“БАДИИЙ ГИМНАСТИКА – ГЎЗАЛЛИК ВА БАРКАМОЛЛИК СПОРТИ” ОЧИҚ БИРИНЧИЛИК МУСОБАҚАЛАРИ ЎТКАЗИЛДИ

Мамлакатимизда болалар спортини ривожлантиришга қаратилаётган эътибор ва рағбат туфайли турли ёш тоифасидаги болалар ва ўсмирлар, айниқса, ўсмир қизлар ўртасида спортнинг олимпия турлари бўйича шуғулланувчилар, ҳатто жаҳон спорт ареналарида Ўзбекистон шарафини муваффақиятли ҳимоя қилишга қодир умидли спортчилар етишиб чиқмоқда.

Айниқса, гўзаллик ва нафосат, баркамоллик рамзи бўлган бадиий гимнастика спорти билан шуғулланувчи қизалоқлар сафи ошиб бормоқда. Мазкур спорт тури энг чекка ҳудудлардаги қишлоқларда истиқомат қилувчи ота-оналар ўртасида ҳам катта қизиқиш уйғотиб, ўз қизларининг бадиий гимнастика тўгаракларида шуғулланишлари учун шароит яратиб беришаётгани эътиборга муносиб.

Бу борада Амударё тумани спорт мактаби ҳузуридаги бадиий гимнастика тўгараги фаолияти таҳсинга муносиб. Ушбу тўгаракда айни пайтда турли ёш тоифасидаги 80 нафардан зиёд ўсмир ёшдаги қизлар шуғулланишади. Уларга Шаҳодат Ражабова, Ойдин Матризаева ҳамда Диёра Ёдгоровалар бадиий гимнастика спорти сир-асрорларини ўргатилади. Туманнинг энг чекка қишлоқларида истиқомат қилувчи спортсевар қизалоқлар орасида турли даражадаги гимнастика спорти мусобақалари ғолиблари, Ўзбекистон чемпионатлари, Қорақалпоғистон Республикаси чемпионатлари ғолиб ва совриндорлари бор.

Жорий йилнинг 27 февраль санасида Амударё тумани спорт мактаби спорт залида спорт мактабининг очиқ биринчилиги мусобақаларида ҳам бадиий гимнастика спорти тўгараги аъзоларидан иборат спортчи қизлар ғолиблик учун кураш олиб бордилар. “Бадиий гимнастика – гўзаллик ва баркамоллик спорти” шиори остида ўтказилган мусобақада Хоразм вилоятининг Урганч шаҳри, Янгибозор туманлари ҳамда Қорақалпоғистон Республикасининг Элликқалъа ва Амударё тумани бадиий гимнастика спорти жамоалари ўзаро куч синашдилар.

Мусобақа шартларига кўра, спортчиларнинг қўйилган талабларни бажаришларида спортчи маданияти, шартларни чаққонлик ва уддабуронлик билан амалга оширишдаги ўзига хос услуби, спорт либосларини танлаш маҳоратларига ҳам алоҳида эътибор қаратилди.

Қизғин ва қизиқарли баҳсларга бой ўтган мусобақада энг кучли, эпчил ва ўзига хос услубига эга спортчилар жамоалари ғолибликни қўлга киритишди.

Шуниси эътиборлики, амударёлик гимнастикачи қизлар гарчи ёш тоифаларига кўра, анча ёш бўлсалар-да ўзларининг иродали, аҳил ва жипс жамоа эканликларини амалда намоён этдилар. Ўз маҳоратлари билан меҳмон жамоа аъзоларини ортда қолдирган Амударё тумани спорт мактабининг бадиий гимнастика тўгараги аъзолари мутлақ ғолибликни қўлга киритишди.

Мусобақа якунида 1-ўринни Амударё тумани спорт мактабининг бадиий гимнастика тўгараги жамоаси, 2-ўринни эса Урганч шаҳар спорт мактаби ҳузуридаги бадиий гимнастика тўгараги аъзолари эгаллашди. Учинчи ўрин учун бўлган қизғин беллашувларнинг бадиий гимнастика эса Элликқалъа тумани спорт мактабининг бадиий гимнастика тўгараги қизларига насиб этди.

“Бадиий гимнастика – гўзаллик ва баркамоллик спорти” шиори остида ўтказилган мусобақа якунида ғолиб жамоалар Амударё тумани ҳокими ва Амударё спорт мактаби маъмурияти томонидан медаллар, Диплом ва эсдалик совғалари билан тақдирландилар.

Робия Йўлдошева.