Амударё туманида қишлоқ хўжалиги жараёнлари ва янги лойиҳалар кўздан кечирилди

Бугунги кунда Амударё туманида қишлоқ хўжалиги соҳасидаги энг муҳим агротехник тадбирлар уюшқоқлик билан амалга оширилмоқда. Айни вақтда миришкор деҳқонларимизнинг асосий эътибори ғалла ўрими мавсумини қисқа муддатларда, ҳеч қандай йўқотишларсиз ва сифатли даражада якунлашга, шунингдек, пахта майдонларида барча зарур агротехник ишларни ўз вақтида бажаришга қаратилган.

Етиштирилган мўл дон ҳосилини нес-нобуд қилмасдан ўриб-йиғиб олиш мақсадида барча мавжуд замонавий техника воситалари ҳамда малакали механизаторлар сафарбар этилган. Далаларда ўрим комбайнлари узлуксиз фаолият олиб бормоқда ва бунинг натижасида йиғиб олинган ҳосилни қабул қилиш масканларига узлуксиз ва тизимли равишда етказиб бериш чоралари кўрилмоқда. Соҳа масъуллари томонидан ўрим-йиғим жараёнлари доимий назорат қилиниб, техника ҳамда ёнғин хавфсизлиги қоидаларига қатъий риоя этилиши таъминланмоқда.

Шу билан бирга, туманнинг пахта майдонларида агротехник тадбирлар жадал суръатларда олиб борилмоқда. Жумладан, ғўза қатор ораларига ишлов бериш, ўсимликни меъёрида суғориш, минерал ўғитлар билан вақтида озиқлантириш, шунингдек, турли хил зараркунандалар ҳамда касалликларга қарши курашиш ишлари белгиланган режа асосида амалга оширилмоқда. Малакали мутахассислар томонидан ҳар бир майдон ҳолати жойида ўрганилиб, фермер ва деҳқонларга зарур амалий тавсиялар бериб борилмоқда.

Таъкидлаш жоизки, ғалла ўримини юқори уюшқоқлик билан якунлаш ва ғўза парваришида агротехник талабларга тўлиқ амал қилиш келгуси ҳосилдорликни таъминлашда муҳим аҳамият касб этади. Бу мақсад йўлида Амударё туманидаги барча масъул ташкилотлар, фермер хўжаликлари ва қишлоқ меҳнаткашлари ҳамжиҳатликда самарали меҳнат қилмоқдалар. Бу машаққатли меҳнат биринчи навбатда аҳолини кундалик сифатли озиқ-овқат маҳсулотлари билан таъминлаш, юртимизнинг экспорт салоҳиятини ошириш ҳамда мамлакатимизнинг озиқ-овқат хавфсизлигини мустаҳкамлашга бевосита хизмат қилади.

Ушбу жараёнларни янада жадаллаштириш ва қишлоқ меҳнаткашларини қўллаб-қувватлаш мақсадида 9 июнь куни Ўзбекистон фермерлари кенгаши бўлим бошлиғи Барно Мирзамова, Қорақалпоғистон фермерлари кенгаши раиси ўринбосари Алланиёз Ажимов, туман фермерлар кенгаши раиси Илхом Палванов ҳамда кенгаш агрономи Жавлон Ражабовлар иштирокида фермер хўжаликлари далаларида ўрганиш ишлари олиб борилди.

Мутасаддилар томонидан қишлоқ хўжалиги ходимларига Ўзбекистон Республикаси Президентининг 2026 йил 8 майдаги “Пахта ва буғдой етиштирувчиларни молиявий қўллаб-қувватлашнинг қўшимча чора-тадбирлари тўғрисида”ги Фармонида белгилаб берилган имтиёзлардан келиб чиққан ҳолда ишларни амалга ошириш бўйича батафсил тушунтиришлар берилди.

Ташриф давомида ишчи гуруҳ вакиллари туманнинг Бобур номли овули ҳудудида фаолият юритаётган “Равшанбек Амирхон” фермер хўжалигининг ғалла майдонларида бўлиб, ўрим-йиғим мавсумига кўрилган тайёргарлик ишлари билан танишдилар ва ўзларининг керакли тавсияларини бердилар.

Шундан сўнг масъуллар Ўзбекистон Республикаси Президентининг 2025 йил 31 октябрдаги “Аҳолини озиқ-овқат маҳсулотлари билан барқарор таъминлашга доир қўшимча чора-тадбирлар тўғрисида”ги қарори ижроси доирасида жойларда амалга оширилаётган янги лойиҳалар билан яқиндан танишиш мақсадида “Умид Азимхўжа” фермер хўжалигида бўлдилар. Бу ерда амалга оширилаётган ишлар, яратилган шарт-шароитлар ҳамда хўжаликнинг истиқболли режалари атрофлича ўрганилди.

Қарор ижроси доирасида мазкур ҳудудда аҳоли бандлигини ва озиқ-овқат хавфсизлигини таъминлаш, фермерлик ва тадбиркорлик фаолиятини ҳар томонлама қўллаб-қувватлашга қаратилган кўплаб лойиҳалар босқичма-босқич амалга оширилмоқда. Хусусан, маҳсулот етиштириш ҳажмини ошириш, қишлоқ хўжалиги маҳсулотларини сақлаш ва чуқур қайта ишлаш имкониятларини кенгайтириш, замонавий технологияларни жорий этиш ҳамда янги иш ўринларини яратишга катта эътибор қаратилмоқда.

Ташриф якунида мутасаддилар томонидан мазкур лойиҳаларнинг иқтисодий самарадорлигини янада ошириш, аҳоли даромадларини кўпайтириш ва ҳудуднинг умумий иқтисодий салоҳиятини мустаҳкамлаш бўйича тегишли тавсиялар берилди.

Давлатимиз томонидан яратилаётган шароитлар ва берилаётган имтиёзлар, шунингдек, соҳадаги тизимли ислоҳотлар яқин келажакда туман қишлоқ хўжалигини ривожланишнинг янги босқичига олиб чиқади ҳамда эл фаровонлигини таъминлашда ўзининг улкан натижаларини беради.