Мардликка эҳтиром, хотирага садоқат: Амударёда Афғон уруши фахрийларига юксак эҳтиром кўрсатилди

1989 йил 15 февраль — Афғонистон ҳудудидан собиқ Совет Иттифоқи қўшинлари тўлиқ олиб чиқилган кун сифатида тарихда муҳрланган. Ушбу сана йиллар ўтган сари жасорат ва фидойилик тимсолига, жанг-у жадалларда қатнашган минглаб юртдошларимиз хотирасини ёд этиш, омон қайтган фахрийларимизга ҳурмат бажо келтириш кунига айланди.

Ўн йилга яқин вақт мобайнида давом этган ҳарбий ҳаракатлар кўплаб оилалар тақдирига ўз таъсирини ўтказди. Республикамиздан 3580 нафар ҳарбий хизматчи ушбу урушда иштирок этиб, ўз бурчини адо этди. Бугун эса уларнинг жасорати ва сабр-матонати тинч ва осойишта ҳаётимизнинг қадрига етиш, ёш авлодни ватанпарварлик руҳида тарбиялашда муҳим ибрат мактаби бўлиб хизмат қилмоқда.

Жорий йилда собиқ иттифоқ қўшинлари Афғонистондан олиб чиқилганининг 37 йиллиги муносабати билан Амударё туманида ҳам кенг кўламли тадбирлар ташкил этилди. Сана арафасида туман Хотира майдонида афғон уруши фахрийлари хотирасига бағишлаб ҳайкал муқаддас ўрнатилгани тадбирнинг маънавий аҳамиятини янада оширди. Ушбу масканда ўтказилган маросимда жангчи-фахрийлар, нуронийлар, ёшлар ҳамда кенг жамоатчилик вакиллари иштирок этди.

Туман ҳокимлиги ташаббуси билан ташкил этилган тадбирда ҳокимнинг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Нодирбек Камолов, туман Мудофаа ишлари бўлими бошлиғи Шуҳрат Маматов, Ўзбекистон “Ветеран” жангчи-фахрий ва ногиронлар бирлашмасининг республика ва туман миқёсидаги раҳбарлари ҳамда аъзолари, бир гуруҳ байналмилал жангчилар қатнашди.

Тадбирни очиб берган туман ҳокими ўринбосари Нодирбек Камолов ўз нутқида 15 февраль санаси фахрийлар учун чин маънодаги байрам эканини алоҳида таъкидлади. У мураккаб шароитларда жанг-у жадалларда қатнашиб, Ватанга омон қайтган юртдошларимизнинг жасорати, матонати ва садоқати бугунги тинч ҳаётимизнинг қадрига етишда муҳим ўрин тутишини қайд этди.

Сўзга чиққанлар юртимизда жангчи-фахрийларни ҳар томонлама қўллаб-қувватлаш, уларнинг муносиб ҳаёт кечириши, саломатлигини тиклаши ва ижтимоий ҳимоясини таъминлаш борасида амалга оширилаётган ишлар ҳақида тўхталди. Шу билан бирга, Афғон уруши сабоқлари бугунги ёш авлод учун ибрат мактаби экани алоҳида қайд этилди.

Тадбир давомида амударёлик афғон уруши қатнашчилари иштирокида Хотира майдонидаги ҳайкал пойига гулчамбарлар қўйилди. Байналмилал жангчилар Афғонистондаги уруш ҳаракатларида ҳалок бўлган қуролдошлари хотирасига ҳурмат бажо келтириб, уларнинг ёрқин хотирасини ёд этдилар. Юртимизда тинчлик ва осойишталик мангу бўлиши тилаб, дуога қўл очилди.

Тантаналар Манғит шаҳридаги “Diamond” ресторанида давом эттирилди. Бу ерда фахрийлар учун байрам дастурхони ёзилиб, уларнинг хизматлари эътироф этилди. Сана муносабати билан ташаккурномалар ва эсдалик совғалари топширилди. Фахрийлар ҳукуматимиз томонидан кўрсатилаётган эътибор ва ғамхўрлик учун миннатдорлик билдирдилар.

Байрам тадбирида туман Маданият бўлими санъаткорлари томонидан концерт дастури намойиш этилди. Ватан, она, тинчлик ва шукроналикни мадҳ этувчи куй-қўшиқлар тадбирга кўтаринки руҳ бағишлади.

Чарос Арслонова, туман ҳокимлигининг Ахборот хизмати раҳбари.