55-мактабнинг “Ғунча” жамоаси “Иқтидор мактаб ансамбли” танловининг Республика босқичида фахрли 2-ўринни эгаллади

Хабарингиз бор, жорий йилнинг 24 апрель куни “Иқтидор мактаб ансамбли” танловининг Амударё туман босқичи юқори савияда ташкил этилиб, унда тумандаги умумтаълим муассасаларидан жами 55 та мактаб жамоалари ўзларининг ранг-баранг чиқишлари ва мусиқий дастурлари билан фаол иштирок этишган эди.

Ўқувчи ёшлар томонидан маҳорат билан ижро қилинган куй ва мусиқаларни, айниқса, ўзбек миллий чолғу асбобларида чалинган бетакрор наволарни холис ҳамда профессионал даражада баҳолаб бориш учун мусиқа ва санъат мактабининг энг тажрибали ўқитувчиларидан иборат ҳакамлар ҳайъати жалб қилинди. Иқтидорли ёшлар ўртасида кечган муросасиз ва қизғин беллашувлар якунига кўра, ҳакамлар ҳайъатининг якуний хулосаси билан 1-ўринни 55-сонли мактабнинг “Ғунча” жамоаси эгаллаган эди. Ўз тенгқурлари орасида энг яхши натижа қайд этган ғолиб жамоа 1-даражали диплом ҳамда эсдалик совғалари билан тақдирланиб, мусобақанинг Республика босқичида иштирок этиш учун йўлланмани қўлга киритди.

Истеъдодли ёшларни қўллаб-қувватлашга қаратилган мазкур нуфузли танловнинг Республика босқичи 5 май куни Нукус шаҳридаги Ўзбекистон Республикаси Консерваториясининг Нукус филиали биносида катта тантана ва байрамона шукуҳ билан бўлиб ўтди.

Ушбу йирик маданий тадбирда Республика “Келажак” маркази директори Индира Холдарова қатнашиб, ёш ижрочиларнинг истеъдоди ва саҳна маданиятини кузатиб борди. Бундан ташқари, иштирокчиларнинг ижро маҳорати ва миллий чолғуларда чалиш қобилиятини муносиб ҳамда адолатли баҳолаб бориш учун ҳакамлар ҳайъати таркибида Ўзбекистон халқ артисти Муножот Йўлчиева иштирок этди.

Танловнинг якуний натижаларига кўра, туманимиз шарафини муносиб ҳимоя қилган 55-сонли мактабнинг “Ғунча” жамоаси ушбу босқичда фахрли 2-ўринни эгаллашга муваффақ бўлди. Ёш созандалар ва ижрочилар ўзларининг машаққатли меҳнати ва муносиб ғалабаси учун диплом ва қимматбаҳо эсдалик совғаларини бевосита Ўзбекистон халқ артисти Муножот Йўлчиева ҳамда Республика “Келажак” маркази директори Индира Холдароваларнинг қўлларидан қабул қилиб олдилар.

Бундай юксак эътироф ва ютуқ нафақат “Ғунча” жамоаси аъзолари, балки бутун туманимиз ёшлари учун катта мотивация бўлиб хизмат қилади. Бу каби кўрик-танловлар эса ўсиб келаётган ёш авлод қалбида миллий санъатимизга бўлган муҳаббатни янада мустаҳкамлашга, уларнинг ижодий салоҳиятини юзага чиқаришга ҳамда мактабдан ташқари таълим тизимининг самарадорлигини оширишга ўзининг беқиёс ҳиссасини қўшади.