Nukusda Amir Temur tavalludining 690 yilligi munosabati bilan tantanali harbiy piyoda yurish va bayram tadbiri oʻtkazildi

9-aprel sanasi har yili yurtimiz tarixida oʻchmas iz qoldirgan Sohibqiron Amir Temur tavallud topgan kun sifatida ushbu buyuk tarixiy siymoga cheksiz hurmat va ehtirom bilan keng nishonlandi. Buyuk davlat arbobi va yengilmas sarkarda tavalludining 690 yilligi munosabati bilan Nukus shahrida tantanali harbiy piyoda yurish va bayram tadbiri oʻtkazildi. Ushbu tadbir shunchaki bayram emas, balki milliy gʻurur va vatanparvarlik ruhining yuksak ifodasiga aylandi.

Harbiy yurish Islom Karimov koʻchasidan boshlanib, poytaxtning markaziy nuqtasi — Mustaqillik maydoniga qadar davom etdi. Koʻcha boʻylab Amir Temur bayrogʻining magʻrur hilpirashi, Sohibqiron davriga oid qurol-aslahalar va tarixiy liboslarning namoyish etilishi tomoshabinlarga tarix sahifalarini jonli tarzda his etish imkonini berdi. Bu manzara ayniqsa yosh avlod qalbida ajdodlarga sadoqat, milliy oʻzlikni anglash va Vatanga boʻlgan cheksiz muhabbat tuygʻularini yanada mustahkamlashga xizmat qildi.

Sohibqiron Amir nafaqat ulkan saltanat asoschisi, balki ilm-fan, madaniyat va maʼnaviyat homiysi sifatida ham dunyo tamadduniga beqiyos hissa qoʻshgan shaxs hisoblanadi. Oʻzbekiston oʻz mustaqilligini mustahkamlab, yangi taraqqiyot bosqichiga qadam qoʻyar ekan, Amir Temurning davlatchilik anʼanalari, adolat va kuch birligi haqidagi oʻgitlari biz uchun mayoq boʻlib xizmat qilmoqda. Uning hayoti va faoliyatiga nazar tashlar ekanmiz, markazlashgan davlat barpo etish yoʻlidagi mashaqqatli kurashlari va bu yoʻldagi yuksak salohiyati har qanday davrda ham ibrat maktabi boʻla olishiga amin boʻlamiz.

Sohibqironning tarixiy xizmati shundaki, u oʻnlab mayda va tarqoq viloyatlarni yagona bayroq ostida birlashtirdi. Bu birlashuv nafaqat harbiy qudratni, balki iqtisodiy va madaniy yuksalishni ham taʼminladi. U asos solgan davlat Sharqiy Turkiston, Hindiston va Iroqdan tortib, Kichik Osiyo va Kavkazgacha boʻlgan ulkan hududlarni qamrab olib, jahon siyosiy xaritasida yangi muvozanatni vujudga keltirdi.

"Kuch — adolatdadir" degan ulugʻvor tamoyilni davlatchilik asosi qilib belgilagan Sohibqiron, oʻz saltanatida qonun ustuvorligini taʼminlashga intildi. Uning mashhur "Temur tuzuklari" asari nafaqat oʻsha davr, balki bugungi siyosatshunoslik va huquqshunoslik uchun ham qimmatli qoʻllanma hisoblanadi.

Amir Temur — faqatgina oʻtmish siymosi emas, balki milliy oʻzligimizning ajralmas qismidir. Uning qatʼiyati, uzoqni koʻra bilish qobiliyati va Vatan ravnaqi yoʻlidagi fidoiyligi biz uchun hamisha ibrat boʻlib qoladi.

Mustaqillik maydonida tashkil etilgan tantanalar ham haqiqiy maʼnaviy bayram tusini oldi. Maydon boʻylab yangragan harbiy orkestrning joʻshqin kuylari va saf tortib kelayotgan askarlarning qadamlari bayramga oʻzgacha salobat bagʻishladi. Teatrlashtirilgan sahna koʻrinishlari orqali Sohibqiron hayoti va faoliyatidan lavhalar jonlantirilganida, goʻyoki tarix gʻildiragi ortga aylanib, Temur tuzgan buyuk saltanatning qudrati koʻz oʻngimizda namoyon boʻldi. Faxriy qorovulning mahorat bilan ijro etgan chiqishlari va qurol bilan amalga oshirilgan murakkab harakatlar yigʻilganlarda katta qiziqish uygʻotdi.

Tadbir davomida qoʻl jangi ustalarining namoyish etgan mahoratlari askarlaring naqadar kuchli va matonatli ekanini yana bir bor isbotladi. Harbiy orkestrning badiiy chiqishlari esa tomoshabinlarga zavq bagʻishlab, vatanparvarlik ruhini yanada yuksaltirdi. Xushovoz xonandalar ijrosidagi ona vatanni, ajdodlar jasoratini tarannum etuvchi kuy-qoʻshiqlar bayram ruhini yuqori nuqtaga olib chiqdi. Bu kabi tadbirlar xalqimizning oʻz tarixiga boʻlgan yuksak hurmatini koʻrsatish bilan birga, milliy armiyamizning salohiyati va qudratini namoyish etishda muhim ahamiyat kasb etadi.

Sohibqiron Amir Temur tavalludining 690 yilligiga bagʻishlangan ushbu tantanali yurish va madaniy tadbirlar majmuasi xalqimizning maʼnaviy birligini yanada jipslashtirdi. Buyuk bobokalonimizning «Kuch — adolatdadir» degan ulugʻvor gʻoyasi bugungi kun askarlari va yoshlari uchun hayotiy shiorga aylanganini Nukus shahridagi bayram tantanalari yaqqol isbotlab berdi. Chindan ham, tarixini ulugʻlagan elning kelajagi hamisha nurafshon boʻladi.