ТОШЁП ОВУЛИДА СЕКТОР РАҲБАРИНИНГ САЙЁР ҚАБУЛИ ЎТКАЗИЛДИ

Аҳоли мурожаатлари билан ишлаш, фуқароларни ташвишлантираётган муаммоли масалаларга ечим топиш мақсадида Амударё туманининг 4-сектори ҳудудидаги Тошёп овулида сектор раҳбарларининг сайёр қабули ўтказилди.

21 декабрь куни бўлиб ўтган ушбу сайёр қабулда Қорақалпоғистон Республикаси Давлат Солиқ бошқармаси бошлиғи ўринбосари Умирбек Алиев, 4-сектор раҳбари, туман Давлат Солиқ инспекцияси бошлиғи Жаҳонгир Раҳимов ҳамда мутасадди ташкилотлар ва муассасалар масъуллари қатнашишди. Шунингдек, фуқаролар йиғини масъуллари, кўчабошчилар ва овул фаоллари ҳам иштирок этишди.

Таъкидлаш лозимки, 4-сектор масъуллари томонидан сайёр учрашувларда фуқароларнинг ҳар бир мурожаатига индивидуал ёндашув йўлга қўйилган бўлиб, уларни тезкорлик билан, сифатли ҳал этилишига алоҳида эътибор қаратилмоқда. Шунингдек, ҳудудда яшовчи фуқаролар тақдирига бефарқ қарамасдан, уларнинг яшаш шароитларини яхшилаш, жойларда аҳоли бандлигини таъминлаш мақсадида тадбиркорликни ривожлантириш долзарб вазифалардан саналмоқда.

Қабулда дастлаб сектор ҳудудида биринчи навбатда маҳаллаларда яшовчи кам таъминланган, ҳимояга муҳтож, якка-ёлғиз, нотинч, ички ишлар идораларида профилактик ҳисобда турган вояга етмаганлар, аъзолари ишсиз, уюшмаган ёшлар мавжуд бўлган, шунингдек, чин етимларга, уй-жой билан таъминлашга муҳтож бўлган оилаларнинг турмуш шароитларини кенг ва атрофлича ўрганишга астойдил ҳаракат қилинаётгани таъкидлаб ўтилди. Ушбу оилаларнинг рўйхатлари сектор ҳудудидаги ҳар бир маҳалла фуқаролар йиғинлари кенгашлари томонидан шакллантирилиб ва мунтазам равишда янгиланиб борилаётгани эътироф этилди. Шунингдек, ҳуқуқни муҳофаза қилиш, маҳалла фуқаролар йиғинларининг Яраштириш комиссияларига ажралиш масаласини кўриб чиқиш учун ариза берган оилалардаги муҳит, шарт-шароитлар, сабаблар алоҳида, кенг ва атрофлича ўрганилаётгани ҳамда уларнинг ажралиб кетмасликлари учун амалдаги қонунлар доирасида зарур йўл-йўриқлар кўрсатилаётгани тўғрисида батафсил маълумотлар берилди.

Шундан сўнг, қабулга келган фуқароларнинг мурожаатлари тингланди. Қабул давомида ҳудуд фуқароларидан 14 та мурожаатлар келиб тушди. Ушбу мурожаатларнинг 3 таси олий ўқув юртларида таҳсил олаётган фарзандларининг контракт пулларини тўлаб бериш масаласида, 1 таси электр тармоғига уйини улаб бериш масаласида, 1 таси эса тиббий ёрдам кўрсатиш масаласида бўлди.

Ундан ташқари, Тошёп овули ҳудудидаги “Биллур” кўчасини кенгайтириш, кўмир билан таъминлаш, овулдаги қабристонни ободонлаштириш, “Етти авлон” кўчасига тош-шағал тўшаш, ушбу кўчадаги осилиб ётган электр симларини тортиш, аҳолига тозаланган ичимлик сувини етказиб бериш каби масалалар юзаидан ҳам мурожаатлар қабул қилинди. Ушбу мурожаатларнинг 3 таси жойида қаноатлантирилди, 1 тасига асосли тушунчалар берилди. Қолган 10 та мурожаатлар тегишлилиги бўйича идора ва ташкилотларга юборилиб, ижроси назоратга олинди.

Қабулда иштирок этган Қорақалпоғистон Республикаси Давлат Солиқ бошқармаси бошлиғи ўринбосари Умирбек Алиев аҳолининг турмуш тарзини яхшилаш борасида фуқароларни тадбиркорликка кенг жалб қилиш, бунинг учун кредитлар олишларига кўмаклашиш бўйича керакли тавсиялар бериб ўтди. Шунингдек, 4-сектор раҳбари туман Давлат Солиқ инспекцияси бошлиғи Жаҳонгир Раҳимов сўзга чиқиб, бугунги кунда тадбиркорлик учун яратилган имкониятлар тўғрисида сўз юритди.

Овул фуқаролари ҳам масъул раҳбарларга ўзларини қизиқтирган саволларини бериб, етарлича маълумотларга эга бўлишди.

О.Худойберганова.