Темир йўл соҳаси фахрийлари касб байрами муносабати билан дийдорлашдилар
Юртимизда 2017 йилдан буён август ойининг биринчи якшанбаси Темир йўл транспорти ходимлари куни сифатида кенг нишонланиб келинмоқда. Бугунги кунда республикамизда замонавий инфратузилмага эга бўлган, аҳоли ва иқтисодиёт тармоқлари эҳтиёжларини тўлақонли таъминлай оладиган яхлит темир йўл тармоқлари кириб бормаган биронта ҳам ҳудуд йўқ ҳисоби. Ушбу кенг кўламли тармоқнинг тарихига назар ташласак, Амударё туманида ҳам 1968-1969 йилларда Жумуртов тоғ-кон ҳудудида дастлабки темир йўл тармоғи қурилиб, Жумуртов станцияси ташкил этилган эди. Мазкур станция узоқ йиллар давомида минтақа саноатига хизмат қилди. У 1985 йилдан бошлаб Урганч локомотив депоси таркибида, 2000 йилдан эса Қўнғирот локомотив депоси таркибида фаолият олиб борди. 2008 йилга келиб Жумуртов станцияси фаолияти тугатилди, бу ерда меҳнат қилган фидойи ходимлар эса “Ўзбекистон темир йўллари” акциядорлик жамияти тасарруфидаги Қораўзак станциясида ўз фаолиятларини давом эттирдилар ва уларнинг аксарияти айнан шу маскандан пенсияга чиқдилар.
Жорий йилнинг 2 август куни Темир йўл транспорти ходимлари куни муносабати билан ўзларининг илк касбий фаолиятларини Жумуртов станциясида бошлаган, 1970 йиллардан эътиборан ушбу шарафли соҳага кириб келиб, то нафақага чиққунларига қадар машинист вазифасида меҳнат қилган собиқ ҳамкасбларнинг дийдорлашув кечаси бўлиб ўтди. Ўз ҳаётининг энг гўзал йилларини ва бутун куч-ғайратини темир йўл транспорти соҳасига бағишлаган фахрийлар бугунги кундаги улкан янгиланишлар, юксак тараққиёт ва ўзлари ишлаган давр ўртасидаги кескин ижобий фарқ ҳақида мамнуният билан сўз юритдилар. Албатта, бундай самимий учрашувлар ширин хотираларни ёдга солиш билан бирга, бугунги куннинг қадрига етишга ҳам ундайди.
Суҳбат давомида сўнгги йиллардаги энг йирик ва тарихий лойиҳалардан бири — Амударё устидан ўтувчи темир йўл ва автомобиль йўли қўшма кўпригининг фойдаланишга топширилиши алоҳида эътироф этилди. Ушбу иншоот нафақат халқимиз учун аср янгилиги бўлди, балки Қорақалпоғистон Республикаси ҳамда Хоразм вилоятининг ҳар томонлама равнақ топишида ўта муҳим стратегик аҳамият касб этди. Узунлиги 423 метрни ташкил қилувчи ушбу муҳташам кўприк билан бир қаторда, Хоразм вилоятининг Шовот ҳамда Қорақалпоғистоннинг Қораўзак бекатларини ўзаро боғловчи 85 километрлик темир йўл тармоғи ва 3 та энг замонавий қулайликларга эга вокзал бинолари барпо этилди. Бунинг натижасида ушбу йўналиш бўйича темир йўл масофаси 180 километрга, юк ташиш тезлиги эса 6 соатга қисқаргани соҳа фахрийлари томонидан юқори баҳоланди.
Шунингдек, фахрий темирйўлчилар Жумуртов станциясининг 2025 йилдан бошлаб ўз фаолиятини қайта тиклаганини алоҳида олқишладилар. Бу лойиҳа Қораўзак конлари ва Жумуртов тоғ-кон маҳсулотларини поездларда ташиш имкониятини кенгайтириши билан ниҳоятда аҳамиятлидир.
Халқимизда “йўл машаққатини йўлчи билади” деган теран маъноли ибора бор. Умрини пўлат излар устида, машаққатли ва шарафли йўлларда ўтказган собиқ ҳамкасблар темир йўл транспорти соҳасининг бугунги ёш мутахассисларига келгуси ишларида улкан муваффақиятлар тиладилар. Ушбу файзли ва байрамона учрашув давомида фахрийлар тадбирни юқори савияда ташкил этган ҳамкасбларига чин дилдан миннатдорчилигини билдирдилар.
Байрам баҳона дийдор кўришган, соҳадаги энг сўнгги янгиликлардан хабардор бўлиб, тўкин дастурхон атрофида ёшлик хотираларини эсга олган дўстлар давраси узоқ вақт давом этди ва барчанинг қалбига чексиз жўшқинлик ҳамда кўтаринки кайфият бағишлади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
