АМУДАРЁДА КОНСТИТУЦИЯ ҚАБУЛ ҚИЛИНГАН КУНГА БАҒИШЛАБ ТАНТАНАЛИ ТАДБИР ЎТКАЗИЛДИ

Бу йил Ўзбекистон Республикаси Конституцияси қабул қилинганига 31 йил тўлди. Шу муносабат билан барча ҳудудларда маънавий-маърифий, маданий-мусиқий тадбирлар ташкил этилди. Амударё туманида ҳам ушбу санага бағишлаб катта тадбир ўтказилди.

7 декабрь куни туман Маданият маркази концертлар залида бўлиб ўтган “Конституция – қомусимиз!” номли тадбирда туман ҳокими Собир Хўжаметов, секторлар раҳбарлари, ҳоким ўринбосарлари ва тегишли давлат органлари масъуллари, депутатлар, кенг жамоатчилик вакиллари қатнашди.

Байрамга мос тарзда безатилган фойе ва саҳна, ҳилпираб турган Ўзбекистон ва Қорақалпоғистон Республикалари байроқлари ташриф буюрганларга тантанавор руҳ, кўтаринкилик бахш этди. Саҳна тўридаги монитор орқали Конституция қабул қилинган куни эълон қилинган сессия ва жорий йил апрель ойидаги муҳим сиёсий жараён – умумхалқ Референдумидан, юртимизда бўлаётган ислоҳотлар, улкан ўзгаришлар, инновацион технологиялар асосида иш юритаётган турли касбдаги ишчи-ходимларнинг фаолиятларидан лавҳалар бериб борилди.

Ўзбекистон ва Қорақалпоғистон Республикалари Давлат мадҳиялари остида бошланган тантанали байрам тадбирини туман ҳокими Собир Хўжаметов очиб бериб, йиғилганларни, улар орқали бутун туманимиз аҳолисини ушбу қутлуғ сана билан муборакбод этди. Шунингдек, юртимизда ўтган йиллар мобайнида амалга оширилган улкан ўзгаришлар, бунёдкорликлар, Конституциявий ислоҳотларни фахр билан тилга олди.

Тадбирда сўзга чиққан Фуқаролик ишлари бўйича туман суди раиси Қайрулла Атамуродов ҳам Қомусимизнинг халқимиз сиёсий-ҳуқуқий тафаккурининг юксак намунаси эканлигини, эркин ва озод, тинч ва осойишта, фаровон яшашнинг қонуний кафолати бўлиб келаётганини алоҳида таъкидлади. Конституциямиз халқимиз учун тинч, обод ва фаровон ҳаёт барпо этиш, Ўзбекистоннинг халқаро майдонда муносиб ўрин эгаллашида мустаҳкам пойдевор бўлиб хизмат қилаётганини эътироф этиб ўтди.

Таъкидлаш жоизки, туманимизда ҳам Конституция ва қонунларимиз талабларидан келиб чиқиб, иқтисодиёт ва тадбиркорликни ривожлантириш, аҳолини уй-жой билан таъминлаш, тиббиёт ва таълим соҳаларидаги муаммолар, мажбурий меҳнат, хусусан, болалар меҳнати, ишсизлик, камбағаллик, коррупцияга қарши кураш масалалари кенг жамоатчилигимиз иштирокида ҳал этилмоқда.

Шу ўринда айтиш лозимки, мамлакатимизда ижтимоий муаммоларни бартараф этиш мақсадида жорий этилган “Темир дафтар”, “Аёллар дафтари”, “Ёшлар дафтари”, “маҳаллабай” ва “хонадонбай” ишлаш тизимлари дастлабки ижобий натижасини бермоқда. Туманимизда ҳам “Темир дафтар”, “Аёллар дафтари” ва “Ёшлар дафтари”га киритилган 209 нафар ишсиз фуқарога 2 млрд. сўмлик субсидия ажратилиб, бандлиги таъминланган.

Маҳаллалардаги ҳоким ёрдамчилари томонидан “Оилавий тадбиркорликни ривожлантириш” дастури доирасида 4 421 нафар фуқарога тавсияномалар берилиб, 81,8 млрд. сўмлик кредитлар ажратилган, 6 минг нафардан ортиқ фуқароларнинг ўзини-ўзи банд қилиш орқали бандлиги таъминланган. “E-AUKSION” электрон савдо платформаси орқали 743,7 гектар ер майдонлари 1338 нафар фуқароларга ажратилган ва уларнинг қишлоқ хўжалиги экинларини экиш орқали даромад топишларига имконият яратилган.

Байрам тадбирининг тантанали қисми тугаганидан сўнг, туман Маданият марказлари санъаткорлари, тумандаги мусиқа ва санъат мактаблари тўгараклари ҳаваскорлари, ўқувчи-ёшлар иштирокидаги мусиқий дастур билан давом эттирилди. “Учқун” ашула рақс ансамбли, 21-сонли Болалар ва мусиқа мактаби оркестр жамоаси, 38-, 16-, 47-, 49-, 36-, 27-сонли мактабларнинг рақс жамоалари ижросидаги қорақалпоқча, қозоқча ва туркманча куй-қўшиқлар, жозибали рақслар барчага хушнудлик бахш этди. Ижодкор Одилжон Шомуродовнинг “Янги Ўзбекистон” ва 40-сонли мактаб ўқувчиларининг “Ўзбекистон” шеърлари эса томошабинларнинг кайфиятини кўтарди. Айниқса, туман ёшлари жўрлигидаги “Ўзбекистон ёшлари” ва Бобуржон Маҳмудов, Севинчой Бектурсунова, Иззатбек Икромовлар ижросидаги “Қомусим” қўшиқлари байрам тадбирининг тантанаворлигини янада оширди.

Конституция қабул қилинганининг 31 йиллигига бағишлаб ўтказилган катта байрам тадбири барчага манзур бўлди.

О. Худойберганова