Аҳолига етказиб берилаётган ичимлик сувининг сифати ҳамда ундан оқилона фойдаланиш ҳолати ўрганилди

Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг Қорақалпоғистон Республикаси ҳудудий назорат қилиш инспекцияси томонидан тизимда қонунийлик ва шаффофликни таъминлаш, истеъмолчилар ўртасида тежамкорлик маданиятини тарғиб қилиш борасида кенг кўламли ишлар амалга оширилмоқда. Инспекция фаолиятининг асосий йўналиши – ичимлик суви ва оқова сув тармоқларидан оқилона ва қонуний фойдаланишни назорат қилиш ҳамда сув исрофгарчилигига қарши курашишдан иборат.

Инспекция мутахассислари томонидан мунтазам равишда Республиканинг турли ҳудудларида ичимлик суви ва оқова сув тармоқларига ўзбошимчалик билан уланиш ва ичимлик сувини беҳуда исроф қилиш ҳолатларини аниқлаш мақсадида ўрганишлар олиб борилмоқда. Жумладан, жорий йил бошидан буён жами 254 та бюджет ташкилотида ана шундай ўрганишлар ўтказилди. Натижада 26 та ташкилотда жиддий камчиликлар аниқланиб, ташкилот раҳбарларига камчиликларни зудлик билан бартараф этиш бўйича белгиланган тартибда кўрсатмалар берилди. Қонунбузарликка йўл қўйган 7 нафар масъул шахсларга эса Ўзбекистон Республикаси Маъмурий жавобгарлик тўғрисидаги Кодексининг тегишли моддаларига асосан жарималар солинди. Бу каби чоралар бюджет ташкилотларида сув ресурсларидан фойдаланишда масъулиятни оширишга хизмат қилиши шубҳасиз.

Аҳоли саломатлигини ҳимоя қилиш мақсадида Инспекция ходимлари Қорақалпоғистон Республикаси Санитария-эпидемиологик осойишталик ва жамоат саломатлиги бошқармаси мутахассислари билан яқин ҳамкорликни йўлга қўйган. 2025 йил бошидан буён ичимлик суви тармоқларидан кимёвий ҳамда биологик кўрсаткичларни текшириш учун жами 1742 та синамалар олиниб, лабораторияларга юборилди. Олинган синамалар асосида ичимлик сувининг сифати бўйича тегишли хулосалар чиқарилади ва аҳолига етказиб берилаётган сувнинг хавфсизлиги доимий назоратга олинган.

Соҳадаги тартиб-интизомни мустаҳкамлаш борасидаги ишлар ҳам қатъий давом эттирилмоқда. Йил бошидан буён ичимлик суви таъминоти ва оқова сув тармоқларига ўзбошимчалик билан ҳамда қонунга зид равишда уланиш, ушбу тармоқлардан ноқонуний фойдаланиш бўйича жами 402 та ҳолат аниқланди. Бу каби ноқонуний хатти-ҳаракатлар тизимга зарар етказиш билан бирга, бошқа фуқароларнинг сув таъминотига ҳам салбий таъсир кўрсатади. Аниқланган ҳолатлар бўйича айбдорларга Маъмурий жавобгарлик тўғрисидаги Кодекснинг тегишли моддаларига мувофиқ умумий қиймати 1 миллиард 224 миллион сўмлик жарималар солинди. Бу чоралар сувдан ноқонуний фойдаланишнинг олдини олишда муҳим аҳамият касб этади.

Инспекция ходимлари яқинда Амударё туманининг Намуна маҳалласи Тутзор кўчасидаги хонадонларда бўлиб ўрганиш ишларини олиб бордилар. Ўрганишлар давомида аҳолига етказиб берилаётган ичимлик сувидан намуналар олиниб, лаборатория ходимлари томонидан текширилди ҳамда олинган намуналардаги ичимлик сувининг сифат кўрсаткичлари амалдаги давлат стандартлари талабларига мувофиқлиги тасдиқланди.

Назорат ва жазо чоралари билан бир қаторда, ичимлик сувидан тежамкорлик билан фойдаланиш борасидаги тарғибот-ташвиқот ишлари ҳам узлуксиз равишда амалга оширилиб келинмоқда. Шу мақсадда Инспекция ва Республика Маҳаллалар уюшмаси ўртасида тузилган меморандум асосида маҳаллаларда, шунингдек, ижтимоий объектларда доимий ўрганиш ва тушунтириш ишлари олиб борилмоқда. Йил бошидан буён жойларда 170 дан ортиқ тарғибот-ташвиқот тадбирлари ўтказилиб, улар телеканалларда ва ижтимоий тармоқларда кенг ёритилди.

Ўтказилаётган тарғибот-ташвиқот ишларидан асосий мақсад – истеъмолчиларга ичимлик сувидан оқилона фойдаланиш, уни тежаш ва қадрлаш маданиятини сингдириш ҳисобланади. Чунки сув ресурсларининг чекланганлигини ҳисобга олиб, ҳар бир томчи сувни қадрлаш бугунги куннинг долзарб талабидир. Инспекциянинг бу йўналишдаги назорат ва тарғибот ишлари келгусида ҳам тизимли равишда давом эттирилади.