Cайёр қабулда аҳоли муаммолари ўрганилди
Халқ билан мулоқот қилиш, аҳолини қийнаб келаётган муаммоларни жойида ўрганиб, уларга ўз вақтида ечим топиш бугунги куннинг энг устувор вазифаларидан бирига айланган. Давлат ва халқ ўртасидаги ўзаро ишончни мустаҳкамлаш, фуқароларнинг кундалик турмуш фаровонлигини ошириш мақсадида жойларда мунтазам равишда учрашувлар ташкил этиб келинмоқда.
Амударё тумани ҳокимлиги томонидан Тор ёп маҳалла фуқаролар йиғинида аҳоли ва тадбиркорлар иштирокида ўтказилган навбатдаги сайёр қабулнинг асосий мақсади ҳам ҳудуддаги тадбиркорларнинг энг долзарб муаммоларини ўрганиш, аҳоли мурожаатлари билан ишлаш тизимини таҳлил қилиш юзасидан олиб борилаётган ишлар кўламини кенгайтиришдан иборат бўлди. Сайёр қабул давомида туман ҳокими Тор ёп маҳалласидаги фуқаролар билан бевосита юзма-юз учрашиб, уларнинг дарду ташвишларини, таклиф ва мулоҳазаларини тинглади.
Очиқ ва конструктив руҳда ўтган мулоқот жараёнида жами 9 нафар жисмоний шахс томонидан 13 та турли мазмундаги мурожаатлар келиб тушди. Аҳоли томонидан кўтарилган масалаларнинг аксарияти кундалик турмуш шароитини яхшилаш, ҳудуд инфратузилмасини ривожлантириш ва ижтимоий соҳаларни қўллаб-қувватлашга қаратилган бўлиб, уларнинг барчаси ҳокимлик томонидан алоҳида назоратга олинди.
Келиб тушган мурожаатларни соҳалар кесимида умумлаштирадиган бўлсак, инфратузилма йўналишида ички кўча йўлларини текислаш учун махсус техника ажратиш ҳамда таъмирталаб йўлларга тош ётқизишда амалий ёрдам кўрсатиш масалалари ўртага ташланди. Электр энергияси таъминотидаги камчиликлар, хусусан, тармоқдаги кучланишнинг пастлиги ҳамда хавфсизлик талабларига жавоб бермай қолган эски симёғочларни янгисига алмаштириш зарурати аҳолини энг кўп қийнаётган муаммолардан бири эканлиги маълум бўлди. Шунингдек, ижтимоий соҳа ва қишлоқ хўжалиги йўналишида ҳудуддаги қишлоқ врачлик пункти фаолиятини қайта йўлга қўйиш орқали тиббий хизмат сифатини ошириш, аҳоли томорқаларини суғориш учун оқар сув етказиб бериш каби долзарб масалалар юзасидан ҳам ёрдам сўралди. Ҳудуднинг экологик ҳолатини яхшилаш мақсадида сув йиғиш коллекторига ноқонуний равишда чиқинди ташлаган шахсларга нисбатан қатъий чора кўриш масаласи ҳам фуқаролар томонидан алоҳида таъкидлаб ўтилди.
Сайёр қабул давомида назоратга олинган ҳар бир мурожаат юзасидан туман ҳокимининг ўринбосарлари, тегишли идора ва ташкилотлар раҳбарларига кўтарилган муаммоларни ижобий ва тезкор ҳал қилиш, зарур чора-тадбирларни белгилаш юзасидан қатъий топшириқлар берилди. Хусусан, мутасаддиларга келиб тушган барча мурожаатларнинг ижросини назоратга олиб, уларни Ўзбекистон Республикасининг “Жисмоний ва юридик шахсларнинг мурожаатлари тўғрисида”ги қонунига мувофиқ белгиланган тартибда кўриб чиқилишини таъминлаш вазифаси юклатилди. Мазкур мулоқот якунларига кўра, кўтарилган ҳар бир масаланинг ечими бўйича амалга оширилган ишлар натижаси юзасидан мурожаат эгаларига ёзма равишда батафсил маълумот тақдим этилиши айтилди.
Бу каби очиқ мулоқотлар аҳоли муаммоларини фақатгина қоғозда эмас, балки амалда, жойига чиққан ҳолда ҳал этишга хизмат қилиб, фуқароларнинг эртанги кунга бўлган ишончини янада мустаҳкамлайди. Ҳудудларда инфратузилмани яхшилаш, ободонлаштириш ишларини жадаллаштириш ва аҳолининг турмуш фаровонлигини янада яхшилаш йўлидаги бундай амалий қадамлар маҳаллалар қиёфасини тубдан ўзгартиришга ҳамда юртдошларимизнинг ҳаётдан рози бўлиб яшашига замин яратади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
