Амударёда озиқ-овқат хавфсизлиги: Ердан унумли фойдаланиш – тўкинлик гарови

Ерга меҳр бериш, унинг ҳар бир қаричидан унумли фойдаланиш фаровон ҳаёт ва тўкинликнинг бош мезонидир. Бугунги глобаллашув даврида озиқ-овқат хавфсизлигини таъминлаш нафақат иқтисодий, балки стратегик аҳамиятга эга бўлган муҳим масаладир. Мамлакатимизнинг ҳар бир ҳудудида бўлгани каби Амударё туманида ҳам бу борада кенг кўламли ишлар амалга оширилмоқда.

Амударё соҳилларида жойлашган бу замин азалдан ўзининг деҳқончилик анъаналари ва меҳнатсевар инсонлари билан машҳур. Бугунги кунда туманда қишлоқ хўжалиги соҳасини ислоҳ қилиш, ер эгаларини ҳар томонлама қўллаб-қувватлаш ва ички бозорни сифатли маҳсулотлар билан тўлдириш устувор вазифага айланган.

Рақамларга эътибор қаратадиган бўлсак, Амударё туманида деҳқон хўжаликлари жами 2 минг гектардан ортиқ майдонда самарали фаолият юритиб келаётганини кўришимиз мумкин. Бундан ташқари, туманнинг ижтимоий-иқтисодий ҳаётида томорқа ер эгаларининг ўрни беқиёсдир. 40 мингдан ортиқ томорқа эгалари тасарруфида жами 8 минг гектарга яқин майдон мавжуд бўлиб, бу улкан имконият демакдир. Ҳар бир хонадон эгаси ўз томорқасини кичик бир хазинага айлантириб, нафақат ўз эҳтиёжларини қондирмоқда, балки бозор расталарини ҳам арзон ва сифатли маҳсулотлар билан тўлдиришга кўмаклашмоқда.

Шу билан бирга, тумандаги 350 дан ортиқ фермер хўжаликлари далаларида ҳам пахта ва ғалладан ташқари, озиқ-овқат маҳсулотларини етиштириш масалаларига катта эътибор қаратилмоқда. Бундай ёндашув мамлакатимизда озиқ-овқат хавфсизлигини таъминлаш, ички истеъмолни барқарор қаноатлантириш ва энг муҳими, экспорт салоҳиятини ошириш имконини бермоқда.

Ердан фойдаланишнинг янгича усуллари ва замонавий технологияларни жорий этиш орқали деҳқонларимиз йилнинг тўрт фаслида ҳам юқори ҳосилдорликка эришишмоқда. Бу борада “Ражаб Жапоқ” фермер хўжалигининг фаолиятини алоҳида намуна сифатида кўрсатиш мумкин. Ушбу хўжаликда ҳар бир қарич ердан оқилона фойдаланиш маданияти шаклланган. Масалан, боғ қатор ораларига тўқсонбости усулида пиёз экилган бўлиб, бу усул баҳорнинг илк кунлариданоқ халқимиз дастурхонига янги маҳсулотларни етказиб бериш имконини яратади. Фермер хўжалиги аъзолари нафақат пиёз, балки картошка, қалампир, булғор қалампири ва сабзавотларнинг деярли барча турларини етиштиришда катта тажриба тўплашган. Бу каби деҳқон ва фермерларнинг тинимсиз меҳнати туфайли бозорларимизда тўкинлик, халқимиз дастурхонида эса мўл-кўллик ҳукм сурмоқда.

Мазкур фермер хўжалигининг ютуқлари фақат сабзавотчилик билан чекланиб қолмайди. “Ражаб Жапоқ” хўжалиги кўп тармоқли фаолият юритиши билан ҳам ажралиб туради. Бу ерда пахтачилик, ғаллачилик, чорвачилик ва боғдорчилик соҳалари бир-бирини тўлдирган ҳолда фаол ривожлантирилмоқда. Ўтган йилги мавсумда пахта етиштиришда юқори натижа қайд этилиб, ҳар гектар майдондан ўртача 40 центнердан ҳосил олинган бўлса, жорий йилда бу кўрсаткични янада ошириш, ҳосилдорликни янги босқичга олиб чиқиш мақсад қилинган. Бу эса фермернинг ўз касбига бўлган садоқати ва ерга бўлган меҳридан далолат беради. Кўп тармоқли хўжалик сифатида чорвачиликни ривожлантириш орқали аҳолига гўшт ва сут маҳсулотлари етказиб берилса, боғдорчилик орқали сархил мевалар етиштирилмоқда. Бундай тизимли иш ташкил этилиши нафақат иқтисодий фойда келтиради, балки янги иш ўринлари яратилишига ҳам хизмат қилади.

Ер билан тиллаша олган, ундан барака топаётган деҳқон ва фермерларимиз бугунги куннинг ҳақиқий қаҳрамонларидир. Уларнинг саъй-ҳаракатлари туфайли дастурхонларимиз тўкин, бозорларимиз файзли бўлмоқда. Тизимли ташкил этилган иш жараёни, ерга илмий ва инновацион ёндашув ҳамда кўп тармоқли хўжаликларнинг кўпайиши келгусида туман иқтисодиётини янада юксалтиришга хизмат қилади. Мамлакатимизда амалга оширилаётган ислоҳотлар, деҳқонларга яратиб берилаётган шароитлар ва ер эгаларининг фидокорона меҳнати бир нуқтада бирлашиб, юртимизнинг озиқ-овқат мустақиллигини мустаҳкамлашга замин яратмоқда.