БЎШ ИШ ЎРИНЛАРИ ЯРМАРКАСИДА 109 ТА КОРХОНА-ТАШКИЛОТ 245 ТА ВАКАНТ ЛАВОЗИМЛАРНИ ТАКЛИФ ЭТДИ

Амударёда туман ҳокимлиги, туман Прокуратураси, Мажбурий ижро бюроси туман бўлими ва Аҳоли бандлигига кўмаклашиш маркази билан ҳамкорликда бўш иш ўринлари ярмаркаси ташкил этилди.

18 январь куни туман Маданият бўлими биносида бўлиб ўтган мазкур тадбирда секторлар раҳбарлари, Мажбурий ижро бюроси туман бўлими ва Аҳоли бандлигига кўмаклашиш маркази, тегишли корхона-ташкилотлар, тадбиркорлик субъектлари масъуллари қатнашишди. Ярмаркага банд бўлмаган хотин-қизлар, ёшлар, иш излаётган алимент тўловчи фуқаролар, ногиронлиги бўлганлар ҳам ташриф буюришди.

Ишсиз фуқаролар бандлигини таъминлаш мақсадида ўтказилган ярмарканинг очилиш маросимида сўзга чиққан туман прокурори Азиз Рўзметов бўш иш ўринлари, йўлланма олиш, ишга жойлашиш тартиби тўғрисида маълумотлар берди. Шунингдек, туман Ички ишлар бўлими бошлиғи Жамоладдин Юсупов, туман ҳокими ўринбосари Рашид Салаев, Мажбурий ижро бюроси туман бўлими ҳамда Аҳоли бандлигига кўмаклашиш маркази масъуллари ҳам фуқароларнинг иш билан таъминланиши, меҳнат муҳофазасига оид амалдаги қонунчилик кабилар юзасидан тушунчалар бериб ўтишди.

Ярмаркада тумандаги 109 та корхона ва ташкилотлар 245 та бўш иш ўринлари билан қатнашди. Вакант иш ўринлари мавжуд бўлган ушбу корхона ва ташкилотлар ўз фаолияти ҳақида батафсил маълумот берувчи кўргазмали стендлари, тарқатма материалларини иштирокчилар эътиборига ҳавола этишди. Шунингдек, тумандаги тижорат банклари тадбиркорлик фаолиятини бошлаш истагида бўлган фуқароларга имтиёзли кредит пакетлари тўғрисида маълумотлар жойлаштирилган буклетларни тарқатиб, улардан фойдаланишни тавсия қилишди. Тижорат банклар масъуллари иш изловчиларга тавсия этилаётган фоизли кредит ва гаров талаб этилмайдиган микрокредитлар олиш тартиби тўғрисида батафсил тушунчалар беришди.

Бўш иш ўринлари ярмаркасида вакант ўринлар билан қизиқиб, мурожаат қилган 92 нафар фуқароларнинг 25 нафарини аёллар, 7 нафарини оғир турмуш шароитида яшовчи хотин-қизлар, 24 нафарини ёшлар, 6 нафарини таълим муассасалари битирувчилари, 6 нафарини жазодан озод этилганлар, 3 нафарини меҳнат муҳожирлари ташкил қилди. Улардан 61 нафарига ўзларининг касб мутахассисликлари бўйича корхона-ташкилотларда ишлаш учун йўлланма берилди ва ишга жойлаштирилди. Шунингдек, 10 нафар фуқарога маслаҳатлар берилди. Ҳақ тўланадиган жамоат ишларига 12 нафар шахс жалб этилди. Касбга ўқитишга 9 нафар фуқаро йўналтирилди.

Ишсиз хотин-қизлар, ёшлар ҳамда Мажбурий ижро бюроси Амударё туман бўлими иш юритувидаги алимент қарзларини ундириш, ишсиз алимент тўловчи фуқароларнинг бандлигини таъминлаш мақсадида ўтказилган “Бўш иш ўринлари ярмаркаси”да 14 нафар аёллар, 20 нафар ёшлар, 3 нафар битирувчилар, 17 нафар ишсиз алимент тўловчи фуқаролар, 1 нафар жазодан озод этилган шахс, 2 нафар меҳнат муҳожирлари ишга жойлаштирилди.

Ярмарка давомида иш изловчи фуқароларга малакали мутахассислар томонидан бандлик соҳасида қизиқтирган масалалар бўйича маслаҳатлар берилиб, ҳуқуқий ва амалий ёрдамлар кўрсатилди. Шунингдек, аҳолини иш билан таъминлаш тўғрисидаги қонун асосида оилавий тадбиркорликни йўлга қўйиш, тармоқли маркетинг орқали даромад топиш бўйича ҳам йўл-йўриқлар, тавсиялар берилди.

О.Худойберганова.