Amudaryo tumanida qishloq xoʻjaligi jarayonlari va yangi loyihalar koʻzdan kechirildi

Bugungi kunda Amudaryo tumanida qishloq xoʻjaligi sohasidagi eng muhim agrotexnik tadbirlar uyushqoqlik bilan amalga oshirilmoqda. Ayni vaqtda mirishkor dehqonlarimizning asosiy eʼtibori gʻalla oʻrimi mavsumini qisqa muddatlarda, hech qanday yoʻqotishlarsiz va sifatli darajada yakunlashga, shuningdek, paxta maydonlarida barcha zarur agrotexnik ishlarni oʻz vaqtida bajarishga qaratilgan.

Yetishtirilgan moʻl don hosilini nes-nobud qilmasdan oʻrib-yigʻib olish maqsadida barcha mavjud zamonaviy texnika vositalari hamda malakali mexanizatorlar safarbar etilgan. Dalalarda oʻrim kombaynlari uzluksiz faoliyat olib bormoqda va buning natijasida yigʻib olingan hosilni qabul qilish maskanlariga uzluksiz va tizimli ravishda yetkazib berish choralari koʻrilmoqda. Soha masʼullari tomonidan oʻrim-yigʻim jarayonlari doimiy nazorat qilinib, texnika hamda yongʻin xavfsizligi qoidalariga qatʼiy rioya etilishi taʼminlanmoqda.

Shu bilan birga, tumanning paxta maydonlarida agrotexnik tadbirlar jadal surʼatlarda olib borilmoqda. Jumladan, gʻoʻza qator oralariga ishlov berish, oʻsimlikni meʼyorida sugʻorish, mineral oʻgʻitlar bilan vaqtida oziqlantirish, shuningdek, turli xil zararkunandalar hamda kasalliklarga qarshi kurashish ishlari belgilangan reja asosida amalga oshirilmoqda. Malakali mutaxassislar tomonidan har bir maydon holati joyida oʻrganilib, fermer va dehqonlarga zarur amaliy tavsiyalar berib borilmoqda.

Taʼkidlash joizki, gʻalla oʻrimini yuqori uyushqoqlik bilan yakunlash va gʻoʻza parvarishida agrotexnik talablarga toʻliq amal qilish kelgusi hosildorlikni taʼminlashda muhim ahamiyat kasb etadi. Bu maqsad yoʻlida Amudaryo tumanidagi barcha masʼul tashkilotlar, fermer xoʻjaliklari va qishloq mehnatkashlari hamjihatlikda samarali mehnat qilmoqdalar. Bu mashaqqatli mehnat birinchi navbatda aholini kundalik sifatli oziq-ovqat mahsulotlari bilan taʼminlash, yurtimizning eksport salohiyatini oshirish hamda mamlakatimizning oziq-ovqat xavfsizligini mustahkamlashga bevosita xizmat qiladi.

Ushbu jarayonlarni yanada jadallashtirish va qishloq mehnatkashlarini qoʻllab-quvvatlash maqsadida 9-iyun kuni Oʻzbekiston fermerlari kengashi boʻlim boshligʻi Barno Mirzamova, Qoraqalpogʻiston fermerlari kengashi raisi oʻrinbosari Allaniyoz Ajimov, tuman fermerlar kengashi raisi Ilxom Palvanov hamda kengash agronomi Javlon Rajabovlar ishtirokida fermer xoʻjaliklari dalalarida oʻrganish ishlari olib borildi.

Mutasaddilar tomonidan qishloq xoʻjaligi xodimlariga Oʻzbekiston Respublikasi Prezidentining 2026-yil 8-maydagi “Paxta va bugʻdoy yetishtiruvchilarni moliyaviy qoʻllab-quvvatlashning qoʻshimcha chora-tadbirlari toʻgʻrisida”gi Farmonida belgilab berilgan imtiyozlardan kelib chiqqan holda ishlarni amalga oshirish boʻyicha batafsil tushuntirishlar berildi.

Tashrif davomida ishchi guruh vakillari tumanning Bobur nomli ovuli hududida faoliyat yuritayotgan “Ravshanbek Amirxon” fermer xoʻjaligining gʻalla maydonlarida boʻlib, oʻrim-yigʻim mavsumiga koʻrilgan tayyorgarlik ishlari bilan tanishdilar va oʻzlarining kerakli tavsiyalarini berdilar.

Shundan soʻng masʼullar Oʻzbekiston Respublikasi Prezidentining 2025-yil 31-oktyabrdagi “Aholini oziq-ovqat mahsulotlari bilan barqaror taʼminlashga doir qoʻshimcha chora-tadbirlar toʻgʻrisida”gi qarori ijrosi doirasida joylarda amalga oshirilayotgan yangi loyihalar bilan yaqindan tanishish maqsadida “Umid Azimxoʻja” fermer xoʻjaligida boʻldilar. Bu yerda amalga oshirilayotgan ishlar, yaratilgan shart-sharoitlar hamda xoʻjalikning istiqbolli rejalari atroflicha oʻrganildi.

Qaror ijrosi doirasida mazkur hududda aholi bandligini va oziq-ovqat xavfsizligini taʼminlash, fermerlik va tadbirkorlik faoliyatini har tomonlama qoʻllab-quvvatlashga qaratilgan koʻplab loyihalar bosqichma-bosqich amalga oshirilmoqda. Xususan, mahsulot yetishtirish hajmini oshirish, qishloq xoʻjaligi mahsulotlarini saqlash va chuqur qayta ishlash imkoniyatlarini kengaytirish, zamonaviy texnologiyalarni joriy etish hamda yangi ish oʻrinlarini yaratishga katta eʼtibor qaratilmoqda.

Tashrif yakunida mutasaddilar tomonidan mazkur loyihalarning iqtisodiy samaradorligini yanada oshirish, aholi daromadlarini koʻpaytirish va hududning umumiy iqtisodiy salohiyatini mustahkamlash boʻyicha tegishli tavsiyalar berildi.

Davlatimiz tomonidan yaratilayotgan sharoitlar va berilayotgan imtiyozlar, shuningdek, sohadagi tizimli islohotlar yaqin kelajakda tuman qishloq xoʻjaligini rivojlanishning yangi bosqichiga olib chiqadi hamda el farovonligini taʼminlashda oʻzining ulkan natijalarini beradi.