ТАНИҚЛИ САНЪАТКОР ОРЗИГУЛ ОТАМУРОДОВА ТАВАЛЛУДИНИНГ 100 ЙИЛЛИГИГА БАҒИШЛАБ ХОТИРА КЕЧАСИ ЎТКАЗИЛДИ

Ҳаётда ҳар биримизнинг кўришга талпинадиган, дунёдан ўтиб кетганидан сўнг ҳам хотирасини ҳурмат билан эсимизга оладиган инсонларимиз бор.

Қорақалпоғистон, Ўзбекистон халқ артисти, ўзига хос мафтункор овоз соҳибаси, Қорақалпоқ санъати дарғаларидан бири Орзигул Отамуродова ана шундай инсонлар сирасидан эди. Унинг нурли юзи, ширали овози кўпчилик юртдошларимиз кўнглида яшаяпти. Санъаткор онахон агар ҳаёт бўлганларида ҳозир 100 ёшни қарши олар эдилар.

5 апрель куни Амударё туманининг Назархон овулида жойлашган 3-сонли мактабда Қорақалпоқ халқининг иқтидорли санъаткор қизи, “Шуҳрат” медали соҳибаси, уруш ва меҳнат фахрийси Орзигул Отамуродова хотирасига бағишланган адабий кеча ўтказилди.

Хотира кечасида туман ҳокими ўринбосари Маҳмуд Шерметов, туман Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев, Орзигул Отамуродованинг сафдоши, шогирди Шиннигул Досхожаева, хўжайлилик Гулистон Рейимова, Қорақалпоғистонда хизмат кўрсатган артист Ханзада Палванова, Назархон овул фуқаролар йиғини масъуллари, фаоллари, мактаб ўқитувчилари, ўқувчилари, марҳума санъаткорнинг яқинлари иштирок этдилар.

Тадбирни Назархон овул фуқаролар йиғини раиси Сағинбай Йўлдашев очди ва таниқли санъаткор хотирасини эслаш мақсадида йиғилганларга унинг санъатдаги ёрқин йўли ҳақида гапириб берди.

Орзигул Отамуродова 1923 йилда республикамизнинг Нукус тумани Назархон овулида (ушбу ҳудуд аввал мазкур туманга қарашли бўлган) туғилган. Санъатга болалигидан қизиққан. Унинг иқтидорини сезган назархонлик таниқли бахши Жапақ Шомуродов унга устозлик қилиб қорақалпоқ халқ қўшиқларини, термаларини ўргатган.

Мактабдан сўнг – 1944 йилда Қорақалпоқ давлат мусиқали драма ва комедия театри қошида очилган балет курсини тугатган. 1944 йилдан 1953 йилгача шу театрда актриса сифатида ишлаб, иқтидори туфайли кўпчилик томошабинлар эътиборини қозонган. Унинг ўзига хос жарангдор овоз билан ижро этган қўшиқлари халқимиз ҳурмат-эътиборига сазовор бўлган.

Ўша вақтларда аёл-қизларнинг саҳнага чиқиши, қўшиқ айтиб, роллар ижро этишининг ўзи улкан жасорат эди. Орзигул Отамуродова ижодида бу жасорат билан уйғун ёрқин истеъдод уни нафақат Қорақалпоғистонда, қўшни мамлакатларда ҳам машҳур қилди.

Унинг “Суймаганга суйканма” спектаклидаги Ойсанам, шунингдек, Бердақ спектаклидаги Ҳурлиман, “Олтин кўл”даги Шоҳиста каби яратган ўнлаб образлари халқимиз қалбидан чуқур жой олди. Хонанда сифатидаги соҳир овоз билан куйлаган қўшиқлари маънавий меросимизнинг ажралмас қисмига айланди.

Орзигул Отамуродова Бердақ номидаги Қорақалпоқ давлат филармониясида, Қорақалпоқ давлат телевидениеси ва радио қўмитасида яккахон хонанда сифатида ҳам самарали ижод қилди.

У Қорақалпоқ санъатига қўшган улкан ҳиссаси учун Қорақалпоғистон халқ артисти, Ўзбекистон халқ артисти унвонлари билан мукофотланган.

Хотира кечасида Орзигул Отамуродованинг ҳаёт йўли ва ижоди ҳақида туман Маҳалла ва нуронийларни қўллаб-қувватлаш бўлими бошлиғи Ғуломжон Дуйсенбоев, санъаткорнинг яқинлари, уни яқиндан билганларнинг хотиралари тингланди, санъаткорнинг ҳаётидан намойиш этилган видеолавҳалар, ижро этган қўшиқлари янгради. Шунингдек, назархонлик ёш ҳаваскор хонанда ижросида қўшиқ, рақслар ижро этилди.

Йиллар ўтаверади, бироқ эл-у халқ хизмати учун умрини бахшида этган инсонлар хотираси ҳеч қачон унутилмайди.

Ойгул РАЖАБОВА.