ЭЗГУ ИШЛАРГА ҚОДИР ЁШЛАРМИЗ
Мен зиёли оилада туғилганман. Эсимни таниганимдан бери бадиий адабиётга ошноман. Азиз онажоним, 3-сонли Амударё академик лицейи инглиз тили фани ўқитувчиси Орзигул Ибрагимова менинг ҳаётдаги энг яқин дўстим, маслаҳатгўйим, азиз устозим, десам муболаға қилмаган бўламан. Сабаби, азиз онажоним мен ҳали ўқиш-ёзишни билмасимдан аввал адабиётнинг сирли оламига олиб кирдилар. У кишининг айтган эртаклари дунёсида улғайдим. Қўлимдан иш келадиган бўлганида қиз бола учун энг муҳим бўлган ҳунар – пазандаликни ўргатдилар.
Туманимиздаги машҳур "Тамара-Феруза” хусусий корхонаси раҳбари, тикувчи-модельер Тамара опа Юнусовага шогирдликка берганларида ҳали кичкина қизалоқ эдим. "Ўрганганинг ўзингники, тажрибанг ошса - элники”, - дейдилар онажоним.
Баъзан битта чокнинг устида соатлаб ишлаган, устозимдан дакки эшитган пайтларимда, гарчи ўзим қизиқсам-да чеварликни ташлаб кетгим келарди. "Сабр қил, қизим, сабр-қаноат эзгу ишларга қанот беради”, - дея яна менга куч бағишларди онам.
Ҳақиқатан ҳам онажонимнинг, устозларимнинг таълим ва тарбияси боис, дилимда қатъият уйғонди, эзгулик томон шайландим гўё. 3-сонли академик лицейнинг 2-босқичини тамомлаб, таътилга чиққанимда Тошкент шаҳридаги "Машҳура” фирмасида дизайн йўналиши бўйича ўқиб, тажриба орттирдим. Буларнинг барчаси мени муваффақиятлар сари етаклади. 2009 йил ноябрь ва 2010 йил май ойларида Тошкент шаҳрида ўтказилган "Қўли гулдир ўзбек аёлин” кўргазма-ярмаркасида ўзим тиккан либослар дизайнлари билан иштирок этиб, совринли ўринни эгалладим. Шу йили "Дўппи тикдим, ипаклари тиллодан” кўрик-танловининг аввал туман, сўнгра Қорақалпоғистон Республикаси босқичида фахрли 1-ўрин соҳиби бўлдим.
Ўз устимда ишлаш, янгилик яратишга интилиш туйғуси мен учун янги муваффақиятлар сари йўл очди. Ўзбекистон маданияти ва санъати форуми жамғармаси, "Камолот” ЁИҲ марказий Кенгаши, олий ва ўрта махсус таълим Вазирликлари ҳамкорликда ўтказган "Келажак овози - 2010” кўрик-танловида "Либослар дизайни” йўналиши бўйича 1-ўринни эгалладим ҳамда ушбу йўналиш бўйича халқаро миқёсда, Москва шаҳрида бўлиб ўтадиган кўрик-танловга йўлланма олдим.
Мен Москва шаҳрида бўлиб ўтган беллашувда "Менинг дизайним” йўналиши бўйича фахрли 3-ўринни эгалладим. Қорақалпоқ миллий каштачилиги, туманимиз халқининг миллий ўзига хослигини акс эттирувчи кашталар билан безатилиб тикилган либосларим дизайни танлов ташкилотчилари томонидан юқори баҳоланди. Ушбу нуфузли халқаро танловда Ўзбекистон, Қорақалпоғистон ва менинг она элим Амударё тумани, Манғит шаҳри, ҳатто қадрдон академик лицейим номлари бир неча тилларда қайта-қайта жаранглаб, исму шарифим эътибор билан тилга олинди. Мен олиб борган чеварлик намуналари шарқона дизайндаги либослар жаҳон халқларига кўз-кўз қилинди.
Ўша лаҳзаларда мен Ўзбекистон фарзанди эканлигимдан, шу қутлуғ заминга томир отиб, униб-ўсаётганимдан фахрландим. Ва ана шу туйғу мени янада янги орзулар йўлига етаклади. 2012 йилда Низомий номидаги Тошкент Давлат Педагогика Университетининг бошланғич таълим методикаси факультетига давлат гранти асосида ўқишга кирдим.
" – Истиқболга дадил боқиб, эзгу ишларга шайланган ҳар бир ўғил-қиз менинг фахр-у ифтихорим”, - деган эди Президентимиз И.А.Каримов. Биз ёшларнинг истиқболимиз, кела-жагимиз учун мамлакатимизда буюк имкон эшиклари ҳамиша очиқ экан, ҳар биримиз эзгу ишлар, улуғвор кашфиётлар қилишга қодирмиз.
Зуҳра ЕРНАФАСОВА,
Тошкент Давлат Педагогика Университети
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
