Янги иш ўринлари кўпаймоқда

Ҳар бир шахс меҳнат қилиш, эркин касб танлаш, адолатли меҳнат шароитларида ишлаш ва қонунда кўрсатилган тартибда ишсизликдан ҳимояланиш ҳуқуқига эгадир.

Ўзбекистон Республикаси Конституциясининг

37-моддасидан.

Мамлакатимизда истиқлол йилларида фуқароларнинг тинч-осойишта яшаши, ўз қобилият ва интилишларига яраша меҳнат қилиши, ўз меҳнатлари туфайли тўқ ва фаровон умр кечиришларига эришишлари учун ғамхўрлик тобора кучайтирилмоқда. Бунда ишга яроқли аҳолининг иш билан бандлигига эришиш жуда муҳим ўрин тутади. Ахир бирон фаолият тури билан банд бўлмай туриб, оила фаровонлигини таъминлаш ҳақида гап ҳам бўлиши мумкин эмас-да.

Юртимизнинг ҳар бир фуқароси Асосий Қонунимизда белгилаб қўйилганидек "... Меҳнат қилиш, эркин касб танлаш, адолатли меҳнат шароитларида ишлаш ва қонунда белгиланган тартибда ишсизликдан ҳимояланиш ҳуқуқига эгадир”.

Туманимизда фуқароларнинг иш билан бандлигини таъминлаш, ишга яроқли ишсиз фуқаролар учун янги иш ўринларини ташкил этиш, уларнинг ижтимоий муҳофазасини кучайтиришга алоҳида эътибор қаратилмоқда.

Жорий йил учун 5231 та янги иш ўринлари яратиш, шундан 150 таси янги ишлаб чиқариш объектларини ишга тушириш, мавжуд корхоналарни кенгайтириш ва қувватларини ошириш ҳисобига, 2288 таси кичик корхона ва микрофирмалар ташкил қилиш ҳисобига, 270 таси якка тартибдаги тадбиркорликни қўллаб-қувватлаш ҳисобига, 1232 таси фермер хўжаликларини ривожлантириш ҳисобига, 936 таси уй меҳнатининг барча шаклларини ташкил этиш ҳисобига, 329 таси ишлаб чиқариш инфратузилмасини ривожлантириш ҳисобига, 26 таси ишламаётган корхоналар фаолиятини тиклаш ҳисобига режалаштирилган эди.

Йилимизнинг ўтган даври мобайнида 4871 та ўрнига 4969 та янги иш ўринлари яратилиб, белгиланган режа 102 фоизга бажарилди. Иш ўринларининг йўналишлар кесимида бажарилиши эса янги ишлаб чиқариш объектларини ишга тушириш ва ташкил этиш ҳисобидан 128 та, кичик корхоналар ва микрофирмаларни ташкил қилиш ва кенгайтириш ҳисобидан 1923 та, хусусий тадбиркорликни ривожлантириш бўйича 242 та, касаначиликнинг барча шаклларини ташкил этиш ҳисобидан 851 та, фермер хўжаликларини ривожлантириш ҳисобидан 1057 та, ижтимоий инфратузилма ва аҳоли пунктларини ободонлаштириш ҳисобидан 294 та, ишламаётган корхоналар фаолиятини тиклаш ҳисобидан эса 22 та янги иш ўринлари яратилди.

Йилимизнинг ўтган 11 ойи давомида 8 марта бўш иш ўринлари ярмаркалари ўтказилди ва унда 224 та корхона, ташкилотлар ўзларининг мавжуд 918 та бўш иш ўринлари билан иштирок этди.

Ярмаркаларда туманимизнинг ишга яроқли ишсиз 633 нафар аҳолиси ишга жойлашиш учун йўлланма олиш имкониятига эга бўлдилар, 264 нафар фуқарога эса тегишли маслаҳатлар берилди.

Янги иш ўринларини яратиш ва шу баробарида аҳолининг иш билан бандлигини таъминлашга эътибор кучайтирилаверади.

М.МАТКАРИМОВ,

туман Бандликка кўмаклашиш ва аҳолини ижтимоий муҳофаза қилиш маркази директори.