ЎРТА ҚАЛЪА ОВУЛИДА “ЁЗ ТАРОВАТИ” ДЕБ НОМЛАНГАН ТОМОША ТАШКИЛ ЭТИЛДИ

Ўзбекистон Республикаси Президентининг “Маданият ва санъат соҳасини янада ривожлантиришга доир қўшимча чора-тадбирлар тўғрисида”ги Қарори ижросини таъминлаш юзасидан олиб борилаётган саъй-ҳаракатлар натижасида ҳудудларда аҳоли айниқса чекка қишлоқларда фуқароларга маданий дам олиш хизматлари кўрсатиш даражаси юксалиб, оммавий-маданий, концерт-томоша дастурлари тизимли равишда ўтказилаётгани қувонарлидир. Бунингдек тадбирлар аҳолининг бўш вақтларини мазмунли ўтказишига, кўнгилли дам олишига хизмат қилаётгани ва халқимизнинг кўп асрлик дорбозлик, цирк, масхарабозлик, айтишув каби қадимий санъатини тарғиб қилаётгани билан ҳам аҳамиятлидир.

Қарорда энг чекка ҳудудларда истиқомат қилувчи аҳоли орасидан ҳам истеъдодлиларини излаб топиш, уларнинг иқтидорини ривожлантиришга, қўллаб-қувватлашга ҳам эътибор кучайтириш лозимлиги белгилангани туманимизда ҳам ёрқин истеъдодли ёшлар санъат майдонига кириб келишига замин ҳозирлади.

Шунингдек, барча давлат органлари муассасалари ва корхоналари ҳар чоракда камида бир марта бюджетдан ташқари ҳамда касаба уюшмалари маблағлари ҳисобидан ўз ходимларининг маданий-эстетик ҳордиқ чиқаришлари учун концерт томоша тадбирларини ташкил этиб туриш амалиётини жорий этиш белгилангани меҳнат билан банд бўлган аҳолининг маданий ҳордиқ чиқаришига улкан ғамхўрлик натижасидир.

Туман Маданият ва туризм бўлими томонидан қарор ижросини таъминлаш борасида изчил саъй-ҳаракатлар олиб борилмоқда.

Шу йилнинг 21 июль куни туманимизнинг Ўрта қалъа овулида ўтказилган “Маданият кунлари рукни остида “Ёз оқшомлари” деб номланган кўнгилочар томоша ҳам шу мақсадга қаратилди.

Томошада туман Маданият ва туризм бўлими тасарруфидаги “Офарин” фольклор этнографик халқ жамоасининг қатнашчилари, иқтидорли эстарада хонандалари иштирок этдилар.

Шу куни Ўрта қалъа овулининг катта-ю кичик аҳолисини карнай-сурнай наволари тароватли ёз оқшомида томошага чорлади.

Овул фуқаролар йиғини маъмурий биноси ёнидаги улкан майдончада ташкиллаштирилган томошада таниқли эстрада хонандалари Насиба Эшчонов, Нурбек Ражабов, Пўлат Йўлдошев, Рашид Раҳимов, Оғабек Саъдуллаев, Раҳматжон Ўрозимбетовларнинг куйлаган жўшқин қўшиқларини барча берилиб тинглади. Хайрулло Ҳабибуллаев, Шароф Ражабов, Дилфуза Бобожоноваларнинг рақслари, доирачи йигитларнинг чалган гоҳ ўйноқи, гоҳ сокин куйлари барчани бирдай сеҳрлаб қўйди. Концерт дастури орасида ёш томошабинлар билан ўтказилган шоулар тадбирнинг янада ҳаяжонли, қизиқарли бўлишини таъминлади.

Халқимиз асли санъатсевар эканлиги ушбу томошада ҳам аён бўлди. Дала ишлари, ёзнинг қийин-қистовли ишларидан чарчаган аҳолига, ёзги таътилда мароқли ҳордиқ чиқараётган болажонларга “Ёз таровати” концерт томошаси жуда манзур бўлгани боиси ҳам шундан. 1000 нафардан зиёд аҳоли жам бўлган тадбир ташкилотчиларига барча улкан миннатдорчиликлар билдириб тарқалишдилар, санъат завқи билан кўнгиллар тозарди.

Туман Маданият ва туризм бўлими томонидан туманимизнинг барча ҳудудларида мамлакатимиз мустақиллигининг 32 йиллиги олдидан истиқлолимизни мадҳ этувчи, истиқлолимизнинг тарихий аҳамиятини тарғиб ўтувчи кўпгина маданий-маърифий тадбирлар, кўнгилочар томошалар ўтказиш режалаштирилган ва амалга оширилмоқда.

Ойгул РАЖАБОВА.