Нукусда маиший коррупцияга қарши курашишда жамоатчилик назорати масалалари муҳокама қилинди
Нукус шаҳрида маиший коррупция ҳолатларини жамоатчилик иштирокида ўрганиш ва таҳлил қилишга бағишланган давра суҳбати бўлиб ўтди. Тадбир Ўзбекистон нодавлат нотижорат ташкилотлари Миллий Ассоциациясининг Қорақалпоғистон Республикаси ҳудудий бўлинмаси томонидан “Нодавлат нотижорат ташкилотлари уйи”да ташкил этилди. Унда фуқаролик жамияти институтлари фаоллари, нодавлат нотижорат ташкилотлари вакиллари ва мазкур йўналишга қизиқиш билдирган фаол фуқаролар иштирок этди.
Мазкур учрашув Ўзбекистон Республикаси Олий Мажлиси ҳузуридаги Жамоат фонди томонидан молиялаштирилган “Жамоатчилик иштирокида маиший коррупция ҳолатларини ўрганиш ва таҳлил қилиш” лойиҳаси доирасида ташкил этилди. Тадбирнинг асосий мақсади жамиятда учраётган маиший коррупция ҳолатларини кенг жамоатчилик иштирокида атрофлича ўрганиш, уларни таҳлил қилиш, мавжуд муаммо ва камчиликларни очиқ муҳокама этиш, шунингдек, ушбу салбий иллатнинг олдини олишга қаратилган амалий таклиф ва тавсиялар ишлаб чиқишдан иборат бўлди.
Давра суҳбатида Қорақалпоғистон Республикаси Вазирлар Кенгаши коррупцияга қарши курашиш комплаенс-назорат бўлими бошлиғи Батир Матмуратов, Ўзбекистон нодавлат нотижорат ташкилотлари Миллий Ассоциациясининг Қорақалпоғистон Республикаси ҳудудий бўлими бошлиғи Қуатбай Каримходжаев ҳамда бошқа иштирокчилар сўзга чиқиб, маиший коррупциянинг жамият ҳаётига салбий таъсири, унинг аҳоли ўртасида намоён бўлаётган турли кўринишлари, келиб чиқиш омиллари ва оқибатлари ҳақида фикр билдирдилар.
Давра суҳбатида давлат ва жамоат институтлари фаолиятида шаффофликни таъминлашда фуқароларнинг ўрни, жамоатчилик назоратини кучайтиришнинг аҳамияти, коррупциявий ҳолатларни барвақт аниқлаш ҳамда олдини олиш механизмлари хусусида атрофлича сўз юритилди.
Тадбир доирасида лойиҳа асосида ўтказилган ижтимоий сўровнома натижалари ҳам тақдим этилди. Унга кўра, сўровномада 2324 нафар респондент иштирок этган. Сўровнома натижалари аҳолининг маиший коррупцияга нисбатан қарашлари турлича эканини кўрсатди. Респондентларнинг катта қисми маиший коррупцияни давлат хизматларида пора ёки манфаат эвазига хизмат кўрсатиш, таниш-билиш орқали масалани ҳал қилиш, шунингдек, пул, совға ёки хизмат эвазига енгиллик яратиш каби ҳолатлар билан боғлаган. Бу эса ушбу муаммо жамиятда турли шаклларда қабул қилинаётганини англатади.
Таҳлилларга кўра, маиший коррупция энг кўп тиббиёт, таълим, давлат хизматлари, ҳуқуқни муҳофаза қилувчи органлар ва коммунал хизматлар соҳаларида учраши қайд этилган. Шунингдек, айрим респондентлар охирги бир-икки йил ичида ушбу ҳолатларга шахсан дуч келганини ёки унинг гувоҳи бўлганини билдирган. Фуқароларнинг коррупцияга муросали муносабатда бўлишига сабаб сифатида эса масалани тез ҳал қилиш истаги, вақтни тежаш, бошқа илож йўқлиги ҳақидаги қарашлар ҳамда ҳуқуқий билим етишмаслиги каби омиллар кўрсатилган.
Муҳокамалар давомида маиший коррупцияга қарши курашишда аҳолининг ҳуқуқий онги ва ҳуқуқий маданиятини юксалтириш, мурожаат қилиш маданиятини шакллантириш, фуқароларнинг ўз ҳуқуқларини ҳимоя қилиш кўникмаларини мустаҳкамлаш муҳим вазифалардан экани алоҳида таъкидланди. Иштирокчилар, шунингдек, давлат хизматларини рақамлаштириш, жавобгарлик чораларини кучайтириш ва жамоатчилик назоратини янада фаоллаштириш каби чоралар ушбу йўналишда энг самарали воситалардан бири эканини қайд этдилар.
Тадбир якунида билдирилган фикр ва таклифлар умумлаштирилиб, келгусида бу йўналишда амалга ошириладиган ишлар самарадорлигини оширишга қаратилган тавсиялар шакллантирилди. Таъкидланганидек, маиший коррупцияга қарши курашиш фақат давлат органларининг эмас, балки бутун жамиятнинг биргаликдаги саъй-ҳаракатини талаб этади. Бу борада жамоатчилик назоратини кучайтириш, фуқаролик жамияти институтларининг ўрнини мустаҳкамлаш ва аҳолининг фаол фуқаролик позициясини рағбатлантириш муҳим аҳамият касб этади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
