ХЎЖАЛИКЛАРАРО АВТОМОБИЛЬ ЙЎЛЛАРИ ҲОЛАТИНИ ЯХШИЛАШ ВА ОБОДОНЛАШТИРИШНИ ТАШКИЛ ЭТИШГА ДОИР МАХСУС-ТАКТИК ЎҚУВ МАШҚЛАРИ ЎТКАЗИЛМОҚДА

Амударё туманида Фавқулодда вазиятлар бўлими ва бошқа тегишли ташкилотлар ҳамкорлигида “Туман ҳудудидаги ички хўжаликлараро автомобиль йўллари ҳолатини яхшилаш ва ободонлаштириш ташкил этиш” мавзусида ўн кун давом этадиган махсус-тактик ўқув машғулотлари давом этмоқда.

Туман ҳокими – Фуқаро муҳофазаси бошлиғининг 2022 йил 30 сентябрь кунги тегишли буйруғига асосан шу йил 1 октябрь куни Тўлқин овули ҳудудидан бошланган ушбу махсус-тактик ўқув машқига Қорақалпоғистон Республикаси Фавқулодда вазиятлар бошқармаси бошлиғининг биринчи ўринбосари, штаб бошлиғи Бахтиёр Ўразбоев раҳбарлик қилди. Тўлқин овули ҳудудидаги ички хўжаликлараро автомобиль йўллари ҳолатини яхшилаш ва ободонлаштиришни ташкил этиш мақсадида ўтказилган мазкур махсус-тактик ўқув машқига 37 нафар шахсий таркиб ва 17 та махсус техникалар жалб қилинди.

Ўқув машқи машғулотлари саф кўриги билан бошланди. Унда туман Фавқулодда вазиятлар давлат тузилмаси қуйи тизими хизматлари ва фуқаро муҳофазаси “Йиғма командаси”, жалб этилган техникаларнинг машғулотларга тайёрлиги текширувдан ўтказилди. Саф кўриги давомида мазкур тадбирнинг 1 октябрдан 10 октябрга қадар давом этиши, ўқув машқи давомида таъмирланиши керак бўлган ички йўллар харитаси белгилаб берилгани, ҳудудда ободонлаштириш ишлари амалга оширилиши лозимлиги тушунтирилди.

Шундан сўнг, тегишли ташкилотлар ходимлари ва махсус техникаларни ободонлаштириш ишларига жалб этишга доир топшириқлар берилди ва ўқув машқининг амалий қисми машғулотлари бошлаб юборилди.

Маълумки, туманда 2022 йилда ижтимоий-иқтисодий муаммолари энг кўп бўлган Аёқчи маҳалласи ҳамда Тўлқин овули ҳудудлари “Обод қишлоқ” ва “Обод маҳалла” давлат дастурига киритилган.

Дастур доирасида жами 20,7 млрд. сўм маблағ ажратилиши режалаштирилган. Шундан республика бюджетидан 10,8 млрд. сўм, Қорақалпоғистон Республикаси маҳаллий бюджети маблағларидан 5,1 млрд. сўм, тармоқ корхоналаридан 1,1 млрд. сўм, аҳоли, тадбиркор ва ҳомийлар маблағлари ҳисобидан 3,8 млрд. сўм ажратилиши кўзда тутилган.

Ҳозирги кунда Тўлқин овули ҳудудидаги 24-сонли мактабгача таълим ташкилоти биносини 1 млрд. 132 млн. сўм маблағ эвазига мукаммал таъмирлаш бўйича пудратчи ташкилот “Темир бетон” масъулияти чекланган жамияти томонидан 1 млрд. 75,3 млн. сўмлик, яъни 95 фоиз қурилиш ишлари бажарилиб бўлинди ва қолган қисми белгиланган муддатга қадар тугатилиши мўлжалланган.

Ҳудудда 4,4 км. узунликдаги газ қувурларини, 19 та газ тақсимлаш пунктларини таъмирлаш режалаштирилган бўлиб, бугунги кунгача 3 км. узунликдаги газ қувурлари ва 19 та газ тақсимлаш пунктларини таъмирланди.

Шунингдек, 2 км. узунликдаги пиёдалар йўлакчасини қуриш ишлари “Санжар диёр билдинг” масъулияти чекланган жамияти томонидан амалга оширилмоқда. Ундан ташқари, туман ҳокимлиги ва прокуратурасининг ташаббуси билан овулнинг мазкур дастурга кирмай қолган кўчаларига тош-шағал аралашмаси ётқизилмоқда.

Ўқув машқи машғулотлари давомида жамоат тартибини сақлаш ва йўл ҳаракати хавфсизлигини таъминлаш юзасидан зарур чоралар кўрилди. Махсус техникалар учун ёқилғи-мойлаш маҳсулотлари ўз вақтида етказиб берилди. Шу билан бир қаторда ўқув машқига жалб этилган ҳашарчиларга дам олиши, овқатланиши учун қулай шарт-шароитлар яратилди.

О.Худойберганова.