ЎЗБЕКИСТОН ЧЕМПИОНЛАРИГА ЭСДАЛИК СОВҒАЛАРИ ТОПШИРИЛДИ

Сўнгги йилларда жисмоний тарбия ва спортни ривожлантириш, шу орқали ўсиб келаётган ёш авлодни баркамол қилиб вояга етказиш, ёт ғоялардан, зарарли иллатлардан асрашга алоҳида эътибор қаратилмоқда. Шу мақсадда мамлакатимизнинг барча ҳудудларида бўлгани каби Амударё туманида спорт иншоотлари, майдончалари бунёд этилиб, спортнинг оммавийлигини таъминлаш борасида саъй-ҳаракатлар олиб борилаётир. Натижада туманимиз ёшлари орасидан спортнинг барча турлари бўйича нуфузли мусобақалар ғолиблари етишиб чиқаяпти.

16-19 февраль кунлари Тошкент шаҳрида спортнинг қўл жанги тури бўйича эркаклар, аёллар ва кичик ўсмирлар ўртасида ўтказилган Ўзбекистон чемпионатида туман Болалар-ўсмирлар спорт мактаби тарбияланувчиси, 73-сонли умумий ўрта таълим мактаби ўқувчиси Элбек Йўлдошев 62 килограмм вазн тоифасида иштирок этиб, фахрли 3-ўринни эгаллади.

9-11 март кунлари Самарқанд вилоятида спортнинг қўл жанги тури бўйича ўсмирлар ва профессионал спортчилар ўртасида ўтказилган Ўзбекистон чемионатида 15-сонли умумий ўрта таълим мактаби ўқувчиси Азиза Сотиболдиева 53 килограмм вазн тоифасида, 83-сонли мактаб ўқувчиси Лобар Жумабоева эса 58 килограмм вазн тоифасида иштирок этишиб, ғолибликни қўлга киритдилар ва туманимиз спорт шарафи юксалишига муносиб ҳисса қўшдилар.

Яқинда туман Халқ таълими бўлими мудири Ибойим Ражабов, Ёшлар ишлари агентлиги туман бўлими бошлиғи Сардор Исмоилов ва Болалар-ўсмирлар спорт мактаби директори Чоршам Тожимуродовлар ғолиб ўқувчилар таълим олаётган муассасаларда бўлишиб, уларни ғалаба билан қутлаб, эсдалик совғаларини топширишди.

83-мактаб биноси олди байрамона безатилган. Йиғилган мактаб ўқитувчилари, ўқувчилари, чемпион ўқувчининг ота-онаси, яқинларини мактаб бадиий ҳаваскорлари дилрабо куй-қўшиқлар, рақслар билан хушнуд этишяпти.

Азиз меҳмонлар ташрифи уларга яна ҳам кўтаринки кайфият бағишлади. Тантанани мактаб директори Дилафрўз Исмоилова очди ва Лобар Жумабоеванинг ғалабаси ҳақида гапириб, барча ўқувчиларни ундан ўрнак олишга чақирди.

Туман Болалар-ўсмирлар спорт мактаби директори Чоршам Тожимуродов ҳам чемпион қизни эришган ғалабаси билан қутлади. Шундан сўнг унга туман Халқ таълими бўлими, Ёшлар ишлари агентлиги туман бўлими, спорт мактабининг эсдалик совғалари топширилди.

Шу куни масъуллар Қиличбой овули ҳудудидаги 15-сонли мактаб ўқувчиси, туманимизнинг яна бир чемион қизи Азиза Сотиболдиевани ҳам эришган ғалабаси билан қутлаш учун бордилар.

Шу муносабат билан ташкил этилган тадбирни Қиличбой овули ёшлар етакчиси Жасур Ўтамуродов очди ва Азиза Сотиболдиевани спортнинг қўл жанги бўйича ўз вазн тоифасида Ўзбекистон чемпиони бўлганлиги билан табриклади.

Туман Халқ таълими бўлими мудири Ибройим Ражабов, Ёшлар ишлари агентлиги туман бўлими бошлиғи Сардор Исмоилов, туман Болалар-ўсмирлар спорт мактаби директори Чоршам Тожимуродовлар ҳам чемпионни ғалабаси билан қутлаб, эсдалик совғаларини топширдилар. Кўрсатилаётган бунингдек эътибор-эътироф келгусида уларнинг яна ҳам улкан ютуқларга эришишига рағбат бўлса, ажаб эмас.

Ойгул РАЖАБОВА.