Bolalar salomatligi nazoratda: gijja kasalliklariga qarshi profilaktika ishlari davom etmoqda

Farzandlarimiz salomatligi – jamiyatimizning eng muhim boyligi va kelajagimiz poydevoridir. Ayniqsa, yosh avlodni turli yuqumli xastaliklardan asrash, ularning sogʻlom muhitda voyaga yetishini taʼminlash bugungi kun tibbiyotining eng dolzarb vazifalaridan biri sanaladi. Shu maqsadda Amudaryo tumani sanitariya-epidemiologik osoyishtalik va jamoat salomatligi boʻlimi tomonidan keng koʻlamli profilaktik tadbirlar izchil amalga oshirilmoqda. Ushbu chora-tadbirlar asosan tumandagi umumtaʼlim maktablari va maktabgacha taʼlim tashkilotlarida tarbiyalanayotgan, shuningdek, aholi orasidagi 10 yoshgacha boʻlgan bolalar oʻrtasida turli xil parazitar yuqumli kasalliklar, xususan, gijja xastaliklarining oldini olishga qaratilgandir.

Mazkur jarayonlarni tizimli va samarali tashkil etish maqsadida tuman sanitariya-epidemiologik osoyishtalik va jamoat salomatligi boʻlimi tomonidan maxsus reja-grafik tasdiqlangan. Ushbu hujjat tuman tibbiyot birlashmasi hamda Maktabgacha va maktab taʼlimi boʻlimi bilan oʻzaro hamkorlikda ishlab chiqilgan boʻlib, unga koʻra hududda joylashgan barcha taʼlim muassasalari qamrab olingan.

Xususan, umumtaʼlim maktablarining 1-4-sinf oʻquvchilari, maktabgacha taʼlim tashkilotlari tarbiyalanuvchilari, shuningdek, ambulator va statsionar sharoitda davolanayotgan bolalar orasida gijja kasalliklarini erta aniqlash va ularni davolash boʻyicha muntazam laborator tekshiruvlari yoʻlga qoʻyilgan. Jumladan, yaqinda tumandagi 51- va 5-sonli maktabgacha taʼlim tashkilotlarida ham jajji tarbiyalanuvchilar salomatligini asrash maqsadida xuddi shunday maxsus skrining va profilaktika tadbirlari tashkil qilindi. Ushbu skrining natijalariga koʻra, gelmint tuxumlari aniqlangan uyushgan va uyushmagan bolalar, shuningdek, ular bilan yaqin muloqotda boʻlgan tengdoshlarini davolash choralari koʻrilmoqda. Malakali tibbiyot xodimlari tomonidan bemor bolalarga ularning yashash manzillari, maktab sinflari va bogʻcha guruhlarida maxsus dori preparatlari tarqatilib, davolash muolajalari nazoratga olingan.

Gijja kasalliklariga qarshi kurashish tadbirlariga yetarli darajada tajribali tibbiyot xodimlari jalb etilgan boʻlib, ishlar qatʼiy grafik asosida, yuqori masʼuliyat bilan olib borilmoqda. Biroq, kasallikni yengish uchun faqatgina tibbiy muolajalarning oʻzi kifoya qilmaydi. Shu boisdan, taʼlim va tarbiya muassasalarida, mahallalarda uyma-uy yurgan holda ota-onalar va bolalar oʻrtasida keng qamrovli tushuntirish va targʻibot ishlari ham olib borilyapti. Mutaxassislar tomonidan aholiga shaxsiy gigiyena qoidalariga qatʼiy amal qilish, xususan, qoʻllarni sovunlab yuvish, tirnoqlarni doimiy ravishda kalta qilib yurish, ichki kiyim va choyshablarni muntazam almashtirish va ularni toʻgʻri zararsizlantirish muhimligi tushuntirilmoqda.

Parazitologik tekshiruvlarning asosiy maqsadi faqatgina xastalikni qayd etish emas, balki aholi, ayniqsa, bolalar orasida tarqalishi mumkin boʻlgan infektsiyalarni erta bosqichda aniqlash, ularning zanjirini uzish va hududda sanitariya-epidemiologik barqarorlikni taʼminlashdir. Bolalar kunning asosiy qismini jamoaviy muhitda oʻtkazishi inobatga olinsa, bunday joylarda bitta kasallangan bola orqali boshqalarga tez yuqish xavfi yuqori boʻladi. Shuning uchun ham laboratoriya tekshiruvlarida turli biologik namunalar olinib, ularda gijja tuxumlari, lichinkalari va boshqa turdagi parazitlarning shakllari chuqur tahlil qilinmoqda.

Shu oʻrinda, maktabgacha taʼlim muassasalarida sanitariya-gigiyena talablariga soʻzsiz rioya qilinishi juda katta ahamiyatga ega ekanligini taʼkidlash joiz. Xonalarni muntazam ravishda tozalash va shamollatish, bolalarning qoʻl yuvishi uchun barcha zarur sharoitlarni yaratish, ichimlik suvi va oziq-ovqat mahsulotlarining xavfsizligini taʼminlash, shuningdek, oʻyinchoqlar va kundalik buyumlarni toza saqlash kabi oddiy, ammo oʻta muhim qoidalar parazitar kasalliklarning oldini olishda eng asosiy vosita boʻlib xizmat qiladi.

Xulosa oʻrnida shuni alohida qayd etish kerakki, yuqumli kasalliklar, xususan, gijja xastaliklariga qarshi kurashishda faqatgina tibbiyot xodimlarining mehnati va laboratoriya tekshiruvlari bilan cheklanib boʻlmaydi. Bu jarayonda har bir ota-onaning, umuman olganda, butun aholining tibbiy madaniyati va shaxsiy gigiyena qoidalariga qanchalik amal qilishi hal qiluvchi oʻrin tutadi.

Amudaryo tumani sanitariya-epidemiologik osoyishtalik va jamoat salomatligi boʻlimi xodimlari esa parazitar kasalliklarni oʻz vaqtida aniqlash, laboratoriya tahlillarini sifatli hamda belgilangan standartlar asosida amalga oshirish, eng muhimi, kasallik oʻchoqlarini bartaraf etib, aholi salomatligini himoya qilish yoʻlida oʻz xizmatlarini uzluksiz davom ettirmoqdalar.