ҚАНГЛИ ОВУЛИДА ГРАНТ ЛОЙИҲАСИ ДОИРАСИДА “КЎЧМА КУТУБХОНА” ТАДБИРИ ТАШКИЛ ЭТИЛДИ

Китобни билимлар сарчашмаси деймиз. Дарҳақиқат, бу чашмадан билимга бўлган ҳар қанча эҳтиёж, чанқоқликни қондириш мумкин. Инсоннинг энг яқин маслаҳатчиси, дўсти ва билимлар манбаи бўлган китоб биз учун жуда қадрли. Маънавият ва дунёқарашни юксалтирувчи манбаа бўлган китобларни ўқиган инсон бошқалардан ўзининг юксак тафаккури, дунёқараши ва фикрлаши билан ажралиб туради. Шу боис юртимизда китобхонлар сафини кенгайтириш, ёшларни китоб мутолаасига ундаш ва китобхонлик маданиятини янада юксалтиришга алоҳида эътибор қаратилмоқда. Бу борада турли тадбирлар, танловларни ўтказиш кенг йўлга қўйилган.

24 май куни Қанги овулидаги 29-сонли мактабда ўқувчи-ёшларнинг бўш вақтларини мазмунли ташкил этиш, уларни китобхонликка жалб этиш мақсадида “Кўчма кутубхона” тадбири ташкил этилди. Амударё телевидениеси таҳририятининг “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ўтказилган ушбу тадбирда телевидение ходимлари, мактаб ўқитувчи ва ўқувчилари иштирок этишди.

Тадбирни мактаб директори Баҳром Сапаров очиб берди ва мактабда ўқувчиларни китобхонликка жалб этиш, китоб ўқишга қизиқтириш борасида амалг оширилаётган чора-тадбирлар, эришилаётган натижалар хусусида сўзлади. Мактаб кутубхонасида яратилган шароитлар, дарсликлардан ташқари келтирилаётган ва ўқувчиларга фойдаланишга берилаётган турли адабиётлар хусусида ҳам айтиб ўтди. Шундан сўнг, Амударё телевидениеси ходимлари сўзга чиқиб, ёшларнинг маънавий-руҳий ва интеллектуал салоҳиятини ошириш мақсадидаги “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳудудларда ўтказилаётган тадбирлар ҳақида маълумот берди.

Тадбир давомида ўқувчи-ёшларга “Тараққиёт кўзгуси” таҳририяти қошида ташкил этилган “Жайҳун илҳомлари” нодавлат нотижорат ташкилоти ёш ижодкорларни қўллаб-қувватлаш борасида олиб борилаётган ишлар, ташкилотнинг 4 минг дона китоб фондига эга кутубхонаси фаолиятига ҳам кенг тўхталиб ўтилди. Кутубхонадаги мавжуд адабиётлар, уларнинг турлари, барча ёшдаги китобхонларга мослиги, янги келтирилган китоблар, кутубхонанинг чекка ҳудудлардаги филиаллари хусусида ҳам маълумотлар берилди. Шунингдек, тадбирда китобнинг инсон қалбида Ватанга муҳаббат, юртга садоқат, одамларда меҳр-оқибат туйғуларини камол топтиришдаги ўрни, китоб ўқиган кишининг маънавияти юксалиб, дунёқараши кенгайиб бориши алоҳида таъкидланди.

Мактабнинг она тили ва адабиёт фани ўқитувчилари ҳам ўқувчи-ёшлар ўртасида китобхонликни тарғиб қилиш, уларнинг бадиий адабиётга қизиқишини ошириш мақсадида “Адабиётга эътибор – келажакка, маънавиятга эътибор”, “Кутубхона маънавият маскани”, “Энг фаол китобхон” каби тадбирлар мунтазам равишда ўтказиб келинаётгани, бу китобхон ёшлар сафи ортишида муҳим аҳамият касб этаётганини эътироф этишди. Ўқувчи-ёшлар тадбирга олиб келинган кутубхона китоблари, таниқли адибларнинг асарлари билан танишиб чиқишди ва севган адибларнинг бошқа асарлари, керакли бўлган турли адабиётлар хусусидаги ўзларини қизиқтирган саволларини беришди.

Кўчма кутубхона тадбирида турли адабиётлар билан танишган ўқувчи-ёшлар бошқа китоблардан ҳам баҳраманд бўлиш истагини билдиришди ва “Жайҳун илҳомлари” нодавлат нотижорат ташкилотининг кутубхонасига аъзоликка қабул қилишни сўрашди. Тадбир ташкилотчилари кутубхонага ёзги таътил давомида ота-оналари билан биргаликда ташриф буюришга таклиф қилиб, у ерда китоб мутолаа қилиш учун яратилган шароитларни ҳам айтиб ўтишди.

Китоб – инсон учун муваффақият ва саодат эшикларини очувчи калитдир. Саодатга эришиш истагида турли китобларни мутолаа қилиш, улардан илм излаш энг тўғри йўл ҳисобланади. Грант лойиҳаси доирасида ўтказилган “Кўчма кутубхона” тадбири ёшларнинг китоб мутолаасига бўлган қизиқишини янада оширди.

О.Худойберганова.