AHOLI VA QIShLOQ XOʻJALIGINI ROʻYXATGA OLISh MASALASIDA YIGʻILISh OʻTKAZILDI

Har qanday davlatning ijtimoiy-iqtisodiy rivojlanishi, avvalo, aniq raqamlar va ishonchli statistik maʼlumotlarga asoslanadi. Mamlakatimizda uzoq yillardan buyon kutilgan va strategik ahamiyatga ega boʻlgan yirik tadbir — aholi va qishloq xoʻjaligini roʻyxatga olish jarayoni boshlanish arafasida turibdi. Amudaryo tumanida oʻtkazilgan navbatdagi yigʻilish ayni shu masʼuliyatli jarayonning ahamiyati va unga yakuniy tayyorgarlik koʻrish masalalariga bagʻishlandi.

Maʼlumki, 2025-yilning 19-sentyabr kuni Oʻzbekiston Respublikasi Prezidenti tomonidan qabul qilingan “Aholi va qishloq xoʻjaligini roʻyxatga olish tadbirini oʻtkazish toʻgʻrisida”gi Farmon sohadagi islohotlarni yangi bosqichga olib chiqdi. Mazkur hujjatga binoan, yurtimizda 2026-yil 15-yanvardan 28-fevralgacha boʻlgan davrda aholi va qishloq xoʻjaligini roʻyxatga olish tadbirlari oʻtkazilishi belgilangan. Bu shunchaki statistika emas, balki Yangi Oʻzbekistonning kelgusi oʻn yillik taraqqiyot rejasini tuzish uchun mustahkam poydevordir.

Amudaryo tumani hokimligida tashkil etilgan kengaytirilgan yigʻilishda ushbu siyosiy jarayonning tashkiliy jihatlari muhokama qilindi. Tadbirda Qoraqalpogʻiston Respublikasi Statistika boshqarmasi boʻlim boshligʻi Ayzada Mamutova, tuman hokimi oʻrinbosari — investitsiya va tashqi savdo boʻlimi boshligʻi Hamza Haytimbetov, tuman Statistika boʻlimi boshligʻi Olimjon Pirmanov hamda joylardagi asosiy ijrochi boʻgʻin hisoblangan “Mahalla yettiligi” aʼzolari ishtirok etdilar.

Yigʻilishda taʼkidlanganidek, mazkur roʻyxatga olish tadbiri mamlakatimizdagi 38 milliondan ortiq aholining nafaqat sonini, balki ularning yoshi, oilaviy holati, maʼlumoti, migratsiya holati, bandligi va daromad manbalari kabi muhim koʻrsatkichlarini qamrab oluvchi yagona va haqqoniy maʼlumotlar bazasini shakllantirishga xizmat qiladi.

Shu bilan birga, Amudaryo kabi agrar salohiyati yuqori boʻlgan tumanlar uchun qishloq xoʻjaligini roʻyxatga olish oʻta muhimdir. Bu jarayonda yerdan foydalanish samaradorligi, mavjud chorvachilik koʻrsatkichlari, tomorqa xoʻjaliklarining holati aniqlanib, kelajakda qishloq xoʻjaligini rivojlantirish dasturlarini ishlab chiqishda asos boʻlib xizmat qiladi.

Mutaxassislar roʻyxatga olish tartibining zamonaviy va qulay usullariga alohida toʻxtalib oʻtdilar. Tadbir ikki bosqichda amalga oshiriladi. Birinchi bosqich onlayn tarzda oʻtkazilib, dastlabki 17 kun davomida fuqarolarga qulaylik yaratish maqsadida maxsus portaldan foydalangan holda roʻyxatdan oʻtiladi. Har bir fuqaro oʻz uyidan chiqmagan holda, ushbu jarayonda faol ishtirok etishi mumkin. Bu vaqt va mablagʻni tejash bilan birga, raqamli texnologiyalarning hayotimizga chuqur kirib borayotganidan dalolatdir.

Ikkinchi, yaʼni anʼanaviy bosqichda esa “Mahalla yettiligi” va maxsus oʻqitilgan roʻyxatga oluvchilar uyma-uy yurib, planshetlar yordamida maʼlumotlarni bazaga kiritadilar.

Yigʻilishda soʻzga chiqqanlar mahallalarda, korxona va tashkilotlarda, shuningdek, taʼlim muassasalarida tushuntirish-targʻibot ishlarini kuchaytirish lozimligini taʼkidladilar. Zero, har bir fuqaro ushbu maʼlumotlar ertaga oʻz mahallasiga yangi maktab, bogʻcha, shifoxona qurilishi yoki yangi ish oʻrinlari yaratilishi uchun asos boʻlishini tushunib yetishi kerak.

2026-yilda oʻtkaziladigan ushbu tadbir Oʻzbekistonning xalqaro maydondagi nufuzini oshirishga, milliy barqaror rivojlanish maqsadlarini toʻgʻri baholashga va xorijiy investorlarni jalb qilishga katta hissa qoʻshadi. Amudaryo tumani faollari ham ushbu muhim tadbirga tayyorgarlikni yuqori saviyada davom ettirmoqdalar. Oʻtkazilgan yigʻilish ham bu borada tegishli mutasaddilarning bilimlarini oshirib, masʼuliyatini yanada kuchaytirishga xizmat qilgani bilan ahamiyatli boʻldi.