АҲОЛИ ВА ҚИШЛОҚ ХЎЖАЛИГИНИ РЎЙХАТГА ОЛИШ МАСАЛАСИДА ЙИҒИЛИШ ЎТКАЗИЛДИ
Ҳар қандай давлатнинг ижтимоий-иқтисодий ривожланиши, аввало, аниқ рақамлар ва ишончли статистик маълумотларга асосланади. Мамлакатимизда узоқ йиллардан буён кутилган ва стратегик аҳамиятга эга бўлган йирик тадбир — аҳоли ва қишлоқ хўжалигини рўйхатга олиш жараёни бошланиш арафасида турибди. Амударё туманида ўтказилган навбатдаги йиғилиш айни шу масъулиятли жараённинг аҳамияти ва унга якуний тайёргарлик кўриш масалаларига бағишланди.
Маълумки, 2025 йилнинг 19 сентябрь куни Ўзбекистон Республикаси Президенти томонидан қабул қилинган “Аҳоли ва қишлоқ хўжалигини рўйхатга олиш тадбирини ўтказиш тўғрисида”ги Фармон соҳадаги ислоҳотларни янги босқичга олиб чиқди. Мазкур ҳужжатга биноан, юртимизда 2026 йил 15 январдан 28 февралгача бўлган даврда аҳоли ва қишлоқ хўжалигини рўйхатга олиш тадбирлари ўтказилиши белгиланган. Бу шунчаки статистика эмас, балки Янги Ўзбекистоннинг келгуси ўн йиллик тараққиёт режасини тузиш учун мустаҳкам пойдевордир.
Амударё тумани ҳокимлигида ташкил этилган кенгайтирилган йиғилишда ушбу сиёсий жараённинг ташкилий жиҳатлари муҳокама қилинди. Тадбирда Қорақалпоғистон Республикаси Статистика бошқармаси бўлим бошлиғи Айзада Мамутова, туман ҳокими ўринбосари — инвестиция ва ташқи савдо бўлими бошлиғи Ҳамза Ҳайтимбетов, туман Статистика бўлими бошлиғи Олимжон Пирманов ҳамда жойлардаги асосий ижрочи бўғин ҳисобланган “Маҳалла еттилиги” аъзолари иштирок этдилар.
Йиғилишда таъкидланганидек, мазкур рўйхатга олиш тадбири мамлакатимиздаги 38 миллиондан ортиқ аҳолининг нафақат сонини, балки уларнинг ёши, оилавий ҳолати, маълумоти, миграция ҳолати, бандлиги ва даромад манбалари каби муҳим кўрсаткичларини қамраб олувчи ягона ва ҳаққоний маълумотлар базасини шакллантиришга хизмат қилади.
Шу билан бирга, Амударё каби аграр салоҳияти юқори бўлган туманлар учун қишлоқ хўжалигини рўйхатга олиш ўта муҳимдир. Бу жараёнда ердан фойдаланиш самарадорлиги, мавжуд чорвачилик кўрсаткичлари, томорқа хўжаликларининг ҳолати аниқланиб, келажакда қишлоқ хўжалигини ривожлантириш дастурларини ишлаб чиқишда асос бўлиб хизмат қилади.
Мутахассислар рўйхатга олиш тартибининг замонавий ва қулай усулларига алоҳида тўхталиб ўтдилар. Тадбир икки босқичда амалга оширилади. Биринчи босқич онлайн тарзда ўтказилиб, дастлабки 17 кун давомида фуқароларга қулайлик яратиш мақсадида махсус порталдан фойдаланган ҳолда рўйхатдан ўтилади. Ҳар бир фуқаро ўз уйидан чиқмаган ҳолда, ушбу жараёнда фаол иштирок этиши мумкин. Бу вақт ва маблағни тежаш билан бирга, рақамли технологияларнинг ҳаётимизга чуқур кириб бораётганидан далолатдир.
Иккинчи, яъни анъанавий босқичда эса “Маҳалла еттилиги” ва махсус ўқитилган рўйхатга олувчилар уйма-уй юриб, планшетлар ёрдамида маълумотларни базага киритадилар.
Йиғилишда сўзга чиққанлар маҳаллаларда, корхона ва ташкилотларда, шунингдек, таълим муассасаларида тушунтириш-тарғибот ишларини кучайтириш лозимлигини таъкидладилар. Зеро, ҳар бир фуқаро ушбу маълумотлар эртага ўз маҳалласига янги мактаб, боғча, шифохона қурилиши ёки янги иш ўринлари яратилиши учун асос бўлишини тушуниб етиши керак.
2026 йилда ўтказиладиган ушбу тадбир Ўзбекистоннинг халқаро майдондаги нуфузини оширишга, миллий барқарор ривожланиш мақсадларини тўғри баҳолашга ва хорижий инвесторларни жалб қилишга катта ҳисса қўшади. Амударё тумани фаоллари ҳам ушбу муҳим тадбирга тайёргарликни юқори савияда давом эттирмоқдалар. Ўтказилган йиғилиш ҳам бу борада тегишли мутасаддиларнинг билимларини ошириб, масъулиятини янада кучайтиришга хизмат қилгани билан аҳамиятли бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
