Сайёр қабулларда муаммоларга жойида ечим топилмоқда

Аҳолининг кундалик муаммоларини бевосита жойига чиқиб ўрганиш, мурожаатларга тезкор ва самарали ечим топиш мақсадида Амударё тумани ҳокими Собир Хўжаметов томонидан Жайхун ҳамда Бой овул маҳалла фуқаролар йиғинларида навбатдаги сайёр қабуллар ўтказилди.

Мазкур сайёр қабулларда туман бўлим ва ташкилотлари раҳбарлари, мутасадди масъуллар ҳамда маҳалла аҳолиси вакиллари иштирок этдилар. Учрашувлар очиқ мулоқот, аҳоли муаммоларини ва таклифларини тинглаш руҳида ташкил этилди.

Жайхун маҳалла фуқаролар йиғинида бўлиб ўтган сайёр қабул давомида аҳоли томонидан бир қатор ижтимоий ва инфратузилмавий муаммолар юзасидан мурожаатлар билдирилди. Хусусан, ички йўлларни таъмирлаш, йўл ҳаракати хавфсизлигини таъминлаш мақсадида йўл белгиларини ўрнатиш масалалари кўтарилди.

Шунингдек, фуқаролар фарзандларининг олий таълим муассасаларида ўқиши учун шартнома тўловларини амалга оширишда амалий ёрдам сўраб мурожаат қилдилар. Маҳаллада спорт майдончаси қурилишига кўмаклашиш, ёшларнинг бўш вақтини мазмунли ташкил этиш масалалари ҳам муҳим таклифлар қаторида тилга олинди.

Аҳоли томонидан электр энергияси таъминоти сифатини яхшилаш, чорвачилик маҳсулотларини сотиш учун дўкон қуришга ер майдони ажратиш, шунингдек, чорвачилик фаолиятини ривожлантириш мақсадида имтиёзли кредит маблағлари ажратилишида амалий ёрдам бериш бўйича мурожаатлар билдирилди.

Туман ҳокими Собир Хўжаметов ҳар бир мурожаатни диққат билан тинглаб, масъулларга аниқ вазифалар юклади. Айрим масалалар жойида ҳал этилди, қолган мурожаатлар бўйича тегишли бўлимларга ижро учун топшириқлар берилди.

Бой овул маҳалла фуқаролар йиғинида бўлиб ўтган сайёр қабулда туман Ички ишлар бўлими бошлиғи Тимур Дошумбаев ҳам иштирок этди. Дастлаб масъуллар ҳудудда жиноятчилик ва ҳуқуқбузарликларнинг олдини олиш, Бой овул маҳалласини жиноятчиликдан ҳоли ҳудудга айлантириш масалалари юзасидан сўз юритдилар.

Жиноятчиликка қарши курашиш, ҳуқуқбузарликларнинг олдини олиш бугунги кундаги энг устувор вазифалардан бири экани таъкидланиб, бу борада аҳоли ва масъул идоралар ҳамкорлигининг аҳамияти қайд этилди.

Сайёр қабул жараёнида фуқаролар томонидан жарроҳлик амалиёти ва даволаниш учун моддий ёрдам ажратиш, ўзи ва турмуш ўртоғини ишга жойлаштиришга кўмаклашиш, паррандачиликни ривожлантириш учун кредит маблағлари ажратиш каби масалалар юзасидан мурожаатлар билдирилди.

Бундан ташқари, фарзандларининг олий таълим шартнома пулларини тўлашда амалий ёрдам кўрсатиш, уй-жойларни таъмирлаш, фарзандини ҳарбий хизматга жўнатиш билан боғлиқ компенсация маблағларини олишда кўмак бериш масалалари ҳам аҳоли томонидан кўтарилди.

Туман ҳокими Собир Хўжаметов томонидан ҳар бир мурожаат юзасидан масъул раҳбарларга аниқ топшириқлар берилиб, уларнинг ижроси қатъий назоратга олиниши белгиланди. Аҳоли билан юзма-юз мулоқот қилиш, муаммоларни жойида кўриб чиқиш ва амалий ечимлар топиш сайёр қабулларнинг асосий мақсади эканлиги яна бир бор ўз тасдиғини топди.

Мазкур сайёр қабуллар аҳоли ишончини мустаҳкамлаш, давлат идоралари фаолиятининг очиқлиги ва самарадорлигини ошириш, энг асосийси, фуқароларнинг мурожаатларини эътиборсиз қолдирмаслик йўлидаги муҳим қадам бўлиб хизмат қилди.

Чарос Арслонова, туман ҳокимлигининг Ахборот хизмати раҳбари.