Амударё тумани ҳокимининг навбатдаги шахсий қабули бўлиб ўтди

Аҳоли билан бевосита мулоқот қилиш, уларнинг дарду ташвишларини тинглаш ва ҳудудлардаги ижтимоий-иқтисодий масалаларни жойида ҳал этиш маҳаллий ижро этувчи ҳокимият органларининг энг устувор вазифаларидан бирига айланган. Шу мақсадда фуқароларнинг кундалик ҳаётида учраётган энг долзарб муаммоларни чуқур ўрганиш ҳамда уларга ўз вақтида, қонуний ечим топиш мақсадида 10 июль куни Амударё тумани ҳокими Собир Хўжаметовнинг аҳоли ва тадбиркорлар учун навбатдаги шахсий қабули бўлиб ўтди.

Очиқ ва самимий мулоқот руҳида ўтган мазкур қабул давомида жами 44 нафар жисмоний шахс иштирок этиб, улар томонидан турли соҳаларга оид 49 та масала бўйича мурожаатлар келиб тушди. Келиб тушган мурожаатларнинг салмоқли қисмини ижтимоий ҳимоя, бандлик ва тадбиркорликни қўллаб-қувватлашга қаратилган масалалар ташкил этди.

Хусусан, аҳоли томонидан ёшлар ва хотин-қизларни ишга жойлаштириш, жумладан, тиббиёт бирлашмаси, "Манғит деҳқон" бозори ҳамда Қипчоқ давлат ўрмон хўжалиги каби ташкилотларда доимий бандликни таъминлаш, шунингдек, субсидия асосида тикув машинаси ва мотоцикл ажратиш, моддий ёрдам кўрсатиш ҳамда пиллачилик йўналишида ажратилган кредитни мақсадли йўналтириш учун пластик картага тушириб бериш каби талаблар илгари сурилди. Бундан ташқари, баъзи фуқаролар томонидан нодавлат таълим ташкилотидан иш ҳақини ундиришда амалий ёрдам сўралди.

Мурожаатларнинг аксарияти уй-жой, ер ва кадастр масалалари билан боғлиқ бўлди. Қабулда иштирок этган қатор фуқаролар ўз яшаш жойларини таъмирлаш учун уста ва қурилиш материаллари, хусусан, ғишт ажратишда ҳамда янгидан уй-жой қуришда кўмак беришни сўрашди. Шу билан бирга, мурожаатчилар кўчма савдо дўкони қуриш учун ер участкаси ажратиш, ер ва турар-жой чегараларини аниқ белгилаб бериш, ноқонуний қурилмаларни бартараф этиш, аукцион орқали олинган ер тўловларини амалга оширишда енгиллик яратиш ҳамда кадастр ҳужжатларини расмийлаштиришга оид муаммолар бўйича туман ҳокимидан амалий ёрдам сўрадилар.

Коммунал хизмат кўрсатиш, инфратузилмани яхшилаш ва экологик ҳолатга доир масалалар ҳам диққат марказида бўлди. Ҳудудлардаги шароитларни яхшилаш мақсадида ички кўчаларга тош ётқизиш, янги ичимлик суви тармоқларини тортиш, электр энергияси таъминотини барқарорлаштириш учун симёғочлар ўрнатиш ёки уларни ва трансформаторларни хавфсизроқ жойга кўчириш, шунингдек, замонавий қуёш панелларини ўрнатиш бўйича ҳам мурожаатлар келиб тушди.

Атроф-муҳит ва санитария ҳолати бўйича эса фуқаролар томонидан тош майдалаш заводларидан ҳавога кўтарилаётган чанг миқдорини назорат қилиш ва чора кўриш, маиший чиқиндиларни ўз вақтида олиб чиқиб кетиш, кўчадаги ноқонуний контейнерларни олиб ташлаш ҳамда қўшнилар ўртасидаги санитария қоидаларига зид қурилмалар юзасидан келиб чиққан низолар баён этилди. Булардан ташқари, шахсий турмуш билан боғлиқ бўлган ҳуқуқ-тартибот масалалари бўйича мурожаатлар ҳам кўриб чиқилди.

Шахсий қабул давомида кўтарилган ҳар бир масала тегишли тартибда рўйхатга олиниб, уларнинг аксариятига шу жойнинг ўзида ҳуқуқий тушунтиришлар берилди. Ижроси маълум вақт ва ўрганиш талаб этадиган, назоратга олинган мурожаатлар бўйича эса туман ҳокими томонидан тегишли соҳа раҳбарларига, мутасадди ташкилотлар ва муассасалар масъулларига муаммоларни қонуний ва ижобий ҳал қилиш юзасидан аниқ муддатли топшириқлар берилди.

Маҳаллий ҳокимият органларининг бу каби очиқ мулоқотлари фуқароларни қийнаб келаётган муаммоларга барҳам бериш, уларнинг давлат идораларига бўлган ишончини янада мустаҳкамлаш ва халқ розилигини таъминлашга хизмат қилади.