AMUDARYoDA KONSTITUTsIYa QABUL QILINGAN KUNGA BAGʻIShLAB TANTANALI TADBIR OʻTKAZILDI

Bu yil Oʻzbekiston Respublikasi Konstitutsiyasi qabul qilinganiga 31-yil toʻldi. Shu munosabat bilan barcha hududlarda maʼnaviy-maʼrifiy, madaniy-musiqiy tadbirlar tashkil etildi. Amudaryo tumanida ham ushbu sanaga bagʻishlab katta tadbir oʻtkazildi.

7-dekabr kuni tuman Madaniyat markazi kontsertlar zalida boʻlib oʻtgan “Konstitutsiya – qomusimiz!” nomli tadbirda tuman hokimi Sobir Xoʻjametov, sektorlar rahbarlari, hokim oʻrinbosarlari va tegishli davlat organlari masʼullari, deputatlar, keng jamoatchilik vakillari qatnashdi.

Bayramga mos tarzda bezatilgan foye va sahna, hilpirab turgan Oʻzbekiston va Qoraqalpogʻiston Respublikalari bayroqlari tashrif buyurganlarga tantanavor ruh, koʻtarinkilik baxsh etdi. Sahna toʻridagi monitor orqali Konstitutsiya qabul qilingan kuni eʼlon qilingan sessiya va joriy yil aprel oyidagi muhim siyosiy jarayon – umumxalq Referendumidan, yurtimizda boʻlayotgan islohotlar, ulkan oʻzgarishlar, innovatsion texnologiyalar asosida ish yuritayotgan turli kasbdagi ishchi-xodimlarning faoliyatlaridan lavhalar berib borildi.

Oʻzbekiston va Qoraqalpogʻiston Respublikalari Davlat madhiyalari ostida boshlangan tantanali bayram tadbirini tuman hokimi Sobir Xoʻjametov ochib berib, yigʻilganlarni, ular orqali butun tumanimiz aholisini ushbu qutlugʻ sana bilan muborakbod etdi. Shuningdek, yurtimizda oʻtgan yillar mobaynida amalga oshirilgan ulkan oʻzgarishlar, bunyodkorliklar, Konstitutsiyaviy islohotlarni faxr bilan tilga oldi.

Tadbirda soʻzga chiqqan Fuqarolik ishlari boʻyicha tuman sudi raisi Qayrulla Atamurodov ham Qomusimizning xalqimiz siyosiy-huquqiy tafakkurining yuksak namunasi ekanligini, erkin va ozod, tinch va osoyishta, farovon yashashning qonuniy kafolati boʻlib kelayotganini alohida taʼkidladi. Konstitutsiyamiz xalqimiz uchun tinch, obod va farovon hayot barpo etish, Oʻzbekistonning xalqaro maydonda munosib oʻrin egallashida mustahkam poydevor boʻlib xizmat qilayotganini eʼtirof etib oʻtdi.

Taʼkidlash joizki, tumanimizda ham Konstitutsiya va qonunlarimiz talablaridan kelib chiqib, iqtisodiyot va tadbirkorlikni rivojlantirish, aholini uy-joy bilan taʼminlash, tibbiyot va taʼlim sohalaridagi muammolar, majburiy mehnat, xususan, bolalar mehnati, ishsizlik, kambagʻallik, korruptsiyaga qarshi kurash masalalari keng jamoatchiligimiz ishtirokida hal etilmoqda.

Shu oʻrinda aytish lozimki, mamlakatimizda ijtimoiy muammolarni bartaraf etish maqsadida joriy etilgan “Temir daftar”, “Ayollar daftari”, “Yoshlar daftari”, “mahallabay” va “xonadonbay” ishlash tizimlari dastlabki ijobiy natijasini bermoqda. Tumanimizda ham “Temir daftar”, “Ayollar daftari” va “Yoshlar daftari”ga kiritilgan 209 nafar ishsiz fuqaroga 2 mlrd. soʻmlik subsidiya ajratilib, bandligi taʼminlangan.

Mahallalardagi hokim yordamchilari tomonidan “Oilaviy tadbirkorlikni rivojlantirish” dasturi doirasida 4 421 nafar fuqaroga tavsiyanomalar berilib, 81,8 mlrd. soʻmlik kreditlar ajratilgan, 6 ming nafardan ortiq fuqarolarning oʻzini-oʻzi band qilish orqali bandligi taʼminlangan. “E-AUKSION” elektron savdo platformasi orqali 743,7 gektar yer maydonlari 1338 nafar fuqarolarga ajratilgan va ularning qishloq xoʻjaligi ekinlarini ekish orqali daromad topishlariga imkoniyat yaratilgan.

Bayram tadbirining tantanali qismi tugaganidan soʻng, tuman Madaniyat markazlari sanʼatkorlari, tumandagi musiqa va sanʼat maktablari toʻgaraklari havaskorlari, oʻquvchi-yoshlar ishtirokidagi musiqiy dastur bilan davom ettirildi. “Uchqun” ashula raqs ansambli, 21-sonli Bolalar va musiqa maktabi orkestr jamoasi, 38-, 16-, 47-, 49-, 36-, 27-sonli maktablarning raqs jamoalari ijrosidagi qoraqalpoqcha, qozoqcha va turkmancha kuy-qoʻshiqlar, jozibali raqslar barchaga xushnudlik baxsh etdi. Ijodkor Odiljon Shomurodovning “Yangi Oʻzbekiston” va 40-sonli maktab oʻquvchilarining “Oʻzbekiston” sheʼrlari esa tomoshabinlarning kayfiyatini koʻtardi. Ayniqsa, tuman yoshlari joʻrligidagi “Oʻzbekiston yoshlari” va Boburjon Mahmudov, Sevinchoy Bektursunova, Izzatbek Ikromovlar ijrosidagi “Qomusim” qoʻshiqlari bayram tadbirining tantanavorligini yanada oshirdi.

Konstitutsiya qabul qilinganining 31 yilligiga bagʻishlab oʻtkazilgan katta bayram tadbiri barchaga manzur boʻldi.

O. Xudoyberganova