Cayyor qabulda aholi muammolari oʻrganildi

Xalq bilan muloqot qilish, aholini qiynab kelayotgan muammolarni joyida oʻrganib, ularga oʻz vaqtida yechim topish bugungi kunning eng ustuvor vazifalaridan biriga aylangan. Davlat va xalq oʻrtasidagi oʻzaro ishonchni mustahkamlash, fuqarolarning kundalik turmush farovonligini oshirish maqsadida joylarda muntazam ravishda uchrashuvlar tashkil etib kelinmoqda.

Amudaryo tumani hokimligi tomonidan Tor yop mahalla fuqarolar yigʻinida aholi va tadbirkorlar ishtirokida oʻtkazilgan navbatdagi sayyor qabulning asosiy maqsadi ham hududdagi tadbirkorlarning eng dolzarb muammolarini oʻrganish, aholi murojaatlari bilan ishlash tizimini tahlil qilish yuzasidan olib borilayotgan ishlar koʻlamini kengaytirishdan iborat boʻldi. Sayyor qabul davomida tuman hokimi Tor yop mahallasidagi fuqarolar bilan bevosita yuzma-yuz uchrashib, ularning dardu tashvishlarini, taklif va mulohazalarini tingladi.

Ochiq va konstruktiv ruhda oʻtgan muloqot jarayonida jami 9 nafar jismoniy shaxs tomonidan 13 ta turli mazmundagi murojaatlar kelib tushdi. Aholi tomonidan koʻtarilgan masalalarning aksariyati kundalik turmush sharoitini yaxshilash, hudud infratuzilmasini rivojlantirish va ijtimoiy sohalarni qoʻllab-quvvatlashga qaratilgan boʻlib, ularning barchasi hokimlik tomonidan alohida nazoratga olindi.

Kelib tushgan murojaatlarni sohalar kesimida umumlashtiradigan boʻlsak, infratuzilma yoʻnalishida ichki koʻcha yoʻllarini tekislash uchun maxsus texnika ajratish hamda taʼmirtalab yoʻllarga tosh yotqizishda amaliy yordam koʻrsatish masalalari oʻrtaga tashlandi. Elektr energiyasi taʼminotidagi kamchiliklar, xususan, tarmoqdagi kuchlanishning pastligi hamda xavfsizlik talablariga javob bermay qolgan eski simyogʻochlarni yangisiga almashtirish zarurati aholini eng koʻp qiynayotgan muammolardan biri ekanligi maʼlum boʻldi. Shuningdek, ijtimoiy soha va qishloq xoʻjaligi yoʻnalishida hududdagi qishloq vrachlik punkti faoliyatini qayta yoʻlga qoʻyish orqali tibbiy xizmat sifatini oshirish, aholi tomorqalarini sugʻorish uchun oqar suv yetkazib berish kabi dolzarb masalalar yuzasidan ham yordam soʻraldi. Hududning ekologik holatini yaxshilash maqsadida suv yigʻish kollektoriga noqonuniy ravishda chiqindi tashlagan shaxslarga nisbatan qatʼiy chora koʻrish masalasi ham fuqarolar tomonidan alohida taʼkidlab oʻtildi.

Sayyor qabul davomida nazoratga olingan har bir murojaat yuzasidan tuman hokimining oʻrinbosarlari, tegishli idora va tashkilotlar rahbarlariga koʻtarilgan muammolarni ijobiy va tezkor hal qilish, zarur chora-tadbirlarni belgilash yuzasidan qatʼiy topshiriqlar berildi. Xususan, mutasaddilarga kelib tushgan barcha murojaatlarning ijrosini nazoratga olib, ularni Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi qonuniga muvofiq belgilangan tartibda koʻrib chiqilishini taʼminlash vazifasi yuklatildi. Mazkur muloqot yakunlariga koʻra, koʻtarilgan har bir masalaning yechimi boʻyicha amalga oshirilgan ishlar natijasi yuzasidan murojaat egalariga yozma ravishda batafsil maʼlumot taqdim etilishi aytildi.

Bu kabi ochiq muloqotlar aholi muammolarini faqatgina qogʻozda emas, balki amalda, joyiga chiqqan holda hal etishga xizmat qilib, fuqarolarning ertangi kunga boʻlgan ishonchini yanada mustahkamlaydi. Hududlarda infratuzilmani yaxshilash, obodonlashtirish ishlarini jadallashtirish va aholining turmush farovonligini yanada yaxshilash yoʻlidagi bunday amaliy qadamlar mahallalar qiyofasini tubdan oʻzgartirishga hamda yurtdoshlarimizning hayotdan rozi boʻlib yashashiga zamin yaratadi.