Манғитда янги ва замонавий «Ризқ-барака» супермаркети иш бошлади

29 март куни Амударё туманининг Манғит шаҳри марказида қад ростлаган замонавий ва кўркам маскан — "Ризқ-барака" супермаркетининг тантанали очилиш маросими бўлиб ўтди. Тадбирда кенг жамоатчилик вакиллари, нуронийлар ва ёшлар жам бўлиб, янги мажмуанинг иш бошлашини катта шодиёна билан қарши олдилар.

Маросимда иштирок этган Амударё тумани ҳокими Собир Хўжаметов йиғилганларни қутлар экан, бугунги кунда юртимизда давлатимиз раҳбари бошчилигида тадбиркорликни қўллаб-қувватлаш, хусусий секторга кенг йўл очиш борасида амалга оширилаётган тизимли ислоҳотларнинг аҳамиятига алоҳида тўхталиб ўтди. Таъкидландики, кичик бизнес ва хусусий тадбиркорлик вакиллари учун яратилаётган имтиёзлар, бюрократик тўсиқларнинг бартараф этилиши ва қулай инвестиция муҳити яратилиши мана шундай замонавий объектларнинг кўпайишига замин яратмоқда. Туман ҳокими ўз нутқида янги супермаркет нафақат аҳолига қулайлик яратишини, балки янги иш ўринлари очилиши орқали маҳаллий аҳоли бандлигини таъминлашга ҳам хизмат қилишини эътироф этиб, мажмуа жамоасига ва тадбиркорларга келгуси фаолиятларида улкан зафарлар тилади.

Мазкур янги савдо мажмуаси ўз номига мос равишда тўкин-сочинлик ва файз-барака маскани, десак муболаға бўлмайди. Супермаркетнинг ички дизайни ва маҳсулотларнинг жойлаштирилиши энг замонавий стандартларга жавоб беради. Бинога қадам қўйган ҳар бир харидор аввало кенглик ва ёруғликни, сўнгра пештахталардаги хилма-хилликни ҳис этади. Бу ерда кундалик ҳаёт учун зарур бўлган барча турдаги озиқ-овқат маҳсулотлари, янги узилган сархил қишлоқ хўжалиги неъматларидан тортиб, турли хилдаги ноозиқ-овқат товарлари ва рўзғор буюмларигача мавжуд.

Супермаркет маъмурияти маҳсулотлар сифатига ва уларнинг янгилигига алоҳида эътибор қаратади. Айниқса, маҳаллий ишлаб чиқарувчилар ва фермер хўжаликлари билан тўғридан-тўғри алоқалар ўрнатилгани боис, қишлоқ хўжалиги маҳсулотларининг сархиллиги ва табиийлиги таъминланган. Бу эса супермаркетни Манғит шаҳри аҳолисининг оғирини енгил, узоғини яқин қиладиган, бир манзилнинг ўзида барча эҳтиёжларни қондириш имконини берадиган мажмуага айлантирди. Пештахталардан ўрин олган ҳар бир маҳсулот харидорларнинг талаб ва истакларини ўрганган ҳолда танланган бўлиб, бу ерда ҳам оилавий харидлар, ҳам индивидуал эҳтиёжлар учун барча шароитлар муҳайё қилинган.

Супермаркетнинг энг муҳим ва диққатга сазовор жиҳатларидан бири — бу маҳсулотларнинг нарх-навосидир. Истеъмол бозорида рақобат кучайиб бораётган бир даврда, "Ризқ-барака" супермаркети раҳбарияти халқчил нарх сиёсатини юритишни ўз олдига мақсад қилиб қўйган. Нархларнинг ҳамёнбоплиги ва турли акцияларнинг йўлга қўйилиши аҳолининг харид қобилиятини оширишга ва оилавий бюджетини тежашга хизмат қилади. Бу эса ижтимоий йўналтирилган тадбиркорликнинг ёрқин намунасидир.

Очилиш маросимига йиғилган аҳоли вакиллари – илк харижорлар мазкур масканнинг иш бошлашидан мамнун эканликларини, айниқса хизмат кўрсатиш маданияти юқори эканлигини алоҳида таъкидладилар. Хушмуомала сотувчилар ва тезкор касса хизмати мижозларнинг вақтини тежаш ва уларга сифатли хизмат кўрсатиш имконини беради. Мажмуанинг техник жиҳозланиши, совитиш тизимлари ва сақлаш камералари маҳсулотларнинг сифатини узоқ вақт давомида асл ҳолида сақлашга кафолат беради.

Хулоса ўрнида айтиш мумкинки, Манғит шаҳрининг Гулзор маҳалласида қад ростлаган ва 25 нафар ишсиз аҳолини иш билан таъминлаган ушбу янги савдо мажмуаси Амударё туманининг иқтисодий салоҳияти ортиб бораётганининг яна бир амалий ифодаси бўлди. Бу каби лойиҳаларнинг амалга оширилиши халқимизнинг турмуш фаровонлигини юксалтириш, ҳудудларда замонавий инфратузилмани ривожлантириш ва тадбиркорликка кенг йўл очиш борасидаги давлат сиёсатининг натижасидир.

"Ризқ-барака" супермаркети эндиликда нафақат савдо маскани, балки аҳоли учун қулайлик, сифат ва ишонч рамзига айланиши шубҳасиз. Зеро, тадбиркорлик ривожланган юртда тўкинлик, барака ва тараққиёт бардавом бўлаверади.

Янги масканнинг очилиши эса туман аҳли учун баҳорнинг илк ойида муносиб совға бўлди. Бундай хайрли ишларнинг давомийлиги юртимиздаги тинчлик ва барқарорликнинг, меҳнаткаш халқимизнинг порлоқ келажак сари ташлаётган дадил қадамларининг самарасидир. Эндиликда Манғитликлар ўзларига яқин ва қулай бўлган, барча шароитларга эга масканда кўнгилдагидек харидларни амалга оширишлари мумкин. Бу эса инсон қадри улуғланган юртда ҳар бир фуқаронинг манфаати ва қулайлиги устувор эканининг яна бир исботидир.