депутатлари туман кенгашининг 13- сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.