OʻRTA QALʼA OVULIDA “YoZ TAROVATI” DEB NOMLANGAN TOMOShA TAShKIL ETILDI

Oʻzbekiston Respublikasi Prezidentining “Madaniyat va sanʼat sohasini yanada rivojlantirishga doir qoʻshimcha chora-tadbirlar toʻgʻrisida”gi Qarori ijrosini taʼminlash yuzasidan olib borilayotgan saʼy-harakatlar natijasida hududlarda aholi ayniqsa chekka qishloqlarda fuqarolarga madaniy dam olish xizmatlari koʻrsatish darajasi yuksalib, ommaviy-madaniy, kontsert-tomosha dasturlari tizimli ravishda oʻtkazilayotgani quvonarlidir. Buningdek tadbirlar aholining boʻsh vaqtlarini mazmunli oʻtkazishiga, koʻngilli dam olishiga xizmat qilayotgani va xalqimizning koʻp asrlik dorbozlik, tsirk, masxarabozlik, aytishuv kabi qadimiy sanʼatini targʻib qilayotgani bilan ham ahamiyatlidir.

Qarorda eng chekka hududlarda istiqomat qiluvchi aholi orasidan ham isteʼdodlilarini izlab topish, ularning iqtidorini rivojlantirishga, qoʻllab-quvvatlashga ham eʼtibor kuchaytirish lozimligi belgilangani tumanimizda ham yorqin isteʼdodli yoshlar sanʼat maydoniga kirib kelishiga zamin hozirladi.

Shuningdek, barcha davlat organlari muassasalari va korxonalari har chorakda kamida bir marta byudjetdan tashqari hamda kasaba uyushmalari mablagʻlari hisobidan oʻz xodimlarining madaniy-estetik hordiq chiqarishlari uchun kontsert tomosha tadbirlarini tashkil etib turish amaliyotini joriy etish belgilangani mehnat bilan band boʻlgan aholining madaniy hordiq chiqarishiga ulkan gʻamxoʻrlik natijasidir.

Tuman Madaniyat va turizm boʻlimi tomonidan qaror ijrosini taʼminlash borasida izchil saʼy-harakatlar olib borilmoqda.

Shu yilning 21-iyul kuni tumanimizning Oʻrta qalʼa ovulida oʻtkazilgan “Madaniyat kunlari rukni ostida “Yoz oqshomlari” deb nomlangan koʻngilochar tomosha ham shu maqsadga qaratildi.

Tomoshada tuman Madaniyat va turizm boʻlimi tasarrufidagi “Ofarin” folklor etnografik xalq jamoasining qatnashchilari, iqtidorli estarada xonandalari ishtirok etdilar.

Shu kuni Oʻrta qalʼa ovulining katta-yu kichik aholisini karnay-surnay navolari tarovatli yoz oqshomida tomoshaga chorladi.

Ovul fuqarolar yigʻini maʼmuriy binosi yonidagi ulkan maydonchada tashkillashtirilgan tomoshada taniqli estrada xonandalari Nasiba Eshchonov, Nurbek Rajabov, Poʻlat Yoʻldoshev, Rashid Rahimov, Ogʻabek Saʼdullayev, Rahmatjon Oʻrozimbetovlarning kuylagan joʻshqin qoʻshiqlarini barcha berilib tingladi. Xayrullo Habibullayev, Sharof Rajabov, Dilfuza Bobojonovalarning raqslari, doirachi yigitlarning chalgan goh oʻynoqi, goh sokin kuylari barchani birday sehrlab qoʻydi. Kontsert dasturi orasida yosh tomoshabinlar bilan oʻtkazilgan shoular tadbirning yanada hayajonli, qiziqarli boʻlishini taʼminladi.

Xalqimiz asli sanʼatsevar ekanligi ushbu tomoshada ham ayon boʻldi. Dala ishlari, yozning qiyin-qistovli ishlaridan charchagan aholiga, yozgi taʼtilda maroqli hordiq chiqarayotgan bolajonlarga “Yoz tarovati” kontsert tomoshasi juda manzur boʻlgani boisi ham shundan. 1000 nafardan ziyod aholi jam boʻlgan tadbir tashkilotchilariga barcha ulkan minnatdorchiliklar bildirib tarqalishdilar, sanʼat zavqi bilan koʻngillar tozardi.

Tuman Madaniyat va turizm boʻlimi tomonidan tumanimizning barcha hududlarida mamlakatimiz mustaqilligining 32 yilligi oldidan istiqlolimizni madh etuvchi, istiqlolimizning tarixiy ahamiyatini targʻib oʻtuvchi koʻpgina madaniy-maʼrifiy tadbirlar, koʻngilochar tomoshalar oʻtkazish rejalashtirilgan va amalga oshirilmoqda.

Oygul RAJABOVA.