Болалар саломатлиги назоратда: гижжа касалликларига қарши профилактика ишлари давом этмоқда

Фарзандларимиз саломатлиги – жамиятимизнинг энг муҳим бойлиги ва келажагимиз пойдеворидир. Айниқса, ёш авлодни турли юқумли хасталиклардан асраш, уларнинг соғлом муҳитда вояга етишини таъминлаш бугунги кун тиббиётининг энг долзарб вазифаларидан бири саналади. Шу мақсадда Амударё тумани санитария-эпидемиологик осойишталик ва жамоат саломатлиги бўлими томонидан кенг кўламли профилактик тадбирлар изчил амалга оширилмоқда. Ушбу чора-тадбирлар асосан тумандаги умумтаълим мактаблари ва мактабгача таълим ташкилотларида тарбияланаётган, шунингдек, аҳоли орасидаги 10 ёшгача бўлган болалар ўртасида турли хил паразитар юқумли касалликлар, хусусан, гижжа хасталикларининг олдини олишга қаратилгандир.

Мазкур жараёнларни тизимли ва самарали ташкил этиш мақсадида туман санитария-эпидемиологик осойишталик ва жамоат саломатлиги бўлими томонидан махсус режа-график тасдиқланган. Ушбу ҳужжат туман тиббиёт бирлашмаси ҳамда Мактабгача ва мактаб таълими бўлими билан ўзаро ҳамкорликда ишлаб чиқилган бўлиб, унга кўра ҳудудда жойлашган барча таълим муассасалари қамраб олинган.

Хусусан, умумтаълим мактабларининг 1-4 синф ўқувчилари, мактабгача таълим ташкилотлари тарбияланувчилари, шунингдек, амбулатор ва стационар шароитда даволанаётган болалар орасида гижжа касалликларини эрта аниқлаш ва уларни даволаш бўйича мунтазам лаборатор текширувлари йўлга қўйилган. Жумладан, яқинда тумандаги 51- ва 5-сонли мактабгача таълим ташкилотларида ҳам жажжи тарбияланувчилар саломатлигини асраш мақсадида худди шундай махсус скрининг ва профилактика тадбирлари ташкил қилинди. Ушбу скрининг натижаларига кўра, гелминт тухумлари аниқланган уюшган ва уюшмаган болалар, шунингдек, улар билан яқин мулоқотда бўлган тенгдошларини даволаш чоралари кўрилмоқда. Малакали тиббиёт ходимлари томонидан бемор болаларга уларнинг яшаш манзиллари, мактаб синфлари ва боғча гуруҳларида махсус дори препаратлари тарқатилиб, даволаш муолажалари назоратга олинган.

Гижжа касалликларига қарши курашиш тадбирларига етарли даражада тажрибали тиббиёт ходимлари жалб этилган бўлиб, ишлар қатъий график асосида, юқори масъулият билан олиб борилмоқда. Бироқ, касалликни енгиш учун фақатгина тиббий муолажаларнинг ўзи кифоя қилмайди. Шу боисдан, таълим ва тарбия муассасаларида, маҳаллаларда уйма-уй юрган ҳолда ота-оналар ва болалар ўртасида кенг қамровли тушунтириш ва тарғибот ишлари ҳам олиб бориляпти. Мутахассислар томонидан аҳолига шахсий гигиена қоидаларига қатъий амал қилиш, хусусан, қўлларни совунлаб ювиш, тирноқларни доимий равишда калта қилиб юриш, ички кийим ва чойшабларни мунтазам алмаштириш ва уларни тўғри зарарсизлантириш муҳимлиги тушунтирилмоқда.

Паразитологик текширувларнинг асосий мақсади фақатгина хасталикни қайд этиш эмас, балки аҳоли, айниқса, болалар орасида тарқалиши мумкин бўлган инфекцияларни эрта босқичда аниқлаш, уларнинг занжирини узиш ва ҳудудда санитария-эпидемиологик барқарорликни таъминлашдир. Болалар куннинг асосий қисмини жамоавий муҳитда ўтказиши инобатга олинса, бундай жойларда битта касалланган бола орқали бошқаларга тез юқиш хавфи юқори бўлади. Шунинг учун ҳам лаборатория текширувларида турли биологик намуналар олиниб, уларда гижжа тухумлари, личинкалари ва бошқа турдаги паразитларнинг шакллари чуқур таҳлил қилинмоқда.

Шу ўринда, мактабгача таълим муассасаларида санитария-гигиена талабларига сўзсиз риоя қилиниши жуда катта аҳамиятга эга эканлигини таъкидлаш жоиз. Хоналарни мунтазам равишда тозалаш ва шамоллатиш, болаларнинг қўл ювиши учун барча зарур шароитларни яратиш, ичимлик суви ва озиқ-овқат маҳсулотларининг хавфсизлигини таъминлаш, шунингдек, ўйинчоқлар ва кундалик буюмларни тоза сақлаш каби оддий, аммо ўта муҳим қоидалар паразитар касалликларнинг олдини олишда энг асосий восита бўлиб хизмат қилади.

Хулоса ўрнида шуни алоҳида қайд этиш керакки, юқумли касалликлар, хусусан, гижжа хасталикларига қарши курашишда фақатгина тиббиёт ходимларининг меҳнати ва лаборатория текширувлари билан чекланиб бўлмайди. Бу жараёнда ҳар бир ота-онанинг, умуман олганда, бутун аҳолининг тиббий маданияти ва шахсий гигиена қоидаларига қанчалик амал қилиши ҳал қилувчи ўрин тутади.

Амударё тумани санитария-эпидемиологик осойишталик ва жамоат саломатлиги бўлими ходимлари эса паразитар касалликларни ўз вақтида аниқлаш, лаборатория таҳлилларини сифатли ҳамда белгиланган стандартлар асосида амалга ошириш, энг муҳими, касаллик ўчоқларини бартараф этиб, аҳоли саломатлигини ҳимоя қилиш йўлида ўз хизматларини узлуксиз давом эттирмоқдалар.