TANIQLI SANʼATKOR ORZIGUL OTAMURODOVA TAVALLUDINING 100 YILLIGIGA BAGʻIShLAB XOTIRA KEChASI OʻTKAZILDI

Hayotda har birimizning koʻrishga talpinadigan, dunyodan oʻtib ketganidan soʻng ham xotirasini hurmat bilan esimizga oladigan insonlarimiz bor.

Qoraqalpogʻiston, Oʻzbekiston xalq artisti, oʻziga xos maftunkor ovoz sohibasi, Qoraqalpoq sanʼati dargʻalaridan biri Orzigul Otamurodova ana shunday insonlar sirasidan edi. Uning nurli yuzi, shirali ovozi koʻpchilik yurtdoshlarimiz koʻnglida yashayapti. Sanʼatkor onaxon agar hayot boʻlganlarida hozir 100 yoshni qarshi olar edilar.

5-aprel kuni Amudaryo tumanining Nazarxon ovulida joylashgan 3-sonli maktabda Qoraqalpoq xalqining iqtidorli sanʼatkor qizi, “Shuhrat” medali sohibasi, urush va mehnat faxriysi Orzigul Otamurodova xotirasiga bagʻishlangan adabiy kecha oʻtkazildi.

Xotira kechasida tuman hokimi oʻrinbosari Mahmud Shermetov, tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, Orzigul Otamurodovaning safdoshi, shogirdi Shinnigul Dosxojayeva, xoʻjaylilik Guliston Reyimova, Qoraqalpogʻistonda xizmat koʻrsatgan artist Xanzada Palvanova, Nazarxon ovul fuqarolar yigʻini masʼullari, faollari, maktab oʻqituvchilari, oʻquvchilari, marhuma sanʼatkorning yaqinlari ishtirok etdilar.

Tadbirni Nazarxon ovul fuqarolar yigʻini raisi Sagʻinbay Yoʻldashev ochdi va taniqli sanʼatkor xotirasini eslash maqsadida yigʻilganlarga uning sanʼatdagi yorqin yoʻli haqida gapirib berdi.

Orzigul Otamurodova 1923-yilda respublikamizning Nukus tumani Nazarxon ovulida (ushbu hudud avval mazkur tumanga qarashli boʻlgan) tugʻilgan. Sanʼatga bolaligidan qiziqqan. Uning iqtidorini sezgan nazarxonlik taniqli baxshi Japaq Shomurodov unga ustozlik qilib qoraqalpoq xalq qoʻshiqlarini, termalarini oʻrgatgan.

Maktabdan soʻng – 1944-yilda Qoraqalpoq davlat musiqali drama va komediya teatri qoshida ochilgan balet kursini tugatgan. 1944-yildan 1953-yilgacha shu teatrda aktrisa sifatida ishlab, iqtidori tufayli koʻpchilik tomoshabinlar eʼtiborini qozongan. Uning oʻziga xos jarangdor ovoz bilan ijro etgan qoʻshiqlari xalqimiz hurmat-eʼtiboriga sazovor boʻlgan.

Oʻsha vaqtlarda ayol-qizlarning sahnaga chiqishi, qoʻshiq aytib, rollar ijro etishining oʻzi ulkan jasorat edi. Orzigul Otamurodova ijodida bu jasorat bilan uygʻun yorqin isteʼdod uni nafaqat Qoraqalpogʻistonda, qoʻshni mamlakatlarda ham mashhur qildi.

Uning “Suymaganga suykanma” spektaklidagi Oysanam, shuningdek, Berdaq spektaklidagi Hurliman, “Oltin koʻl”dagi Shohista kabi yaratgan oʻnlab obrazlari xalqimiz qalbidan chuqur joy oldi. Xonanda sifatidagi sohir ovoz bilan kuylagan qoʻshiqlari maʼnaviy merosimizning ajralmas qismiga aylandi.

Orzigul Otamurodova Berdaq nomidagi Qoraqalpoq davlat filarmoniyasida, Qoraqalpoq davlat televideniyesi va radio qoʻmitasida yakkaxon xonanda sifatida ham samarali ijod qildi.

U Qoraqalpoq sanʼatiga qoʻshgan ulkan hissasi uchun Qoraqalpogʻiston xalq artisti, Oʻzbekiston xalq artisti unvonlari bilan mukofotlangan.

Xotira kechasida Orzigul Otamurodovaning hayot yoʻli va ijodi haqida tuman Mahalla va nuroniylarni qoʻllab-quvvatlash boʻlimi boshligʻi Gʻulomjon Duysenboyev, sanʼatkorning yaqinlari, uni yaqindan bilganlarning xotiralari tinglandi, sanʼatkorning hayotidan namoyish etilgan videolavhalar, ijro etgan qoʻshiqlari yangradi. Shuningdek, nazarxonlik yosh havaskor xonanda ijrosida qoʻshiq, raqslar ijro etildi.

Yillar oʻtaveradi, biroq el-u xalq xizmati uchun umrini baxshida etgan insonlar xotirasi hech qachon unutilmaydi.

Oygul RAJABOVA.